Litanga 11 - KITABU KITAKATIFU

Munara gwa Babiloni

¹ Mu litanga, avandu vosi mukivala vaali nu lulimi lulala kandi vaali ni limoloma lilala.

² Lwa vagenda genda kutura ivugwi, vaduuka mu kereremo mukivala cha Babiloni ma nivamenya hene yaho.

³ Vavolerana vene ku aveene, nivavoora, “Hambi! Gendi kolombe amadafari ma kugasambe gahie vulahi.” Kunangwa valomba madafari ma ni vagahambanyia harara na madohi.

⁴ Vavoola, “Kalunu gendi kwumbake lidaala linene, ma kolombe munara mutambi kali kuduuka mu ligulu, kunangwa kwelombele lieta kunyi aveene kandi kuvuli kusalana mu lirova liosi.”

⁵ Maku Yahova yaza kutura mu ligulu kolola lidaala linene harara nu munara gwa vandu vaali ni vumbaki.

⁶ Yahova yavoola, “Kalunu avandu yava vosi vaveeye vi ihiiri indala kandi vamoloma lulimi lulala. Yili liveeye vuzwa litanga lie vindu viosi via vazizaa kokora. Si keveeye ho kindu cha valohiza kokora ikinyala kuvatama mba.

⁷ Gendi kuzie kogoyanyia lulimi lwavo kunangwa vavuli kuhulirizana aveene na vene.”

⁸ Kunangwa Yahova yaavasalanyia mu lirova liosi, na valekera kwumbaka lidaala linene.

⁹ Lidaala yili lialangwa “Babiloni” kigira Yahova yaagoyanyia lulimi lwa vandu vosi ku lirova, na kutura lwene yilwo, yaavasalanyia ku lirova liosi.

Visukululwi via Shemu

¹⁰ Yivi ni visukululwi via Shemu. Lwa Shemu yaali ni mihiga 100, mihiga giviri inyima wi migelera ja mazi, yivula mwana muyaayi walangwa Aripakishadi.

¹¹ Inyima wa yaali ni yakivula Aripakishadi, Shemu yamenya mihiga 500 ma niyiivura avana vandi avayaayi na vakana.

¹² Lwa Aripakishadi yaali ni mihiga 35, yivula mwana muyaayi walangwa Shela.

¹³ Aripakishadi yamenya mihiga 403 ma niyiivura avana vandi avayaayi na vakana.

¹⁴ Lwa Shela yaali ni mihiga 30, yivula mwana muyaayi walangwa Eberi.

¹⁵ Shela yamenya mihiga 403 ma niyivura avana vandi avayaayi na vakana.

¹⁶ Lwa Eberi yaali ni mihiga 34, yivula mwana muyaayi, walangwa Pelegi.

¹⁷ Eberi yamenya mihiga 430 ma niyivura avana vandi avayaayi na vakana.

¹⁸ Lwa Pelegi yaali ni mihiga 30, yivula mwana muyaayi walangwa Reu.

¹⁹ Pelegi yamenya mihiga 209 ma niyiivura avana vandi avayaayi na vakana.

²⁰ Lwa Reu yaali ni mihiga 32, yivula mwana muyaayi walangwa Serugi.

²¹ Reu yamenya mihiga 207 ma niyivura avana vandi avayaayi na vakana.

²² Lwa Serugi yaali ni mihiga 30, yivula mwana muyaayi walangwa Nahori.

²³ Serugi yamenya mihiga 200 ma niyivura avana vandi avayaayi na vakana.

²⁴ Lwa Nahori yaali ni mihiga 29, yivula mwana muyaayi walangwa Tera.

²⁵ Nahori yamenya mihiga 119 ma niyiivura avana vandi avayaayi na vakana.

²⁶ Lwa Tera yaali ni mihiga 70, yivula Aburamu, Nahori na Harani.

Visukululwi via Tera

²⁷ Yivi ni visukululwi via Tera, uwivula Aburamu, Nahori na Harani. Harani yivula Loti,

²⁸ ma yamanya nakuzira Uru mu lidaala lia yiivulirwamu mukivala cha Babiloni, lwa baba weve yaali nakikiri mwoyo.

²⁹ Aburamu yaleeta mukali walangwa Sarai. Nahori yaleeta mukali walangwa Milika, mukaana wa Harani. Milika na Isika vaali avana va Harani.

³⁰ Sarai yaali mukali mugumba.

³¹ Tera yavugula mwana weve Aburamu na navizara weve Sarai, harara nu mwisukulu weve Loti uwaali mwana wa Harani. Vatura mu lidaala lia Uru mukivala cha Babiloni ma ni vazia mukivala cha Kanaani. Vazia kuduuka Harani nivamenyayo.

³² Tera yakuzira mukivala yiki naveeye ni mihiga 205.