Litanga 13 - KITABU KITAKATIFU

Aburamu na Loti Vaavukana

¹ Aburamu yazia Ivaale kutura Egebeti kuduuka Isavaalu mukedonye cha Kanaani harara nu mukali weve kandi nivindu viosi viayaali navio; Loti yazia harara naye.

² Aburamu yaali umundu mutugi ligali na magondi, zimburi, kandi mitugu kali izahabu ni ifeza.

³ Maku yatura hene ho kandi nagendagenda nazizaa Bezeli. Yaduuka hagati ha Bezeli na Ayi uwa yaali namenyi maziambiri

⁴ kandi yaali niyumbaka yo uvwali. Hene yaho yasigamira Yahova.

⁵ Loti yaali kandi na magondi, zimburi kandi ni mitugu, na avinyumba yeeye kandi na vayinziri.

⁶ Kunangwa uvwayiru si vwali ho uvudukiru ku avandu vaviri komenya harara mba, kigira vaali ni mitugu minyingi.

⁷ Kunangwa avasaza vaalinda mitugu ja Aburamu ni mitugu ja Loti vaarembana. Mu ing'inga yeyo avandu va Kanaani na vandu va Peri vaali nivakemenyi mukivala yicho.

⁸ Maku Aburamu yavolera Loti, “Kunyi kutarembana, anoho avandu vovo na vandu vange vatarembana mba, kigira kunyi koveeye avamwavo.

⁹ Kunangwa oleke kwavukane. Otovole lovega lwikivala cha wenyaa. Niiva ulazia ku lovega lwu mukono mulungi, inzi ndazia ku lovega lwu mukono mumosi.”

¹⁰ Loti yahenza muzimbega ziosi kandi nalora livona liosi lia Jorodani kutura Zohari liali na mazi manyingi kuli mulimi gwa Yahova anoho kuli kivala cha Egebeti. Yaga gaali imbiri wa Yahova yaali nakikiri kudiviza madaala manene ga Sodoma na Gomora.

¹¹ Kunangwa Loti yatovola livona liosi lia Jorodani kandi nazia ihale kolovega lwi Ivugwi. Nindio avasaza vaviri yava vaavukana.

¹² Aburamu yamenya mukivala cha Kanaani, kandi Loti yamenya hagati ha madaala mu livona ma niyumbaka lihema ahimbi Sodoma,

¹³ uwa vandu valio vaali avachamu kandi vakora uvwoni ku Yahova.

Aburamu Azizaa mukivala cha Heburoni

¹⁴ Lwinyima lwa Loti yaali ni yakazia, Yahova yavolera Aburamu, “Ohenze vulahi muzimbega ziosi kutura ha oveeye.

¹⁵ Inzi ndakuha harara nivisukululwi vivio kivala cha ololaa yiki choosi, kandi kilakave chicho mihiga ni mihiga.

¹⁶ Inzi ndakuha visukululwi vinyingi kali mundu sianyala kuvaliza mba. Kunangwa niiva umundu yakavalizi luguchi, visukululwi vivio viaakavaliziywi.

¹⁷ Kalunu, zia ogende mukivala choosi, kigira nziza kukuha choosi.”

¹⁸ Kunangwa Aburamu yaginga mahima geege kandi nazia komenya ahimbi ni misaala mitakatifu ja Mamure ha Heburoni, uwa yumbakira Yahova uvwali.