Likunula 9 - KITABU KITAKATIFU

¹ Engelosi wa katano yakuba kisiriva. Ndaalora eng'ereng'ani yaali niyaguluki ku lirova kutura mwigulu. Eng'ereng'ani yeyo yahevwa lufungu Iwo mu gehena.

² Eng'ereng'ani zana yakunura gehena yicho nu umwoki gwatula mu kuli gutulaa mu kisambiru kenene. Liuva nu uvwerefu viosi viamwama kigira umwoki gwatura mu.

³ Kandi izisigi ziatula mu umwoki ni ziza ku lirova. Na ziahevwa zinguru kuli zie zing'e zie lirova.

⁴ Ziavolerwa na Nyasaye ndi zitononyia uvulimu vwi lirova, anoho kindu choosi ekeveeye kivisi, anoho umusaala kali mulala; navuzwa ziononyie avandu vataveeye nu umuhuri gwa Nyasaye ku uvweni vwavo.

⁵ Izisigi zana ziahevwe munwa zidambizi vandu ku lwi mieli gitano, navuzwa zitavita mba. Uvuzunu vwu uvusaliri vwazio vwali kuli vwe eng'e ilasaa umundu,

⁶ mu ing'inga yi mieli jitano yijo avandu valeegomba likuza, navuzwa sivalalinyoola mba. Valeegomba vakuzi navuzwa likuza liliruka kutura kuvo.

⁷ Izisigi zana ziali kuli zibarasi zitegekeywi kuzia mu uvulwani. Ku mitwi jazio, zieviika ivindu viali kuli zitaji zie izahabu; mu moni mwazio mwaali kuli mwa avandu.

⁸ Iliisu liazio liali kuli lia avakali na amiinu gazio gaali kuli agi zisimba.

⁹ Kandi ziali ni zisalamba ziu mu kiritu kuli zisalamba zie kivia; ulwanga lwi zimbaha ziazio lwali kuli ulwa magare gasugumangwa ni zibarasi zinyingi zinyagula zimbiru kuzia mu uvulwani.

¹⁰ Izisigi yizio ziali ni mikira kuli ji izing'e ni imivano ju vusungu kuli ji zing'e yizio. Jaali ni zinguru ziu kusaliriza avandu ku mieli jitano.

¹¹ Ziali nu mwami wazio, engelosi wegehena. Lieta lilie mu lulimi lwa Vaheburaina liveeye Abadoni. Mu Luguriki liveeye Apolioni; liveeye kovora “Umudivizi.”

¹² Uvudamanu vwu kutanga vuviti, henza uvundi vuviri vuzaa kandi.

¹³ Engelosi wa sita yakuba kisiriva na ndaahulira mwoyo nigutura mu zinziga ziu vwali vwi izahabu ovoveeye imbiri wa Nyasaye.

¹⁴ Mwoyo yigwo gwavoolera engelosi wa sita uwaali ni kisiriva, “Voholora zingelosi vane avavofwa ha mugera munene gwa Efurate.”

¹⁵ Zingelosi vane yavo vavoholorwa avaari nivategekiziywi kwita kidieli kilala ku vivaga via avandu kigira isa yeyo, ni lidiku yilio, nu mweli yigwo numuhiga yigwo.

¹⁶ Livaliza lia avasikari vanina ku zibarasi liali zimilioni zimia ziviri.

¹⁷ Ndaalora kandi mu amalola gange zibarasi harara na vahiri vazio viviika zisalamba ziavo ziu mu viritu zie ivivia, nazio ziali zinzakanyu kuli muliru, ziali bulu kuli kibiriti nizigwa zia yelo kuli uvurudi. Imitwi ji zibarasi jaali kuli imitwi ji zisimba; muliru, umwoki kandi uvurudi viatula mu minwa jazio.

¹⁸ Ikidieli kilala ku vivaga via avandu viitwa na amaduywa gavaga yaga; nago gaveeye muliru, numwooki nu uvurudi, agaatula mu minwa jazio.

¹⁹ Izingulu zie zibarasi ziali mu minwa kandi mu mikira ziazio. Kigira mikira jazio jaali kuli zinzoka, kandi jiveeye ni mitwi ja saliriziraa avandu.

²⁰ Avandu vaatigara, avavura kwitwa na amaduywa yaga, siviganira ku miyinzi jamakono gaavo gakoraa mba. Kandi sivaleka kusigamira amademoni, anoho vifananyi vie zahabu, ji ifeza, umugasa, je ligina, ni jimisaala jitanyala kuyinzira, anoho kuhulira, anoho kogenda.

²¹ Kandi siviganira ku vwiti vwavo kuvukumu vwavo, kovoheyi vwavo, anoho ku uvwivi vwavo mba.