Litanga 18 - KITABU KITAKATIFU

Yahova Yalaga Aburahamu Mwana Muyaayi

¹ Yahova yaloleka ku Aburahamu ha misaala mitakatifu ja Mamure. Lwa Aburahamu yaali niyikaye mu vwingiliru vwe lihema lilie mu ing'inga yu muvasu gwaali munyingi mu lidiku,

² na yahenza nalora avandu vavaga vasingiyi ahimbi naye. Nonoho lwa yavalola, yanyagula kuzia kuvaaganira. Yinama hasi mam'mama

³ navoora, “Avami vange, nimuyaanza mutavita hango hange vugira kwingira mba. Inzi mbeeye hano kumutumikira.

⁴ Leki muletere mazi mwisaave virenge. Munyi munyara kososera mu musaala yigu.

⁵ Ndamuletera kandi chukulia kikekeeke; kiduuki kumuha zinguru kuzizagilira nologendo lwinyu. Munyi mumali kumba luyali kuuza munyumba yange, kunangwa muleke inzi mutumikiri.” Kunangwa vavoola, “Kola kuli umali kovora.”

⁶ Aburahamu yazia vwangu mu lihema kandi navolera Sara, “Kola vwangu, vugula vusie vuvwo vulahi ligunia lilala, kandi olombe mugadi.”

⁷ Maku yanyagula zimbiru nazia mu mitugu gige natovora kemoli kedoto kandi kekomeru, ma naha mutumikiri, uwa didikana kukedeka.

⁸ Maku yavugula maguta, maveere kandi ne kemoli chaali nikelombeywe nahaana ku avageni veve. Lwa vaali nivalizaa, yasingira ahimbi navo isi wu musaala.

⁹ Maku vamuuteva, “Mukali woovo Sara aveeye haliha?” Yavativulira, “Aveeye mu lihema.”

¹⁰ Yahova yavoola, “Mieli tisa kutura kalunu inzi ndakirane, kandi mukali woovo Sara alakanyoole mwana muyaayi.” Sara yahulirizila inyima wi kiliango chi lihema.

¹¹ Aburahamu na Sara vaali vakungu ligali, kandi Sara yaali niyalekera kuzia mu mweli.

¹² Kunangwa Sara yasekera mumwoyo navoora, “Kalunu mbeeye mukeere ligali kandi umukungu, inzi ngikira unyala kusangalira liiva harara numusakulu wange kuli musaza nu mukali?”

¹³ Maku Yahova yateeva Aburahamu, “Kigira ki Sara aseki nokovoora, ‘Inzi nyara ligali konyoora mwana lwa mbeeye mukeere?’

¹⁴ Inzi mbeeye Yahova! Sihaveeye ho ni kindu keveeye kidinyu ku inzi mba. Ndirana muhiga guuzaa kuli mali kulaga, na Sara alakave naveeye nu mwana muyaayi.”

¹⁵ Sara yaali nuvuti, nagaya navoora, “Inzi seki ku mba.” Navuzwa yavoola, “Yee ivi oseki.”

Aburahamu Yasaalira Lidaala lia Sodoma

¹⁶ Maku avasaza vavaga vatura kuzia, lovega lwa Sodoma, kandi Aburahamu yavaheleka kunzira.

¹⁷ Maku Yahova yavoola, “Inzi sindavula kovoolera Aburahamu agambeeye ahimbi kokora mba.

¹⁸ Visukululwi vivie vilakave ihiiri enene kandi yi zinguru. Kuvitira muye, inzi ndakagasizi zihiiri ziosi.

¹⁹ Inzi mali kumutovola kunangwa aduuki kulaga avayaayi veve nivisukululwi vivie vaambuliri inzi kandi vakole agaveeye malahi kandi malungi. Niiva valakola, inzi ndamukolera vuli kindu chamali ku mulaga.”

²⁰ Maku Yahova yavoola, “Aburahamu, inzi mali kuhulira ndi avandu va Sodoma na Gomora vakolaa uvudamanu vwizing'ano ziosi.

²¹ Inzi kuduuka nzie yo nukutunyiliza niiva viyaalo viamali kuhulira niviagiligali.”

²² Maku avasaza vaviri vazia Sodoma, navuzwa Yahova yaatigara na Aburahamu.

²³ Aburahamu yisunda ahimbi na Yahova ma nateeva, “Uladiviza vadamanu harara na valungi?

²⁴ Ivi uladiviza lidaala liosi kali niiva liveeye mu na avandu 50 avataveeye nimbara?

²⁵ Nagiligali ivi siulita avandu vataveeye nimbara harara navandu vamahiolo mba. Yago ganyalika mba! Ivi siunyala kokora ndio mba. Niiva wakakoli ndio, umundu utaveeye nimbara alahevwa mageri harara nu mundu wamahiolo. Yago ganyalika mba. Mukalagi wi kivala choosi kuduuka ahaane likalaga liveeye lirungi.”

²⁶ Yahova yativura, “Niiva ndanyoora mu Sodoma vandu 50 avataveeye nimbara, inzi ndaleka lidaala kigira yavo.”

²⁷ Aburahamu yativura, “Inzi mbeeye vuzwa kuli ligoke kandi luguchi lwi lirova. Yahova, yaanza ombere komoloma ku ivi kuli ndi.

²⁸ Navuzwa niiva vakaveeye vandu 45 vuzwa mu Sodoma avaveeye valungi, ivi waakadivizi lidaala liosi?” Yahova yativura, “Inzi si ndadiviza lidaala liosi mba niiva ndanyoora vandu 45 avataveeye nimbara.”

²⁹ Aburahamu yamoloma kandi: “Havundi valava yo avandu 40 vuzwa.” Yativura, “Inzi si ndalidiviza niiva vaveeye yo 40 mba.”

³⁰ Aburahamu yavoola, “Yahova nuyanza utasinyika mba, kuduuka inzi molome kandi. Niiva vaveeye yo avandu 30 vuzwa.” Yavoola, “Inzi sindakola ndio mba niiva ndanyora avandu 30.”

³¹ Maku Aburahamu yavoola, “Yahova, inzi si mbeeye nuvulungi kokoteeva mba, navuzwa kindiki chakekoleki niiva wakanyooye avandu 20 vuzwa?” Yavoola, “Inzi sindadiviza lidaala niiva ndanyoora avandu 20 mba.”

³² Aburahamu yavoola, “Yahova nuyanza utasinyika mba, inzi ndamoloma lulala kandi. Galava ki niiva valava yo avandu 10 vuzwa?” Yavoola, “Inzi sindalidiviza mba niiva vaveeye yo avandu 10.”

³³ Inyima wa Yahova yaali ni yakamala komoloma na Aburahamu, yamuleka na Aburahamu yirana yengo.