Litanga 21 - KITABU KITAKATIFU

Liivulwa Lia Isaka

¹ Yahova yagasiza Sara kuli yaali niyalaga,

² kandi yavereka ma niyivulira Aburahamu mwana muyaayi lwa yaali naveeye musakulu. Mwana muyaayi yiivulwa ku ing'inga ya Nyasaye yavoola alakivulwi.

³ Aburahamu yamulanga Isaka,

⁴ kandi lwa Isaka yaali na madiku munane, Aburahamu yamukeva kuli Nyasaye yalaga.

⁵ Aburahamu yaali ni mihiga miamoja lwa Isaka yiivulwa.

⁶ Sara yavoola, “Nyasaye umali kondetera uvuyanzi kandi keseko. Vuli umundu uhulira ku yaga alangoonya koseka.”

⁷ Maku yameda kovora, “Nivwaha wakavooleye Aburahamu ndi Sara alakalele avana? Nitali inzi mali kumwivulira umwana muyaayi mu zing'inga zizie ziu vusakulu.”

⁸ Ing'inga yaduuka lwa Sara yalekera kunyunyia Isaka, kandi ku lidiku yilio Aburahamu yalomba lisavo linene.

Hagari na Ishimaeli Vakungwa

⁹ Lidiku lilala Ishimaeli mwana uwa Hagari mu Egebeti yaali niyivulira Aburahamu, yaali nakinaa na Isaka mwana wa Sara.

¹⁰ Sara yavalola ma navolera Aburahamu, “Ukungi mukaana mutugwa uyu harara nu muyaayi weve. Muyaayi wu mukali uyu sialinyoora ku kedonye chuvuhinda vuvwo, uvwu muyaayi wange Isaka gamuduukira anyoore mba.”

¹¹ Yaga si gayaanziza Aburahamu ligali mba, kigira Ishimaeli yaali muyaayi weve.

¹² Navuzwa Nyasaye yavolera Aburahamu ndi, “Utahenda mwoyo kigira muyaayi nu mutugwa woovo Hagari mba. Okole aga Sara akovoleraa, kigira ulakanyore visukululwi via inzi ndaakulaga kuvitira mu Isaka.

¹³ Inzi ndakahe kandi muyaayi wu mukaana mutugwa avana vanyingi, kunangwa navave ihiiri. Oyo kandi aveeye muyaayi woovo.”

¹⁴ Mugambazuri lidiku lilondaku Aburahamu yaaha Hagari iviukulia kandi ne ndoho ya mazi niyizuuyi du. Yamuviikira umwana kumugongo kandi namukunga. Yatura ma nagendagenda mwigendanyama lia Beerisheba.

¹⁵ Lwa mazi gaali nigakafaa. Yaleka mwana mukisaka

¹⁶ kandi niyikara hasi zimita 100 ihale kutura ku mwana. Yevoolera umwene, “Inzi si nyara kolola mwana wange nakuzaa mba.” Lwa yaali niyikaye ho mwana yaatanga kulira.

¹⁷ Lwa Nyasaye yahulira muyaayi nalira, engelosi wa Nyasaye yalanga Hagari kutura mu ligulu kandi navoora, “Hagari kigira ki ohenda mwoyo? Utatia mba. Inzi mali kuhulira muyaayi woovo nalira.

¹⁸ Singira uzie ma umuvuguli, kigira inzi ndakamukole kuva baba wi ihiiri enene.”

¹⁹ Maku Nyasaye yamukola nalora kidaho; kunangwa yazia mu kidaho ma nadaha mazi nigizula endoho du, kandi naha muyaayi weve naanwa.

²⁰ Nyasaye yaali harara nu muyaayi lwa yaahindira. Yamenya mwigendanyama lia Parani kandi naagwa muhimi mulahi.

²¹ Mama weve yaamunyoolera mukali kutura Egebeti.

Livugilizana Hagati ha Aburahamu na Abimeleki

²² Ku ing'inga yeyo Abimeleki na Fikoli munene wi liihi vavoolera Aburahamu, “Nyasaye aveeye harara na ivi mu viosi via okolaa.

²³ Kunangwa wisuhi imbiri wa Nyasaye ndi ivi si ulagada, avana vange, anoho visukululwi viange mba. Inzi mali kuva musuuvirifu ku ivi, kunangwa ulage ndi ivi ulava musuuvirifu ku inzi, kandi ku avandu vikivala yiki cha ivi omenyi mu.”

²⁴ Aburahamu yavoola, “Inzi ngusuuvirizaa.”

²⁵ Aburahamu yiganiraa Abimeleki kigira kidaho cha avatumikiri va Abimeleki vaali nivavuguyi.

²⁶ Abimeleki yavoola, “Inzi si manyi uwakola yaga mba. Ivi wambolera ku mba, kandi yilu nu lwu kutanga inzi kuhulira ku yaga.”

²⁷ Maku Aburahamu yavugula malala ku magondi, geege nizing'ombe naha Abimeleki, kandi vombi vaviri valomba Livugilizana.

²⁸ Aburahamu yavika halovega vimeme vidoto saba kutura mu chayo chiche,

²⁹ kandi Abimeleki yamuteeva, “Kigira ki okoli yago?”

³⁰ Aburahamu yativura, “Uvugiliri vimeme vidoto saba yivi. Mulikola yaga ivi uvugilira ndi inzi niyie uwayava kidaho yiki.”

³¹ Kunangwa havundu yaho halangwa Beerisheba, kigira niho ahavandu vaviri yavo valomba liesuuha.

³² Inyima lwa vaali nivakalomba livugilizana yili ha Beerisheba, Abimeleki na Fikoli virana Filisitia.

³³ Maku Aburahamu yasimika musaala gwu muvindi ha Beerisheba kandi nasigamira ho Yahova, Nyasaye uhindiraa mihiga ni mihiga.

³⁴ Maku Aburahamu yamenya madiku manyingi kuli mugeni mu kivala cha vandu va Filisitia.