Likunula 3 - KITABU KITAKATIFU

¹ “Ng'odera engelosi wi likanisa liveeye Saride: “Yaga nigo amakuva ga uyu oveeye na Roho saba va Nyasaye, nizing'ereng'ani saba. Inzi manyi miyinzi jijo. Ololekaa kuva mwoyo, navuzwa wakuza.

² Kunangwa, vuka udinyirizi ivindu ivitigaye nivikikiri kukuza: kigira sindora imiyinzi jijo nijiveeye midukiru imbiri wa Nyasaye wange mba.

³ Kunangwa wizulizi amigizu agiligali ga wavugula, kandi agawahulira nu kwiganira. Navuzwa nuvula kulinda nu kusaala, ndaaza ku ivi kuli umwiivi, na ivi siulamanya ing'inga ya nziza ku ivi mba.

⁴ Navuzwa oveeye na amita ga avandu vakekeeke mu Saride, avavura kokora vwoni. Mulakagende harara ninzi ni mwiviki izinguvu izindavu, kigira muduukani.

⁵ Oyo ugutaa uvulwani alaviikwa zinguvu zindavu; sindatuliza lieta lilie mu kitabu chi livamwoyo mba, kandi ndiyama lieta lilie imbiri wa Baba wange kandi imbiri wi zingelosi veve kandi.

⁶ “Uyu oveeye nu gutu ahuliri aga Roho avooreraa amakanisa!

Ibarwa ku Likanisa liveeye Filadefia

⁷ “Ng'odera engelosi wi likanisa liveeye Filadefia: “Yaga nigo amakuva ga uyu oveeye umutakatifu, nu wi ligali. Aveeye nu lufungu lwali lwa Daudi, kandi cha oyo amali kwigura sihaveeye ho nunyala kuhana mba, gwa mali kuhana sihaveeye ho nu unyala kwigura mba.

⁸ Manyi imiyinzi jijo. Henza, mali kuviika ikiliango ichalamu imbiri woovo, kandi sihaveeye ho nu unyala kukihaana mba. Manyi ndi oveeye ni zinguru zingekeke, na walonda likuva liange, kandi si wayambakana lieta liange mba.

⁹ Henza! Ndakora umuganda gwa Setani, vavola vaveeye Vayuda, navuzwa sivaveeye ndio mba giligali vavehaa; ndavakora vaze kusigama ha virenge vivio, kumanyia ndi inzi nguyaanzaa.

¹⁰ Kigira walinda lilaga liange nuwikuzira ndakulinda mu ing'inga yo kogerizwa yiza ku lirova liosi kogeriza yavo avamenyaa mulio.

¹¹ Nziza vwangu. Ugumiri vudinyu icha oveeye nacho. Atava ho nu mulala uhiraa itaji yooyo yi liguuta.

¹² Uyu ugutaa uvulwani, ndamukora itiiru mu Litembeli lia Nyasaye wange. Sialazia ichova walio kandi mba: ndang'oda kuye lieta lia Nyasaye wange, kandi lie lidaala lia Nyasaye wange, Jerusalemi imbia, likanga kutura mwigulu ku Nyasaye wange. Kandi ndang'oda kuvo lieta liange lihia.

¹³ “Uyu oveeye nu gutu, ahuliri aga Roho avolera amakanisa.

Ibarwa ku likanisa liveeye Laodikia

¹⁴ “Ng'odera engelosi wi likanisa liveeye mu Laodikia: “Yaga nigo makuva kutura ku Amini, umulolekizi umusuuvirifu nu wi ligali, oveeye uvutangiliru vwi vilombe viosi via Nyasaye yalomba.

¹⁵ Manyi miyinzi jijo. Sioveeye muziliru anoho muhiu mba. O! Vwakaveeye vulahi ulavamuziliru anoho umuhiu!

¹⁶ Navuzwa kigira oveeye ichiiya, na sioveeye umuhiu anoho umuziliru, ndakutuza utuli mu munwa gwange.

¹⁷ Ivi ovola, ‘Inzi mbeeye umutugi, kandi simbeeye ni lienya kindu.’ Navuzwa siumanyi kuli oveeye novovereri! Oveeye mudaka, umboku, kandi chahonyo!

¹⁸ Kulwa yaga, ngovolera amakuva yaga nukukwiganihiza ndi uguli ku inzi izahabu isiyiiywi nu muliru, uduuki kuva umutugi. Gula kandi zinguvu zindavu ku inzi uduuki kwivika, kunangwa uduuki kufuma izisoni zie chahonyo chicho. Uguli kandi ku inzi ulunyasi lwa maguta lwu kuvaka ku zimoni zizio kunangwa uduuki kolola.

¹⁹ Mundu wa inzi nyanza, mugondokeraa nu kumuha amageri. Ove nu vugulu nu kwiganira utuli muvwoni vuvwo.

²⁰ Henza, singiyi ha kiliango nzigulihizaa. Umundu woosi naava naahulira mwoyo gwange nukunzigulira kiliango, ndingira munyumba yeeye, nduuki kulia harara naye kandi naye alie harara ninzi.

²¹ Yavo avaguutaa, ndavaha uvunyali vwu kwikala ahimbi ninzi mu endeve yange yu vwami, kuli inzi ndaguuta, nu kwikala harara na Baba mu endeve yeeye yu vwami.

²² “Uyu oveeye nu gutu, ahuliri aga Roho avolera amakanisa.”