Litanga 15 - KITABU KITAKATIFU

Lilagana lia Nyasaye na Aburamu

¹ Inyima wi vindu yivi viosi, Yahova yaloleka ku Aburamu mu malola namuvolera, “Aburamu, utatia mba. Inzi ndakukinga kutura ku vuhimwa vwosi kandi ndakuha madanyi manene ligali.”

² Navuzwa Aburamu yativura, “O, Mwami Munene Yahova, madanyi yaga nagangonye naki? Kigira inzi si mbeeye nu mwana mba. Umundu wa inzi mbeeye naye weng'ine ni Elieza wa Damasiko. Uyu niyie ulivugula miandu jange.

³ Ivi si wayimbaku mwana mba, navuzwa mulala ku vatugwa vange alakavuguri miandu jange.”

⁴ Maku Yahova yavolera Aburamu, “Mutugwa Elieza uyu si alavugula miandu jijo mba, navuzwa mwana woovo mwene niyie ulivugula miandu jijo.”

⁵ Yahova yavugula Aburamu naamuhira ichova namuvolera, “Henza mu ligulu ma uvalizi zing'ereng'ani niiva unyala. Ivi ulakave ni visukululwi vinyingi kuli zing'ereng'ani.”

⁶ Aburamu yasuuvira Yahova, na kigira yaga, Yahova yayanzizwa naye kandi yamuvugilira kuva mundu mulungi.

⁷ Maku Yahova yamuvolera, “Inzi mbeeye Yahova, uwakoleta kutura Uru mukivala cha Babiloni, ninguha kivala yiki keve miandu jijo.”

⁸ Navuzwa Aburamu yamuteeva, “Mwami munene Yahova, inzi nyara kumanya ndi kivala yiki keveeye change?”

⁹ Yahova yamuvolera, “Ndetele kemoli chi mihiga jivaga, imburi yi mihiga jivaga ligondi limigu lie mihiga jivaga kandi likuulu harara ni kidudi.”

¹⁰ Aburamu yamuletera vindu yivi viosi, naakalagamu hagati, ma naviika vidieli vilala ku lovega lulala ni vindi ku lovega lundi. Navuzwa si yakalaga manyonyi mba.

¹¹ Lwi zisoti ziaza kulia zinyama yizi, Aburamu yaazikunga.

¹² Lwi liuva liayera, Aburamu yagona. Hene yaho, kisundi kenene chi litihiza chaza kuye.

¹³ Maku Yahova yavolera Aburamu, “Visukululwi vivio vilava vigeni mu kivala kegeni; vilava vatumwa wene yeyo kandi viladambizwa ku mihiga 400.

¹⁴ Navuzwa inzi ndakahaane mageri ku ihiiri ya vatumikira kuli vaatumwa. Lwinyima valanyora miandu minyingi.

¹⁵ Navuzwa ivi ulamenya kuduuka uhindiri, ulakuza na ulatevwa ni mirembe.

¹⁶ Ku ing'inga ya makura gane, imbiri wi visukululwi vivio vilirana hano, kigira inzi si ndakunga vandu va Amori mba, kuduuka lwa vakora uvudamanu ma vanyoore amageri.”

¹⁷ Lwa liuva liayera, kisundi chaliho; inyingu yu muliru gwu mwochi kandi ulumuli lwi kiyayi nonoho viavitira hagati hi vidonye vie zinyama.

¹⁸ Ku lidiku liene yilio, Yahova yalomba lilagana na Aburamu; Yavoola, “Inzi ndagaa kuhaana ku visukululwi vivio kivala yiki choosi kutura ku lwako lwu mugera gwa Egebeti kuduuka ku mugera gwa Efurate,

¹⁹ harara ni vivala via vandu va Keni, Kadimoni,

²⁰ Hiti, Peri, Refaimu,

²¹ Amori, Kanaani, Girigashi na Jebusi.”