Likunula 8 - KITABU KITAKATIFU

¹ Lwu Mwana wi Ligondi yaavoholora umuhuri gwa saba, haali ho ni likiling'ana mwigulu kulwi inusu yi isa.

² Maku ndaalora zingelosi saba nivasingira imbiri wa Nyasaye, kandi vahevwe ivisiliva saba.

³ Engelosi yindi yaali nigingi kituva chi izahabu chukusaambira ku kimuli yiza nisiingira imbiri wu vwali. Yahevwa kimuli kinyingi aduuki ku lisaala lia avandu va Nyasaye vosi, nu kuhaana ku vwali vwi izahabu imbiri wendeve yu vwami.

⁴ Umwoki gwi kimuli chasambwa gwanigira harara ni lisaala lia vandu va Nyasaye kutura mu mukono gwengelosi wasingira imbiri wa Nyasaye.

⁵ Engelosi yavugula ikituva, niyizuliza ku muliru kutura ku vwali ma naakisiuva ku lirova. Haali ho ni lihirigana lie izinguba, ni imioyo ja avandu izimbeni, kandi lidegera lie lirova.

Zingelosi zikubaa ivisiliva viavo

⁶ Maku zingelosi saba, ziali ni ivisiliva saba, zietegeka kuvikuba.

⁷ Engelosi yukutanga yakuba kisiriva chiche. Imbura ya amagina nu muliru vizuganyiywi mu na amasahi, viasunduka ku lirova. Kidieli kilala ku vivaga chi lirova chaahia, kandi kidieli kilala ku vivaga chi misaala chaahia, kandi uvulimu vwosi uvuvisi vwaahia.

⁸ Engelosi ya kaviri yakuba kisiriva chiche. Chaali ho ni kindu chaloreka kuli kiguru ekenene, ichakaa umuliru chasiuvwa munyanza. Ikidieli kilala ku vivaga vie inyanza chaagwa amasahi.

⁹ Ikidieli kilala ku vivaga chi vilombe viveeye mwoyo mu inyanza via kuza, kandi ikidieli kindi kilala ku vivaga vie izimeli ziadivizwa.

¹⁰ Engelosi wa kavaga ya kuba kisiriva, eng'ereng'ani enene ligali yaaguluka kutura mwigulu, niyaaka kuli ulumuli lonene. Yagwa ku kidieli kilala ku vivaga vie migera nu ku visinukiru via amazi.

¹¹ Lieta lia eng'ereng'ani zana liveeye “Uvululu.” Ikidieli kilala ku vivaga cha amazi gaagwa amalulu. Avandu avanyingi vaakuza lwa vanwa ku amazi yaga, kigira gaali malulu.

¹² Engelosi ya kane yakuba kisiriva chiche. Ikidieli kilala ku vivaga chi liuva chaduywa, kandi chu umweli kandi kidieli kilala chi zing'ereng'ani, ma nivigotiza kidieli kilala ku vivaga chu uvulavu vwavio nikigwa kisundi. Maku kidieli kilala ku vivaga chu muvasu chagotizwa kandi kidieli kilala ku vivaga chu vudiku kandi chagotizwa.

¹³ Lwa lwa ndahenza, ndaahulira indizu, iyaali nibulukaa igulu mwigulu mu uvwerefu, nevoola nu mwoyo umunene, “O, vayaayi! Vayaayi! Kilakave kivi lugano ki ikiliduuka ku yavo avamenyi mu lirova lwi visiliva vie zingelosi vavaga vatigaye vaduukana vakubi.”