Litanga 12 - KITABU KITAKATIFU

Nyasaye Yalanga Aburamu

¹ Yahova yavolera Aburamu, “Utuli mukivala chicho, oleke aviiko vovo kandi hango ha baba woovo, uzie mukivala cha nziza kukumanyia.

² Ndakokola ove ni visukululwi vinyingi, na valakave ihiiri enene ligali. Ndakugasiza kandi ulamanyikana ligali; kandi ulava ugasizaa.

³ Ndagasiza yavo avagasizaa ivi, Navuzwa ndalaama yavo avalaamaa ivi. Kandi kuvitira mu ivi, ndagasiza zihiiri ziosi.”

⁴ Lwa Aburamu yaali ni mihiga 75, yatura mukivala cha Harani kuli Yahova yaali naamulagi. Loti yazia harara naye.

⁵ Aburamu yavugula mukali weve Sarai, Loti mwana wa mwavo weve, harara na vandu vandi vosi vayaali namenyi navo, kandi miandu jije josi ja yaali ni yanyoora mu Harani, ma ni vatanga logendo kuzia mukivala cha Kanaani. Lwa vaduuka mukivala cha Kanaani,

⁶ vavitira hagati hi kivala yiki ni vazia kuduuka hu musaala mutakatifu gwa More, mu havundu hatakatifu lia Shekemu. Ing'inga yene yeyo, avandu va Kanaani vaali nivakemenyi mukivala yiki.

⁷ Maku Yahova yaloleka ku Aburamu namuvolera, “Yiki nicho kivala cha nziza kuhaana ku visukululwi vivio.” Maku Aburamu yumbakira Yahova uvwali naloleki kuye ahene yaho.

⁸ Inyima wa yaga, Aburamu yazia Isavaalu ku kiguru keveeye Ivugwi wi Lidaala lia Bezeli. Yumbaka lihema Imadioli wa Bezeli na Ivugwi wa Ayi. Hene yaho kandi, yumbaka uvwali ma nasigamira Yahova.

⁹ Maku Aburamu yagenda nazia kuduuka Isavaalu wa Kanaani.

Aburamu Aveeye mu Egebeti

¹⁰ Inzara yaliho mukivala cha Kanaani na Aburamu yazia komenya mukivala cha Egebeti ku ing'inga.

¹¹ Lwa yaali naveeye ahimbi kuduuka Egebeti, yavolera Sarai mukali weve, “Ivi oveeye mukali wi ligondo lilahi ligali.

¹² Lwa vandu va Egebeti vakololaa, valaganagana ndi ivi oveeye mukali wange, na ndio valanzita na valaleka ivi ove mwoyo.

¹³ Uvavoolere ndi ivi oveeye mbozo wange. Maku, kigira ivi valaleka mbe mwoyo valangolera vulahi.”

¹⁴ Lwa Aburamu yaduuka mukivala cha Egebeti, avandu va Egebeti valora ndi mukali uyu aveeye wi ligondo lilahi ligali.

¹⁵ Lwa vatumikiri va Farao valora mukali uyu, vaavoolera mwami wa Egebeti kuli mukali uyu yaali wi ligondo lilahi ligali. Vaavugura mukali uyu nivamuhila munyumba yeeye yu vwami.

¹⁶ Kigira mukali uyu, mwami yaakolera Aburamu vulahi kandi naamuha chayo cha magondi, zimburi, zing'ombe, zisukiri, zibunda, zing'amia harara na vatumikiri avasaza kandi avakali.

¹⁷ Navuzwa kigira mwami wa Egebeti yaali navuguyi Sarai mukali wa Aburamu, Yahova yatuma vulwaye vudamanu ku mwami harara na vandu vi inyumba yeeye yu vwami.

¹⁸ Maku mwami yatumana Aburamu namuteeva, “Kindiki cha umali kongolera yiki? Kigira ki nuvula kombolera ndi Sarai aveeye mukali woovo?

¹⁹ Kigira ki novoora aveeye mbozo woovo, ma noleka ni muvuguraa kuva mukali wange? Mukali woovo nguyu; Muvuguli na uzie!”

²⁰ Mwami yalaga avatumikiri veve, vavuguli Aburamu nu mukali weve, harara ni miandu jije josi ma vamuhili ihale kutura mukivala cha Egebeti.