Likunula 7 - KITABU KITAKATIFU

¹ Inyima wa yaga ndaalora zingelosi vane ni vasiingi ku zimbega zine zie lirova. Vagumira izimbuuza zine zie lirova zivuli kuhuuza ku lirova nu kunyanza, kandi ku misaala josi.

² Ndaalora kandi engelosi yindi niyaanigiraa kutura ivugwi, neveeye nu umuhuri gwa Nyasaye oveeye mwoyo. Yahanzuka nu mwoyo munene ku zingelosi vane yava ava Nyasaye yaali naheeye izingulu kwononyia lirova ninyanza.

³ Engelosi yavoola, “Mutononyia lirova anoho inyanza, anoho imisaala, kuduuka kutange kuviika umuhuri mu uvweni vwa avatumikiri va Nyasaye wiitu.”

⁴ Ndaahulira kandi livaliza lia yavo avaduywa ku muhuri gwa Nyasaye ku uvweni vwavo, vaali 144,000 avaatura mu zihiiri zia vandu va Isiraeli komi na mbiri.

⁵ Kutura mu ihiiri ya Yuda, avaviikwa ku umuhuri vaali 12,000. Kutura mu ihiiri ya Rubeni, vaali 12,000. Kutura mu ihiiri ya Gadi, vaali 12,000.

⁶ Ku ihiiri ya Asheri, vaali 12,000. Kutura mu ihiiri ya Nafutali, vaali 12,000. Kutura mu ihiiri ya Manase vaali 12,000.

⁷ Kutura mu ihiiri ya Simioni, vaali 12,000. Kutura mu ihiiri ya Levi, vaali 12,000. Kutura mu ihiiri ya Isakari, vaali 12,000.

⁸ Kutura mu ihiiri ya Zabuloni, vaali 12,000. Kutura mu ihiiri ya Josefu, vaali 12,000, na kutura mu ihiiri ya Benjamini vaali 12,000. Yava nivo avaviikwa ku umuhuri mu uvweni vwavo.

Kiduma ekenene mu ziganza zindavu

⁹ Inyima wi ivindu yivi, henza ndaalora kiduma ekenene chu umundu atanyala kuvaliza, nikitulaa ku zihiiri ziosi, nuku vandu vosi, nuku zinimi ziosi, nikisingi imbiri wendeve yu uvwami kandi imbiri wu Mwana wi Ligondi, niviviiki ziganza zindavu kandi avaari na amatu gamakindu mu amakono gaavo.

¹⁰ Vaahanzuka nu mwoyo munene nivavoora: “Ovohonyi vuturaa ku Nyasaye wiitu uwikaye kondeve yu uvwami kandi kutura ku Mwana wi Ligondi!”

¹¹ Zingelosi vosi vasingira kukumbiriza endeve yu vwami, avakulundu, ni vilombe vine iviveeye mwoyo. Maku vaagwa hasi mamumama imbiri wendeve yu vwami nivasigamiraa Nyasaye,

¹² ni vavoola, “Amini! Lizominywa, uvukumi, ovogeri, lisandiza, uluyali, zinguru, nu uvunyali, viveeye ku Nyasaye wiitu mihiga ni mihiga. Amini!”

¹³ Mulala ku vakulundu yandeva, “Ni vanga vwaha yava aviviikia ziganza izindavu, kandi vatura hayi?”

¹⁴ Nainzi ndaamutivulira, “Simanyi mba, umwami ivi umanyi.” Yambolera, “Yava nivo avamali kutura mu kivi ekenene yicho, navo voogizi ziganza ziavo mu masahi gu Mwana wi Ligondi, nukuzikola zive zindavu.

¹⁵ Yiki nicho kigiri vasiingi imbiri wendeve yu vwami vwa Nyasaye, nu kumutumikira mbasu nu uvudiku mu Litembeli lilie. Uyu wikaye kondeve yu uvwami alavakinga ni lihema lilie.

¹⁶ Sivalilola inzara kandi mba. Kandi sivaliva nu uvuluhu mba. Iliuva sililavasaamba anoho uluuya Iwosi mba.

¹⁷ Kigira Mwana wi Ligondi oveeye hagati hendeve yu uvwami alava mwayi wavo, kandi alavimilira kuduuka ha amazi gi livamwoyo gasinukaa. Nyasaye aleeya amaliga goosi mu zimoni ziavo.”