Lisyoma lya Jeremia 4 - KITABU KITAKATIFU

Jerusalemi inyima ukugwa

¹ Muporofeti avoora: Izahabu indahi imali kwononywa, kandi imali kogotiza ling'ereng'ana liayo; magina guvuguli vonene gu mu Litembeli gamali kusalanywa mu zinzira.

² Avayaayi va Ziyoni vaali avalahi ligali kuli izahabu indahi, navuzwa kalunu vafani kuli zisiongo zio vodohi, umuyinzi gwa makono gumulongi.

³ Kali vivwi vinyunyaa avana vavio, navuzwa vandu vange vamali kugwa avalulu ku avana vaavo kuli amahudu gu mwigendanyama.

⁴ Avana vadoto vaveezaa nuvuluhu ligali, kali kuduuka zinimi ziavo zihanda muminwa jaavo. Avana vasoleri vasavaa viukulia, navuzwa si haveeye ho nu mundu unyala kuvaha mba.

⁵ Avandu valiza viukulia vilahi, vakuza ni nzara mu zinzira. Yavo avalindwa nukuvirukizwa vulahi, kalunu viikara ku vitumi vie ligoke.

⁶ Avandu vange vamali konyoora amageri manene kuvita mageri ga vandu va Sodoma vanyoola, lidaala liadivizwa ku ing'inga engekeeke ku vunyali vwa Nyasaye.

⁷ Aviimiliri va Jerusalemi vaali avanifu ligali kuvita likonza, kandi avalavu kuvita amaveere. Miviri jaavo jaali milamu ligali kandi jang'ereng'anaa kuvita amagina guvuguli vonene.

⁸ Kalunu vaveeye avamwamu kuvita umunyali, kandi si haveeyeho nu umundu unyala kuvamanyiriza muzinzira mba. Ligodo lie miviri jaavo liahanda ku vigumba viavo, kandi liayuma kuli lukuu.

⁹ Yavo aviitirwa mu vulwani vaali vulahi ligali kuvita yavo avakuza kigira inzara; vaang'aha kandi nivakuza kigira si vaali ni viukulia kutura mu mulimi mba.

¹⁰ Avakali vi zimbavasi vadeeka vana vaavo aveene; ni vavalia kuli viukulia lwa vandu vange vadivizwa.

¹¹ Yahova umali kololekiza vutima vwivwe uvululu. Uhambizi muliru mu Ziyoni ugwasaamba mise jie lidaala.

¹² Avami vi lirova si vaasuuvira, anoho mundu woosi ku vandu vikivala si vaasuuvira ndi, avasigu vaali vanyara kwingira mu virivwa via Jerusalemi.

¹³ Navuzwa gekoleka kigira avaporofeti vakora vwoni kandi avasaalisi vaavo vaali namashioro gukwita avandi vatali nimbara.

¹⁴ Kalunu avatumikiri vaavo vagendagenda mu zinzira kuli avavoku. Vayoneka kigira masahi gavatahiza, na mundu si anyala kwisunda ahimbi nukuvagumira mba.

¹⁵ Avandu vavahanzukira nivavoora, “Muzie ihale! Muzie ihale!” “Mutakudiiri ku mba!” Kunangwa vazia ni vagendagenda hagati hi zihiiri, na vandu va vaavoolera ndi si mulamenya nikunyi kandi mba.

¹⁶ Yahova mwene umali kuvasalanyia, sialavaganagana ku kandi mba; Avasaalisi si vahevwa uluyali mba kandi avakulundu sivayaanzirirwa mba.

¹⁷ Kwahenzelera konyoole ovokonyi, navuzwa si kwavonyoola mba. Kwalindirira kandi ni kohenzerera ihiiri iyaali inyala kuvula kukohonyia.

¹⁸ Avasigu vaakohenzeriza; sikwaali kunyala kogenda mu zinzira. Amadiku giitu gaali nigimbiha; keheri chaali nikiduuki.

¹⁹ Avasigu viitu vanyagura zimbiru kuvita zindizu ziu mwigulu; vakukunga kuvitira ku vigulu kandi vaakogoneka mwigendanyama.

²⁰ Avasigu viitu vagumira uwaali kuli kisinukiru chi livamwoyo lietu, umwami wa Yahova yaali natovoye, kandi wakwali kwamusuvira alakukinga kutura ku avasigu viitu.

²¹ Museke O, munyi avandu va Edomu, na avamenyi mu kivala cha Uzi, musangare kuli munyaliza. Navuzwa munyi kandi muladuuka mukivi; mulatuliza zinguvu nukutigara chahonyo.

²² O, munyi avandu va Ziyoni, mumali koheevwa mageri kigira uvwoni vwinyu Yahova si alaleka muzizagiliri komenya mu lihaminywa mba. Navuzwa munyi avandu va Edomu Yahova alahaana mageri kumunyi kigira uvwoni vwinyu; kandi alalang'aminya vikolwa vinyu viuvwoni havulavu.