Litanga 24 - KITABU KITAKATIFU

Kotovolera Isaka Mukali

¹ Aburahamu yaali naveeye kalunu mundu musakulu ligali. Yahova yamugasiza mu vindu viosi.

² Yavolera mutumikiri weve muhindira, uwaali mulindi wi vindu vivie viosi, “Viika mukono gwugwo hagati ha matango gange.

³ Nyenya wisuhi ku Yahova, Nyasaye wu mwigulu kandi wi lirova, ndi si ulatovolera muyaayi wange mukali kutura mu vakana va Kanaani ava inzi menyaa hagati haavo mba.

⁴ Navuzwa ulazia mukivala change cha ndivulwa mu ma otovolere muyaayi wange Isaka mukali kutura mu viko vange.”

⁵ Navuzwa mutumikiri yateeva Aburahamu, “Niiva mukaana alasura kutura hango haavo kuza harara na inzi mukivala yiki, nyara kutuma muyaayi woovo yirane mukivala cha watulamu?”

⁶ Aburahamu yativura, “Utavugula muyaayi wange umwiranyie mukivala yicho mba!

⁷ Yahova, Nyasaye wu Mwigulu yaanduliza hango ha baba wange kandi mukivala cha viko vange, ma niyisuha kovora ndi, alamba kivala yiki kali kuduuka ku visukululwi viange. Alatuma engelosi yeeye imbiri woovo, kunangwa uduuki konyoore lamuyaayi wange mukali.

⁸ Niiva mukaana si alavugilira kokolonda, hene yaho, ivi ulava muvoholore ku liesuha liange. Navuzwa utilanya muyaayi wange mukivala yicho kandi mba.”

⁹ Kunangwa mutumikiri yavika mukono gwigwe hagati ha matango ga Aburahamu, munene weve, ma niyisuha kokora aga Aburahamu yaali navooye.

¹⁰ Maku mutumikiri waali mulindi wi miandu ja Aburahamu, yavugula zing'amia 10 ziu munene weve, ma nazia Ivaale wa Mesopotamia mu lidaala lia Nahori.

¹¹ Lwa yaduuka, yakola zing'amia nizisigama ha kidaho ichova wi Lidaala. Yaali ing'inga ya mugolova lwa vakali vazizaa mu kidaho.

¹² Yasaala navoora, “O, Yahova Nyasaye wa Aburahamu, ombe ingavi indahi kalunu inzi saala ku ivi, kandi umanyie munene wange Aburahamu vuyanzi vutaveeye ne keheri.

¹³ Inzi singiyi hakidaho, ha vakana vi lidaala vazaa kudaha mazi.

¹⁴ Ndavolera mulala kuvo, ‘Mwaza, yaanza winaminye isiongo yooyo na nduuki kunwa ku mazi googo.’ Niiva alavoora, ‘Unyala kunwa ku mazi yaga, kandi ndaletera zing'amia zizio mazi zinwi,’ uyu ave mukaana wa ivi umali kotovolera mutumikiri woovo Isaka. Niiva yaga galakoleka, ndamanya ndi ivi umali kuduukiza lilagana yilio nu munene wange Aburahamu.”

¹⁵ Imbiri wa yaali nakikiri kumala kusaala, Rabeka yaduuka nagingi isiongo ku mutwi gwigwe. Yaali mukaana wa Bezueli, muyaayi wa Nahori amwavo Aburahamu, mama weve yaali Milika.

¹⁶ Yaali mukaana wi ligondo lilahi ligali kandi mugima. Yazizaa mu kidaho, adaha mazi mu isiongo yeeye gizura du ma yirana yengo.

¹⁷ Mutumikiri yazia kumwaganira navoora, “Mwaza yaanza ombe amazi kutura mu isiongo yooyo nduuki kunwa.”

¹⁸ Rabeka yinaminya isiongo kutura ku mutwi gwigwe, nagigimira mu makono geege ma navolera mutumikiri, “Mwami wange yaanza unwi amazi,” naye yaanwa mazi.

¹⁹ Lwa yaali ni yakamala kunwa, Rabeka yamuvolera, “Kandi ndaletera zing'amia zizio amazi zinwi kuduuka ziguti.”

²⁰ Yavugula mazi vwangu kutura mu isiongo yeeye, ma niyiita ku mulinga gwi mitugu jinweraku, kandi yanyagura zimbiru kuzia mu kidaho koleta mazi gandi, kuduuka lwi zing'amia zianwa mazi niziguta.

²¹ Mutumikiri uyu yahenza mukaana uyu galaha, alole niiva Yahova agaasizi logendo lwilwe.

²² Lwa yaali ni yakamala kunwehiza zing'amia mazi, mutumikiri yavugula ebede yizahabu iyuvulitu ziguramu 6 ma naviika kumulugu gu mukaana uyu, kandi naviika visambo viviri vie zahabu ku makono geege iyuvulitu ziguramu 115.

²³ Maku yamuvolera, “Mwaza yaanza ombolere, ivi oveeye mukaana wa vwaha? Haveeyeho novogono munyumba yeeye ha avandu vange na inzi mwene kunyala kososera mu vudiku vwa kalunu?”

²⁴ Mukaana oyo yativura, “Inzi mbeeye mukaana wa Bezueli muyaayi wa Nahori; mama weve ni Milika.”

²⁵ “Munyumba yitu koveeye ni viukulia vie mitugu vinyingi kandi uvwiyangu vunyingi ku munyi kososeramu.”

²⁶ Maku mundu oyo yinama hasa nukusigamira Yahova.

²⁷ Yavoola, “Yahova yizominywe, Nyasaye wu munene wange Aburahamu, umali kuduukiza lilagana yili ku munene wange. Yahova umali kunzimilira vulungi kuduuka ku viko vu munene wange.”

²⁸ Rabeka yanyagura kuzia munyumba ya mama weve kandi navavoolera makuva yaga goosi.

²⁹ Labani mbozo Rabeka yanyagura kuzia ha Kidaho hu mutumikiri wa Aburahamu yaali.

³⁰ Labani yaali nalori ebede kandi visambo ku makono ga mbozo weve, kandi yaali naahuliyi mbozo weve navoora agu mutumikiri wa Aburahamu yaali navooye. Yazia ku mundu wa Aburahamu, uwaali nasingiyi ahimbi ni zing'amia zizie ha Kidaho.

³¹ Labani yavolera mundu, “Hamba kuzie yengo ivi oveeye mundu wa Yahova amali kugasiza. Kigira ki usingiyi ha kidaho? Munyumba yange mbeeye mu novogono vuduuka ivi harara ni zing'amia zizio.”

³² Kunangwa mundu uyu harara na vandu veve, kandi ni zing'amia, vazia munyumba. Labani yaavoholora misigo kutura ku zing'amia, ma naaziha viukulia vie mitugu. Kandi yaleeta mazi nahaana ku mundu wa Aburahamu harara na vandu veve vaduuki kwisaava vilenge viavo.

³³ Lwa vavaleeta chukulia kulia, mutumikiri oyo yavoola, “Inzi si ndalia mba, kuduuka mbore agambeeye nago.” Labani yavoola, “Vola makuva googo.”

³⁴ Mundu uyu yavoola, “Inzi mbeeye mutumikiri wa Aburahamu.

³⁵ Yahova yamala kugasiza munene wange ligali, yamukola kuva mundu mutugi ligali. Yamuha chayo cha magondi zimburi ni zing'ombe, ifeza, izahabu, zing'amia, zibunda kandi vatumikiri vasaza na vakali.

³⁶ Sara mukali wu munene wange, yamwivulira mwana muyaayi lwa yaali naveeye musakulu, ma munene wange naamuha miandu jije josi.

³⁷ Munene wange yakola inzi kwisuha kutia lilaga lilie. Yavoola, ‘Utatovolera muyaayi wange mukali kutura mu vakana vi kivala cha Kanaani mba.

³⁸ Navuzwa uzie ku vandu vi inyumba ya baba wange, aviiko vange, na otovolere muyaayi wange mukali.’

³⁹ Inzi ndaateva munene wange, ‘Galavaki niiva mukaana si alaza na inzi?’

⁴⁰ Munene wange yativura, ‘Yahova, wa inzi ndiza kazozo, alatuma engelosi yeeye kuzia harara na ivi na alagasiza ologendo lulwo. Ulanyoolela muyaayi wange mukali kutura mu vandu vi inyumba ya baba wange, kandi kutura mu viko vange.

⁴¹ Ulava muvoholore kutura ku liesuha liilio niiva ulazia ku viko vange na vasuuli ivi.’

⁴² “Lwa nduuki ha kidaho kalunu, saaye nimbora, ‘O, Yahova Nyasaye wu munene wange Aburahamu, yaanza ungasizi mu goosi agangolaa.

⁴³ Inzi mbeeye ha kidaho hano. Lwa mukaana woosi yaza kudaha mazi, ndamuteva yambe amazi gukunwa kutura mu isiongo yeeye.

⁴⁴ Niiva alavugilira kumba amazi, inzi harara ni zing'amia ziange, oyo alava mukali wa ivi umali kotovolera muyaayi wu munene wange.’

⁴⁵ Imbiri wa ndaali ni ngikiri kumala lisaala liange, Rabeka yaza nagingi isiongo ku mutwi gwigwe. Yazia ha kidaho kudaha mazi. Maku ndaamuvolera, ‘Mwaza yaanza ombeku mazi gukunwa.’

⁴⁶ Yinaminya isiongo kutura kumutwi gwigwe vwangu, navoora, ‘Vugula mazi yaga unwi, kandi ndaletera zing'amia zizio amazi gandi zinwi.’ Kunangwa ndaanwa mazi kandi yaleetera zing'amia ziange mazi nizinwa.

⁴⁷ Ndaamuteeva, ‘Ivi nu mukaana wa vwaha?’ Naye yativura, ‘Inzi mbeeye umukana wa Bezueli mwana wa Nahori, Mama wange ni Milika.’ Maku ndaamuha ebede kandi nimbika visambo ku makono geege.

⁴⁸ Maku ndinama nukusigamira Yahova. Ndizominya Yahova, Nyasaye wu munene wange Aburahamu, uwaanzimilira vwangu kuzia ku viko vu munene wange, uwa ndanyoora mukaana kuva mukali wu muyaayi wu munene wange.

⁴⁹ Maku kalunu, niiva mulamanyia zimbavasi kandi vusuuvirifu ku munene wange, mumbolere. Niiva si gaveeye ndio mba, mumbolere kunangwa manyirizi chanyala kokora.”

⁵⁰ Maku Labani na Bezueli vaativura, “Kigira makuva yaga gaturaa ku Yahova, kunyi si kunyala kovora kindu kugo mba.

⁵¹ Rabeka nguyu; muvuguli na muzie naye. Kumuhaana ave mukali wu muyaayi wu munene woovo, kuli Yahova mwene amali kovora.”

⁵² Lwu mutumikiri wa Aburahamu yahulira makuva yaga, yinama nasigamira Yahova.

⁵³ Yahaana ku Rabeka viju vie zahabu kandi ifeza harara ni zinguvu. Kandi yahaana ku mbozo weve na mama weve vihaanwa viu vuguli vudinyu ligali.

⁵⁴ Maku mundu wa Aburahamu harara na vandu va yaali navo, valia kandi nivanwa ma nivagona. Lwa vavuuka mugambazuri, mundu uyu yavoola, “Leki kwirane ku munene wiitu.”

⁵⁵ Navuzwa mbozo Rabeka na mama weve vavoola, “Muleke mukaana ave hano ku lisiza lilala anoho ku madiku likomi, maku anyala kuzia.”

⁵⁶ Navuzwa mundu uyu yavoola, “Mutakokoli komenye hano mba. Yahova amali kugasiza logendo lwiitu; muleke kwirane ku munene wiitu.”

⁵⁷ Vaamutivulira, “Leki kulange mukaana na kuhuliri avoolaki.”

⁵⁸ Kunangwa valanga Rabeka nivamuteeva, “Ulazia nu mundu uyu?” Naye yativura, “Yee ndazia.”

⁵⁹ Kunangwa valeka Rabeka mbozo wavo harara nu mukaana mutumikiri weve, ni vazia nu mutumikiri wa Aburahamu harara na vandu veve.

⁶⁰ Maku vaagasiza Rabeka nivavoora, “Mukaana wiitu, uzie kwaganira zingavi, wivuli avandu avanyingi! Visukululwi vivio viguuti nukuvugula miandu ja amadara ga vasigu vaavo!”

⁶¹ Maku Rabeka harara na vatumikiri veve avakali, vetegeka, ni vanina ku zing'amia ni vazia nu mutumikiri wa Aburahamu harara na vandu veve.

⁶² Kalunu Isaka yaali natuli Beeri Lahai Roi, naziiyi komenya isavaalu wa Kanaani.

⁶³ Lidiku lilala, mu zisa zia ha mugolova, Isaka yazia kogenda mu mulimi. Lwa yaali naveeye mu mulimi, yahenza nalora zing'amia ni ziza.

⁶⁴ Lwa Rabeka yalora Isaka, yika kutura ku ing'amia yeeye,

⁶⁵ na nateeva mutumikiri wa Aburahamu, “Mundu ki ula ogendaa mu mulimi kuza kukwaganira?” Mutumikiri yativura, “Oyo nu munene wange.” Kunangwa Rabeka yavugula kitambaya chiche ma nafuma mu moni mwimwe.

⁶⁶ Mutumikiri wa Aburahamu yavolera Isaka vindu viosi via yaali naakori.

⁶⁷ Maku Isaka yavugula Rabeka naamuhira mu lihema lia Sara mama weve yaamenyaamu; ma yagwa mukali weve. Isaka yayanza Rabeka ligali. Kunangwa Rabeka yaaleminya Isaka mwoyo ku likuza lia mama weve.