Litanga 16 - KITABU KITAKATIFU

Hagari nu Muyaayi weve Ishimaeli

¹ Sarai mukali wa Aburamu yaali nakikiri kwivulilaku Aburahamu avana mba. Navuzwa yaali nu mukaana mutugwa kutura Egebeti walangwa Hagari.

² Kunangwa, Sarai yavolera Aburamu, “Yahova yakola inzi kuva mugumba. Vugula mukaana mutugwa wange uyu ove harara naye mbula alanzivulira mwana.” Aburamu yaavugilira kokora kuli Sarai yamuvolera.

³ Lwa Aburamu yaali na menyi mukivala cha Kanaani ku mihiga likomi, Sarai mukali weve yamuha mukaana mutugwa weve Hagari ave mukali weve.

⁴ Aburamu yaali harara na Hagari, ma naavereka. Lwa yalora ndi aveeye ninda, yaali ni liegingira kandi nalegeriza Sarai.

⁵ Maku Sarai yavolera Aburamu, “Hagari yandegerizaa kigira uvudamanu vuvwo. Inzi mwene ndamuhana kuive na kutura ing'inga ya yalora ndi aveeye ninda, yangolera kehenyahenye. Yahova mwene akalage, nivwaha oveeye mulungi, ivi anoho inzi!”

⁶ Aburamu yavolera Sarai, “Voveeye vulahi, Hagari aveeye mutugwa woovo kandi aveeye mu vulindi vwuvwo. Mukolere kuli unyala.” Maku Sarai yaakolera Hagari vudamanu muno kuduuka niyiruka kutura kuye.

⁷ Engelosi wa Yahova yanyoora Hagari ha kisinukiru cha mazi mwigendanyama kunzira izizaa Shuri

⁸ ma namuteeva, “Hagari mutugwa wa Sarai, ivi utura haliha kandi uzizaa haliha?” Hagari yativura inzi nziruka kutura ku munene wange Sarai.

⁹ Engelosi yamuvolera, “Wirane ku munene woovo ma wegehizi kuye.”

¹⁰ Engelosi yameda kumuvolera, “Ndakakole visukululwi vivio komeedeka, kali mundu si ali anyala kuvivaliza mba.

¹¹ Ivi ulivula mwana muyaayi, na ulamugulika lieta lilie Ishimaeli, kigira Yahova amali kuhulira lianira liilio liu kudambizwa.

¹² Navuzwa mwana woovo alamenya kuli ibunda yu muvulimu; alalwana vuli mundu woosi, kandi vuli mundu woosi alamulwaana. Alamenya yeng'ine kutura ku viko veve vosi.”

¹³ Hagari yalanga Yahova uwamoloma kuye navoora, “Ivi oveeye Nyasaye ololaa? Gaveeye giligali inzi mali kolola Nyasaye, kandi mbeeye mwoyo inyima wamali kumulora?”

¹⁴ Yiki nicho kigira vandu valanga kidaho keveeye hagati ha Kadeshi na Beredi “Beeri Lahai Roi.”

¹⁵ Hagari yivulira Aburamu mwana muyaayi, ma namugulika lieta lilie Ishimaeli.

¹⁶ Aburamu yaali ni mihiga 86 lwa Hagari yivula Ishimaeli.