Litanga 2 - KITABU KITAKATIFU

¹ Kunangwa Nyasaye yamala kolomba ligulu ni lirova kandi viosi iviveeye mu.

² Ku lidiku lia saba Nyasaye yamala miyinzi ja yaali naakori, ma na yasosa.

³ Nyasaye yagasiza lidiku lia saba kandi nalikora kuva litakatifu, kigira ku lidiku yili yasosa ku miyinzi jije josi ja yaali naakori.

⁴ Nindio Nyasaye yalomba ligulu kandi lirova. Lwa Yahova Nyasaye yalomba ligulu ni lirova,

Mulimi gwa Edeni

⁵ vitagwa siviali ku lirova kandi uvuguza sivwaali nivwameli mba, kigira si yaali naakubizi imbura, kandi siyaaliho nu mundu waali anyala kulima mulimi mba.

⁶ Navuzwa mazi gaturaa isi wi lirova nukusama malova.

⁷ Kunangwa Yahova Nyasaye yalomba umundu kutura ku luguchi lwa marova. Yahuuza muye umwika gwaakola umundu oyo kuva ni liiva mwoyo.

⁸ Maku Yahova Nyasaye yalomba mulimi gwa Edeni, kolovega lwi Ivugwi uwene yeyo yavika mu umundu wa yaali naalombi.

⁹ Yahova Nyasaye yakola misaala josi milahi komera nukuhaana makuyu malahi. Musaala gwi livamwoyo nu musaala gwi limanyiriza agaveeye malahi namadamanu jaali mu mulimi hagati.

¹⁰ Mugera gwatura mu Edeni nigusama mulimi, kandi gwa gavukana mu migera jine.

¹¹ Lieta liumugera gwukutaanga ni Pishoni; nigwo gwakumberizaa kivala cha Havila ahi Zahabu enyoolekaa.

¹² Yiyi ni zahabu yi kivala yicho eveeye indahi ligali kandi haveeye mu na magina guvuguli.

¹³ Lieta liu mugera gwakaviri ni Gihoni; yigu nigwo gukumberizaa kivala choosi cha Kushi.

¹⁴ Lieta liu mugera gwakavaga ni Tigurisi, uguvitiraa Ivugwi wi kivala cha Asiria. Mugera gwa kane ni Efurate.

¹⁵ Maku Yahova Nyasaye yavika umundu mu mulimi gwa Edeni kugulima nukugulinda.

¹⁶ Yahova Nyasaye yamuvolera, “Ivi unyala kulia ku makuyu gi misaala josi ju mu mulimi,

¹⁷ navuzwa utalia makuyu ku musaala guhana limanyiriza uvulahi nuvudamanu mba. Niiva ulalia makuyu gagwo ligali ulakuza lidiku liene yilio.”

¹⁸ Maku Yahova Nyasaye yavoola, “Si voveeye vulahi umundu komenya yeng'ine mba. Inzi ndamulombera mukonyi udukana naye.”

¹⁹ Kunangwa yavugula malova nalomba zinyama ziosi ziu mu lirova kandi manyonyi goosi gu mu ligulu. Maku yavileeta ku mundu aduuki kuvigulika amita. Vilombe viosi vianyola mita gavio kuli ndio.

²⁰ Kunangwa mundu yagulika zinyama ziosi ziu ku lirova amita. Kandi naagulika manyonyi goosi gu muligulu amita. Navuzwa ku vilombe yivi viosi si chaali ho kali kilala chaduukana kuva mukonyi wu mundu mba.

²¹ Maku Yahova Nyasaye yaaha umundu zindolo zinyingi, kandi lwa yaali naakegona, yaatuliza ruvalu lulala liu mundu kandi niyiranyia ho inyama.

²² Yalomba mukali kutura ku ruvalu kandi naamuletela.

²³ Maku umundu yavoola, “Kalunu aveeye hano mundu wi lifana liange kigumba chatula ku kigumba change, kandi inyama yatura ku inyama yange. Alalaangwa mukali kigira yatura ku musaza.”

²⁴ Yiki nicho kigira musaza naleka baba weve kandi mama weve ma ahambana nu mukali weve ma vombi vaagwa inyama indala.

²⁵ Musaza nu mukali vombi vaali viahonyo navuzwa si vaali nizisoni mba.