Lisyoma lya Jeremia 1 - KITABU KITAKATIFU

Ovovereri vwa Vandu va Jerusalemi

¹ Henza kuli Lidaala linenelia Jerusalemi litigaye iliere, lidaala liali ni liizula avandu vanyingi! Lidaala liali liuluyali ligali hagati hi zihiiri, kalunu limali kugwa kuli mukunzakali. Lidaala liali kuli mukaana wu mwami hagati ha madaala, limali kugwa kuli mutugwa.

² Avandu va Jerusalemi vasioma vululu vudiku vwosi, amaliga gidolaa kutura mu zimoni ziavo. Siaveeye ho nu mundu kali mulala ku avalina vaavo unyala kuvaleminya mwoyo mba. Avalina vaavo vosi vamalikuvazama, kandi vamali kugwa avasigu veve.

³ Avandu vi Ivuyuda vahiliywi mu lihaminywa kigira uvudinyu kandi lisalira. Kalunu vamenyi hagati hi zihiiri, navuzwa si vanyoola havundu hokososera mba. Avasigu vaavo vamali kuvaguuta hagati hu vudinyu vwavo.

⁴ Kalunu si haveeyeho nu mundu uzizaa mu Litembeli ku lidiku litakatifu ku sigamira Nyasaye mba. Avakaana viimba zinyimbu vaveeye mu vudinyu, kandi avasaalisi vaveeye vuzwa mulikenya vilivwa via Ziyoni viveeye iviere, kandi avandu va Ziyoni vaveeye mu vusaliri vululu.

⁵ Avasigu vaavo vaguuta, vavaviiki mu zinguru ziavo. Yahova uvakoli kusalira kigira uvwoni vwavo vunyingi. Avana vaavo vamali kugumirwa nukuhirwa ihale muvuhambe.

⁶ Uvukumi vwa vandu va Jerusalemi vutuliziywiho; Avanene vaavo vamali kugwa kuli zimbongo zitaveeye nu vwayiru. Viiruka vugira zinguru imbiri wa vasigu vaavo.

⁷ Mu madiku gu vusaliri vwavo uvululu, avandu va Jerusalemi vizulizaa vindu viosi vilahi via valange navio kutura mu madiku ga kale. Lwa vaagwa mu makono ga vasigu vaavo, si yaliho mundu waali anyala kuvakonya mba. Avasigu vaavo vaavasekeriza, mu liguutwa liavo.

⁸ Avandu va Jerusalemi vaakora uvwoni vwi livereriza ligali, na vagwiyi kuli kindu kifunyaa vugundu. Vosi avahaana uluyali kuvo vavalegerizaa kigira vamali kolola chahonyo chavo. Vakenya aveene kandi agirung'ana nukwivisa mu zisoni.

⁹ Uvwoni vwa vandu yava vwaloleka havulavu, navuzwa si vahenda mwoyo ku kivi chavo mba. Liavo liali lidamanu ligali; si yaliho numundu waali anyala kuvaleminya mwoyo mba. Vanira Yahova avavererer mu vudinyu vwavo kigira avasigu vaavo vaali nivamali kuvaguuta!

¹⁰ Avasigu vamali kuvanura ivindu viavo viosi viu vuguli ovonene. Valora zihiiri ni zingiraa mu Litembeli; avandu va Yahova yagaya vavuli kwingira mu Litembeli lilie.

¹¹ Avandu vosi vi lidaala linene vakenya lwa venya chukulia, chukulia, vakenyanga, vakiranyaa mavikiru gaavo kigira viukulia, kunangwa vaduuki kuva mwoyo. Avandu va Jerusalemi vavoola, “O, Yahova, henza ku kunyi, kigira kumali kolegerizwa.”

¹² Vavoolera vuli mundu woosi uvitira ahimbi navo ndi, “Muhenze kunyi!” Siaveeye ho nu mundu uwanyola uvusaliri kuli uvwitu mba, uvusaliri vwa Yahova yaleeta ku kunyi mu ing'inga yu vutima vwivwe.

¹³ “Yatuma muliru kutura mwigulu, umuliru gwaaza nigusamba vigumba vietu. Yaatega mutego kigira kunyi kandi yaakwilanya inyima. Maku akoleki muligenya kandi muvodedekere.

¹⁴ “Yahova yaamanyiriza uvwoni vwitu ma navuviika harara yaavusunga mu magoti giitu vwali vuliduhu ku kunyi ligali kandi nikuva vadedekere kigira vuliduhu. Yakuviika mu makono ga vasigu viitu avaari nizinguru ligali.

¹⁵ “Yahova yalegeriza avasikari viitu vizingulu hagati hiitu; yatuma iliihi kudiviza avasoleri viitu; yaaduvagila hasi avandu viitu ve Ivuyuda kuli vamiina iwaini kutura mu mazabibu.

¹⁶ “Yiki nicho kigira nikusioma kandi amaliga nigidoloka kutura mu zimoni zietu. Siaveeye ho nu mundu unyala kukuleminya mwoyo mba, kandi siaveeye ho nu mundu unyala kukudinyiriza mba. Avana viitu vatigaye hazwa, kigira vasigu viitu vamali kukuguuta.”

¹⁷ Muporofeti avoora: “Avandu va Ziyoni vaanyiira makono gaavo valeminywe mwoyo, navuzwa si yaliho mundu waali anyala kuvaleminya mwoyo mba. Yahova amali kulaga ndi visukululwi via Yakobo vave avasigu vaavo. Jerusalemi imali kugwa kindu kifunyaa vugundu hagati haavo.”

¹⁸ Avandu va Jerusalemi vavoola: “Yahova aveeye mulungi, kigira kumali kwibaala ku likuva lilie; navuzwa muhuliri munyi avandu vosi, muhenze kuvusaaliri vwitu. Avasoleri viitu kandi avakaana viitu vamali kuhirwa muvuhambe.

¹⁹ “Kwanira ku valina viitu kigira ovokonyi, navuzwa vaakugaada. Avasaalisi kandi avakulundu vakuzira mu zinzira zie lidaala linene, lwa vaali nivahenza chukulia vaduuki kuva mwoyo.

²⁰ “Henza, O, Yahova, kigira koveeye mu kivi, kunyi koveeye muvudinyu; mioyo jietu jimali kukuza kigira kumali kugwa avibaali ku ivi ligali. Muzinzira zie lidaala linene avandu vitiywi ni vivavi; kali mu zinyumba, likuza liveeye mu.

²¹ “Huliriza kuli kokenya siaveeye ho nu mundu unyala kokoleminya mwoyo mba. Avasigu viitu vosi vaveeye nuvusangali kigira ivi waakoleetela kivi. Ivi waakuduukiza lidiku lia walaga kokora avasigu viitu vasaaliri kuli kunyi kusaalira.

²² “Uvakalagiri kigira likora liavo lidamanu; uhaane amageri kuvo kuli wahaana amageri ku kunyi kigira uvwoni vwitu. Kunyi kokenya haali kanyingi kandi mioyo jietu jiveeye midedekere.”