Likunula 6 - KITABU KITAKATIFU

¹ Kunangwa ndaalora Mwana wi Ligondi navoholora umuhuri gwu kutanga mulala ku imihuri saba yijo. Ndaahulira kilala ku vilombe viveeye mwoyo vine nikevoola nu mwoyo kuli gwi inguba “Hamba.”

² Ndahenza nindora ibarasi indavu! Muhiri wi barasi yaali nu vuta kandi yahevwa itaji. Kunangwa yatura kugihira kuli umuguuti uzizagilira kuguuta.

³ Maku Mwana wi Ligondi yaavoholora umuhuri gwa kaviri, ndaahulira kelombe keveeye mwoyo cha kaviri nikevoola, “Hamba.”

⁴ Ibarasi yindi yatura ichova, ibarasi inzakanyu. Muhiri wayo yahevwa uvunyali koleta uvulwani mu lirova avandu vaduuki kwitana aveene na vene. Yahevwa kivavi ekenene ligali.

⁵ Maku Mwana wi Ligondi yaavoholora umuhuri gwa kavaga, kandi ndaahulira kelombe keveeye mwoyo cha kavaga nikevoola, “Hamba!” Ndaalora ibarasi imwamu. Umuhiri wayo yaali ni kibimiru mu mukono gwigwe.

⁶ Ndaahulira umwoyo nigutura hagati hi vilombe vine iviveeye mwoyo nigovoora, “Mitungu ji lidiku lilala ne kegero chi kilo ndala yu uvusie vwi ingano, ni mitungu ji lidiku lilala jiveeye izikilo zivaga zie shairi. Navuzwa, utononyia misaala ja imizeituni ni imizabibu mba!”

⁷ Maku lwa Mwana wi Ligondi yaavoholora umuhuri gwa kane, ndaahulira mwoyo gwe kelombe keveeye mwoyo cha kane nigovoora, “Hamba!”

⁸ Ndaalora kandi ibarasi imbuheru umuhiri wayo yalangwa Likuza. Kihadisi chamulonda ahimbi na himbi. Vahevwe izingulu ku erobo yi lirova viiti ni kivavi, inzara, uvulwaye harara ni zinyama ziu muvulimu.

⁹ Maku Mwana wi Ligondi yaavoholora umuhuri gwakatano, ndaalora hasi hu vwali, imioyo ja yavo aviitwa ni kivavi kigira vilwaza likuva lia Nyasaye kandi kigira vaali avasuuvirifu mu lilolekiza liavo.

¹⁰ Navo vaalira nu kuhanzuka nu mwoyo umunene nivavoora, “O, Mwami wi zinguru, wu luyali, mutakatifu kandi wi ligali, kuduuka ing'inga ki, ivi ulalindagira uvuli kukalaga nu kuvaanza kisaalia chi liitwa lietu ku vandu avamenyaa mu lirova?”

¹¹ Navo vahevwa vuli mulala inguvu yi ganza indavu kandi ni vavolerwa vasoose hakekeke kuduuka livaliza lia Vakrisitayo vache na avamwavo vaavo avenyekanaa viitwi iduuka, kuli yavo viitwa.

¹² Ndaalora kandi Mwana wi Ligondi navoholora umuhuri gwa sita, na henza liali ho lidegera linene kandi liuva liamwama kuli ligunia lialombwa ku uvwoya uvumwamu, nu umweli gwosi gwakanya kuli amasahi.

¹³ Izing'ereng'ani nazio ziaguluka hasi ku lirova. Kuli umukuyu guvungulura amakuyu gagwo amagingi, ing'inga guhuzangwa ni imbuza enene.

¹⁴ Ligulu liatulizwa ho vwangu kuli kitabu kilingwaa. Ivigulu viosi ni ivisulu viosi viatulizwa mu vogono vwavio.

¹⁵ Maku avami vanene vi lirova, vimiliri vuvulwani avatugi, vizingulu na avatugwa vosi harara na vandu vosi avaveeye avavoholore, viivisa mu zimbangaywa nu mu magina gi vigulu.

¹⁶ Navo vavoolera ivigulu yivi na amagina yago, “Kugwiri kandi mukuvisi kutura mu zimoni zia uyu wikaye kondeve yu uvwami kandi kutura ku uvutima vwu Mwana wi Ligondi!

¹⁷ Lidiku linene liu uvutima vwavo liduuki, nivwaha unyala kusingira imbiri wuvutima yivu?”