Litanga 14 - KITABU KITAKATIFU

Aburamu Asoola Loti

¹ Avami vane, Amurafeli mwami wa Babiloni, Arioki mwami wa Elasari, Kedorilaomeri mwami wa Elamu, na Tidali mwami wa Goimu,

² Vazia mu liihi navami vandi vatano: Bera mwami wa Sodoma, Birisha mwami wa Gomora, Shinabu mwami wa Adima, Shemeberi mwami wa Zeboiimu, kandi mwami wa Bela anoho Zohari.

³ Avami vatano yava valomba lihambana ma nivaganira mu livona lia Siddimu liveeye kalunu inyanza yi jumbi.

⁴ Vaali nivaveeye hasi hu vwimiliri vwa Kedorilaomeri ku mihiga 12, navuzwa ku muhiga gwa 13 vibaara kuye.

⁵ Mu muhiga gwa 14 Kedorilaomeri harara navami veve vaza harara na mahi gaavo kandi ni vaguuta Refaimu mu Ashitarozi Karinaimu, avandu va Zuzi mu Hamu, avandu va Eni mu livona lia Kiriazaimu,

⁶ na vandu va Hori mu kiguru cha Edomu, nivavalondelera kali kuduuka Eliparaim ku keheri chi changalangwi.

⁷ Maku vaagirung'ana nivirana Kadeshi liamanyikana kuli Enimishipati. Vaguuta avandu vosi va Amaleki kandi nivaguuta vandu vosi va Amori avamenya mu Hazazoni Tamara.

⁸ Maku avami va Sodoma, Gomora, Adima, Zeboiimu, na Bera anoho Zohari vaavugura avasikari vaavo ni vazia mu liihi mu livona lia Siddimu kandi nivalwana

⁹ avami va Elamu, Goimu, Babiloni na Elasari. Vaali avami vane ku vatano.

¹⁰ Livona yili liali na malina gaali mu novodohi vunyingi. Lwa avami va Sodoma na Gomora vageriza kwiruka kutura mu liihi, vaagwa mu malina, navuzwa avami vandi vavaga vahononoka ni vazia kwivisa mu vigulu.

¹¹ Avami vane vaavugura vindu viosi mu Sodoma na Gomora harara niviukulia, ma ni vazia ihale.

¹² Vaavugura Loti umwana wa amwavo Aburamu harara nimiandu jije josi kigira Loti yamenya mu Sodoma.

¹³ Navuzwa mundu yahononoka ma navolera Aburamu Muheburaina uwa menyaa ahimbi ni misaala mitakatifu ja Mamure na avandu va Amori yaga goosi. Mamure harara na vamwavo veve Eshikoli na Aneri vaali avalina va Aburamu.

¹⁴ Lwa Aburamu yahulira ndi mwana wa amwavo weve amali kugumirwa, yalanga avasaza vosi vukukubana mu lihema lilie, vosi vaali 318, ma ni valondelera vami vane kuduuka Dani.

¹⁵ Hene yaho yaagavuranya avasaza veve mu miganda, ma niyingilira avasigu mu vudiku, ma navaguuta. Yavakunga kuduuka Hoba Ivaale wa Damasiko.

¹⁶ Viranyia vindu via valii nivamali kuranywa. Yiranyia kandi mwana wa amwavo weve ulangwa Loti, miandu jije, harara navakari kandi navahambe vandi.

Melikizedeki Yagasiza Aburamu

¹⁷ Lwa Aburamu yirana lwa yaali naguuti Kedorilaomeri na vami vandi, mwami wa Sodoma yazia kumwaganira mu livona lia Shave ilialangwa kandi livona liu mwami.

¹⁸ Melikizedeki, uwaali mwami wa Salemi kandi musaalisi wa Nyasaye oveeye igulu ligali, yaleetera Aburamu mugadi kandi iwaini.

¹⁹ Yamugasiza kandi navoora, “Nyasaye oveeye igulu ligali, uwa lomba ligulu kandi lirova ayaanze agaasizi Aburamu!

²⁰ Nyasaye oveeye igulu ligali uwa kokoraa nuguuta avasigu vovo yizominywe!” Aburamu yahaana ku Melikizedeki kidieli chi likomi ku viranye viosi viayaali niyiranyi.

²¹ Mwami wa Sodoma yavolera Aburamu, “Uvuguli viranye, navuzwa unziranyiri avandu vange.”

²² Aburamu yativulira mwami wa Sodoma ndi, “Inzi nzisuha ku Yahova, Nyasaye oveeye igulu ligali, mulombi wiligulu nilirova,

²³ ndi si ndavugura ku kindu chicho kali kilala mba, kali luvusi kinga migoye jivilato mba. Maku nuvuli kovora, ‘Inzi ndaakola Aburamu kuva mutugi mba.’

²⁴ Si ndakavuguli ku kindu mba. Inzi ndavugilira vuzwa via avandu vange valia. Navuzwa muleke valina vange, Aneri, Eshikoli kandi Mamure vavuguli kedonye chavo.”