Lisyoma lya Jeremia 3 - KITABU KITAKATIFU

Lihaana mageri, Lieganira, ni Lisuuvirizwa

¹ Muporofeti avoora: Inzi mbeeye umundu walola uvudinyu mulihevwa mageri mu vutima vwa Nyasaye.

² Umali kumbira ihale kandi no kongola kogenda mukisundi.

³ Nyasaye yambezaa mageri vuli ing'inga.

⁴ Umali kokora ligodo liange ni inyama yange yu muviri kukunguha kandi avunanyi vigumba viange.

⁵ Umali kungumbiriza nu vutima kandi nilidambizwa.

⁶ Umali kongola komenya mukisundi kuli avakuzu vizing'inga zia kale.

⁷ Umali konombera lugaga kunangwa mburi kwiruka; umali komboha niminyororo miriduhu.

⁸ Kali lwandaniraa vudinyu anoho nikulira kigira ovokonyi asuraa kuhaana mativuli ku lisaala liange.

⁹ Umali kwigalira zinzira ziange namagina gavazwa, umali kokora inzira yange kovedekana.

¹⁰ Aveeye kuinzi kuli idubu egoni hasi kongoneka, anoho kuli isimba ilindilira kundumira.

¹¹ Yangunga kutura kunzira nukundanduranyia muvidonye; ma niyandeka.

¹² Yinaminya uvuta vwivwe kandi niyetegeka kundasa nimivano ju vuta vwivwe.

¹³ Yatooza mu muviri gwange nimivano juvuta kutura mukilungu chiche.

¹⁴ Inzi ndagwa ichokosekeliza icha avandu vange vosi; lidiku liosi vahenyahenyaa kunyi muzinyimbu.

¹⁵ Yanwehiza amazi malulu kuzingulu, kandi ninzigutiza niviukulia kandi niviukunwa vilulu.

¹⁶ Umali kuvunanyia amiinu gange namagina gizigongodo; kandi umali kunduvaganyira muluguchi.

¹⁷ Inzi kumali kwimwa murembe; inzi kumali kwivilira chuvusangari voveeye.

¹⁸ Kunangwa mboraa, “Uvukumi vwange kandi viosi nilisuuvirizwa liange vwagota.”

¹⁹ Liganagana kigira lidambizwa liange niligendagenda liange, liveeye isumu induru.

²⁰ Mwoyo gwange guganagana kugo vuli ing'inga ma kodedekera.

²¹ Nitali mbezaa nilisuuvirizwa lwa nzizuliza kindu kilala yiki:

²² Uvuyanzi vwa Yahova vutaveeye nekeheri, zimbavasi zizie siziveeye ni keheri mba;

²³ voveeye vuhia vuli mugamba; vusuvirifu vwivwe voveeye vonene ligali.

²⁴ Inzi mwene mboraa, Yahova aveeye kidieli change kunangwa ndaasuuvira muye.

²⁵ Yahova aveeye mulahi ku yavo vosi avaviika lisuuvirizwa liavo muye, ku oyo umwenyelerizaa.

²⁶ Voveeye vulahi umundu kulindilira machiriri ovohonyi vwa Yahova.

²⁷ Voveeye vulahi umundu kwizuliza lwa akikiri musoleri.

²⁸ Leka yikare yeng'ine machiriri, lwa Yahova amali kumuviika mulisalirizwa.

²⁹ Gamudukira yikuzili mu lisalilizwa, navutswa lisuuvirizwa linyala kuva ho.

³⁰ Leka ahaane lusaya lwilwe ku mulala unyala kumukuya, kandi leka ave mulilegwa.

³¹ Yahova aveeye uwi zimbavasi siasuraa avandu mihiga ni mihiga mba.

³² Kali niiva aletaa ovovereri, alamanyia, uvuyanzi vwivwe kukuinyi voveeye vwi ligali kandi uvwizingulu ligali.

³³ Siasangaliraa mulikokola kove nilisalirizwa anoho uvuzunu mba.

³⁴ Yahova yamanya lwi mioyo jietu jisionolonyiywi mu ijera;

³⁵ Amanya lwa vasuura kokokolera gaduukanaa kokolelwi.

³⁶ Yahova yamanya lwi likalaga lirungi lichaminywa mu kiyaalo.

³⁷ Nivwaha unyala kulaga ma chekoleke niiva Yahova sialagi?

³⁸ Malahi na madamanu gekolekaa kigira lilaga lilie.

³⁹ Kigira ki umundu oveeye mwoyo yilirira lwa ahevwa amageri kigira uvwoni vwivwe?

⁴⁰ Leki kogelizi kandi kwehenzelizi zinzira zietu, kandi kwirane ku Yahova!

⁴¹ Gendi kuzie ku Nyasaye wu mwigulu ma kusaale kovoole:

⁴² “Kunyi kumali kokora uvwoni nukwibaala, na ivi, O, Yahova, siukusamihi mba.

⁴³ “Ivi umali kwikunika nu vutima kandi okolondeleye; umali kwiita vugira livererera.

⁴⁴ Ivi umali kwikunika nililesi liliduhu kunangwa lisaala lietu silinyala kuhulika kuive mba.

⁴⁵ Ivi umali kokokola kuva vindu videdekere viasurwa hagati ha vandu vandi.

⁴⁶ “Avasigu viitu vosi vakonyega nokokokolera kehenyahenye.

⁴⁷ Kwadivizwa ma kwatigara amang'anye; komenyaa muvuhimwa nuvuti.

⁴⁸ Amaliga gidorokaa muzimoni zietu kigira vandu viitu vamali kudivizwa.

⁴⁹ “Amaliga giitu galidoloka kandi vugira kolekera.

⁵⁰ Kuduuka lwa Yahova ahenza hasi kutura mwigulu ma akolole.

⁵¹ Mioyo jietu jivereraa lwa kolola agaamali kwekoleka ku avakali vu mu lidaala linene.

⁵² “Kumali kugumirwa kuli linyonyi na yavo avaveeye avasigu viitu vugira kivuni.

⁵³ Vasiuva muvogo nimbeeye mwoyo kandi nivangunikira mu ni ligina.

⁵⁴ Amazi gatanga kungunika, kandi ndaasuuvira ndi likuza liveeye ahimbi.

⁵⁵ “O, Yahova, inzi ndanira ivi kutura musi mwuvogo.

⁵⁶ Kandi lwa ndakogonya uhuliri lianira liange, ivi wahulira.

⁵⁷ Ivi waza ahimbi lwandakwanira kandi novoora, ‘Utatia mba.’

⁵⁸ “O, Yahova, ivi waza kosoola, kandi nohonyia livamwoyo liange.

⁵⁹ O, Yahova, ivi umali kolola madamanu gavangolela; kalaga muliyaanzilira liange.

⁶⁰ Ivi wamanya kuli vasigu vange vakuvihiriliza kandi kuli vandohizira amadamanu mu vwivisu kundiviza.

⁶¹ “O, Yahova, umali kuhulira nivanyegaa; ivi wamanya lilohiza liavo liu muvwivisu.

⁶² Vamoloma kuinzi lidiku liosi nokolomba lilohiza liavo liumuvwivisu kunzita.

⁶³ Vaheenze! Mulikala anoho mulisingira liavo vambenyahenyera mu zinyimbu ziavo.

⁶⁴ “O, Yahova, uvahe amageri ku agavamali kokora.

⁶⁵ Ivi ulavakola vakuzi mwoyo; kilaamo chicho kilava kuvo.

⁶⁶ O, Yahova, kutura hasi mulirova liilio uvalondelele muvutima vuvwo nukuvadiviza.”