Litanga 26 - KITABU KITAKATIFU

Isaka Yamenya Ha Gerari

¹ Inzara yindi yaduuka mukivala kuli iyaaliho yu kutanga mu ing'inga ya Aburahamu. Isaka yazia ku Abimeleki, mwami wa Filisitia ha Gerari.

² Yahova yaali naloleki ku Isaka namuvooleye, “Utazia Egebeti mba; omenye mukivala yiki, uwa inzi ngovolera omenye.

³ Omenye hano, na ndava harara na ivi, kandi ndakugasiza. Ndakuha kivala yiki choosi harara nivisukululwi vivio. Ndalonda lilagana lia ndalomba na baba woovo Aburahamu.

⁴ Ndakuha visukululwi vinyingi kuli zing'ereng'ani ziu mwigulu, kandi ndakavahe kivala yiki choosi. Zihiiri ziosi zilakateeve inzi kuzigasiza kuli mali kugasiza visukululwi vivio.

⁵ Ndakagasizi ivi, kigira Aburahamu yatia kandi yalonda malago gange.”

⁶ Kunangwa Isaka yamenya ha Gerari.

⁷ Lwa vasaza vamenya yo, vateva kigira mukali weve, yavoola ndi aveeye mbozo weve. Siyaali anyala kuvugilira ndi aveeye mukali weve mba, kigira yaali nuvuti ndi valamwita ma vavuguli Rabeka kigira yaali niligondo lilahi ligali.

⁸ Lwa Isaka yaali ni yakavayo ku ing'inga indambi, mwami Abimeleki wa Filisitia yahenzelera mu lidirisia ma nalora Isaka na Rabeka vavusanaa.

⁹ Kunangwa Abimeleki yalanga Isaka navoora, “Ng'ani uyu numukali woovo! Kigira ki novoora ni mbozo woovo?” Isaka yativura, “Inzi ndaaganagana nditwa niiva ndavoora aveeye mukali wange.”

¹⁰ Abimeleki yavoola, “Nikindiki cha okokoleeye yiki? Musaza wiitu mulala anyala kuva niyaali harara numukali woovo na ivi wakaduliywi kumahiolo yaga.”

¹¹ Kunangwa Abimeleki yiganihiza vandu vosi navoora, “Umundu woosi okolera musaza uyu anoho mukali weve vudamanu aliitwa.”

¹² Isaka yamiiza vuguza mukivala yicho, kandi ku muhiga mulala mwere yigwo yagesa haali mia ku vwayaali niyamiiza, kigira Yahova yaali na mugasizi.

¹³ Yaazizagilira kugasizwa kandi naagwa umundu mutugi ligali.

¹⁴ Avandu va Filisitia vamukolera embodoka kigira yaali niviayo vinyingi via magondi, nizing'ombe, kandi na vatumikiri vanyingi.

¹⁵ Kunangwa vililiza vidaho via vatumikiri vababa weve Aburahamu vayava lwa yaali nakikiri mwoyo.

¹⁶ Maku Abimeleki yavolera Isaka, “Tula mukivala chiitu. Ivi umali kuva umundu wi zinguru kukuvita.”

¹⁷ Kunangwa Isaka yazia ma niyumbaka lihema mu Livona lia Gerari kandi namenya yo.

¹⁸ Yayava kandi vidaho viali niviayavwa mu ing'inga ya Aburahamu kandi viali nivililizwa inyima wa Aburahamu yaali ni yakakuza. Isaka yalanga vidaho yivio amita malala mere aga baba weve yaali ni yavilanga.

¹⁹ Lwa avatumikiri va Isaka valima mu livona, vanyoola kidaho cha mazi.

²⁰ Navuzwa avayi vu mulivona lia Gerari valembana navayi va Isaka nivavoora ndi, kidaho ni chavo. Kunangwa kidaho chagulikwa, “Lirembana”, kigira vaali nivarembani na Isaka.

²¹ Avatumikiri va Isaka vayava kidaho kindi, kandi avayi valembanira ku. Kunangwa kidaho yicho chalangwa “Uvusigu”.

²² Yatura ho kandi nayava kidaho kindi, umundu kali mulala si yarembanira ku mba. Yakigulika “Vovoholore”, navoora, “Kalunu Yahova umali kukuha vovoholore komenya mukivala yiki, kandi kulagaasizwa.”

²³ Isaka yatura nazia Beerisheba.

²⁴ Ku vudiku yivwo Yahova yaloleka kuye kandi navoora, “Inzi mbeeye Nyasaye wa baba woovo Aburahamu. Utatia mba. Mbeeye harara nivi. Ndakugasiza kandi ndakuha visukululwi vinyingi kigira lilagana liange kumutumikiri wange Aburahamu.”

²⁵ Isaka yumbaka hene yaho vwali kandi nasigamira Yahova. Maku yumbakaho lihema kandi navatumikiri veve vayava hene yaho kidaho.

Livugilizana Hagati ha Isaka na Abimeleki

²⁶ Abimeleki yaza kutura Gerari kolola Isaka harara na Ahuzazi muhaani weve wiziganagani kandi Fikoli munene wi liihi.

²⁷ Kunangwa Isaka yavateva, “Kigira ki muuzi kalunu okondola, na lwinyima simwali avalina vange mba, kandi mwangora kutura mukivala chiinyu?”

²⁸ Vaativura, “Kalunu kunyi kumanya ndi Yahova aveeye harara na ivi, kandi kuganagana ndi kuduuka livugilizana liveho hagati hiitu naivi. Kwenya ivi ukulage

²⁹ ndi ivi si ulakusaliriza mba, kuli kwaavula kukusaliriza. Kunyi kwaali avahocha ku ivi nikuleka nuzia mumirembe. Kalunu gaveeye havulavu ndi Yahova umali kukugasiza.”

³⁰ Kunangwa yavalombera lilia nivalia kandi nivanwa.

³¹ Mugambazuri vuli mundu yalomba liesuha nu wundi ma ni vavugirizana maku Isaka yavasivula ma yavaleka ni vazia mumirembe.

³² Ku lidiku yilio avatumikiri va Isaka vaza ni vamuvolera kigira kidaho cha vaali nivayavi. Vavoola, “Kunyi kumali konyoora mazi.”

³³ Kunangwa Isaka yagulika kidaho yiki Shiba. Nindio lidaala linene lia Beerisheba lianyora lieta lialio.

Avakali va Esau vi Zihiiri Zindi

³⁴ Lwa Esau yaali ni mihiga 40, yaleeta avakaana va Hiti vaviri, Judizi mukaana wa Beeri na Basemazi mukaana wa Eloni.

³⁵ Vaakora limenya lia Isaka na Rabeka kuva lio vovereri.