Likunula 2 - KITABU KITAKATIFU

¹ “Ng'odera engelosi wi likanisa lia Efeso: Yaga nigo amakuva ga uyu ugumiyi zing'ereng'ani saba mu mukono gwigwe umulungi kandi ogendaa hagati hi ivinaara vie zitaya saba, vie izahabu avoora.

² “Inzi manyi vikolwa vivio viosi, nuvugulu vwa oveeye navwo ku miyinzi, ni liekuzira liilio. Kandi manyi ndi siunyala kwikuzira ku avandu vadamanu mba. Umali kogeliza kandi yavo avilangaa vaveeye avatumwa, navuzwa sivaveeye ndio mba. Kandi umali konyoora ndi vaveeye vagadi.

³ Ivi oveeye umwikuziri kandi umali kusalira kigira inzi, navuzwa siwakuza mwoyo mba.

⁴ “Navuzwa yaga nigo gandolaa madamanu ku ivi: Siunyaanza kalunu kuli wanyanzaa mu litanga mba.

⁵ Wizulizi ha watura niwaguluka. Wiganiri na oleke uvwoni vuvwo, ma wirane kokora miyinzi ja wakola mulitanga. Niiva si uliganira, ndaaza ku ivi vwangu, nu kutuliza ikinara chicho chi zitaya aha keveeye.

⁶ Navuzwa ngwizominyaa ku likuva lilala yili: Ivi udunyiraa miyinzi ja vandu va Vanikolai ava inzi ndunyiraa.

⁷ “Oyo oveeye nu gutu, ahuliri aga Roho avolera amakanisa! “Uyu ugutaa, ndamuha uvunyali aduuki kulia amakuyu gu musaala gwi livamwoyo, ogoveeye mu mulimi gwa Nyasaye.

Ibarwa ku likanisa liveeye Simarina

⁸ “Ng'oderaa engelosi wi likanisa liveeye mu Simarina: “Yaga nigo amakuva ga uyu oveeye litanga kandi limaliriza, uwakuza kandi naava mwoyo. Avoora.

⁹ Inzi manyi vudinyu vuvwo, kandi manyi uvudaka vuvwo, navuzwa mu giligali ivi oveeye umutugi! Manyi amanyego ga yavo avevooraa vaveeye Avayuda; navuzwa sivaveeye ndio mba. Vaveeye vuzwa muganda gwa Setani.

¹⁰ Utatia ivindu vienya kukugwira: Henza, ngovolera, Setani aveeye ahimbi kuviika valala ku munyi mu uvuhambe, muduuki kugerizwa; kandi mulava ni lidambizwa ku amadiku likomi. Ove umusuuvirifu ku inzi kuduuka kali ku likuza; nainzi ndakuha itaji yi livamwoyo.

¹¹ “Uyu oveeye nu gutu, ahuliri aga Roho avolera amakanisa. “Uyu ugutaa sialanyoola kivi chi likuza lia kaviri mba.

Ibarwa ku likanisa liveeye Perigamo

¹² “Ng'odera engelosi wi likanisa liveeye Perigamo: “Yaga nigo amakuva ga uyu oveeye ni kivavi ichuugi zimbega ziombi.

¹³ Inzi manyi homenyi, ha Setani aveeye ne endeve yu uvwami vwivwe. Navuzwa oveeye wa giligali ku inzi. Ivi si waleka lisuuvira liilio mu inzi mba kali mu amadiku ga Antipa mulolekizi wange umusuuvirifu yitirwa hagati hinyu aha Setani amenyaa.

¹⁴ Navuzwa mbeeye na amakuva makekeeke madamanu ku ivi: vaveeye ho na avandu valala ku munyi avalondaa amigizu ga Balaamu, uwigiza Balaki kuli anyala kwimilira vandu Vaisiraeli muvwoni lwa yavavolera valie ichukulia kehevwa imisaambwa kandi kokora voheyi.

¹⁵ Oveeye kandi na avandu valala avalondaa amigizu ga Vanikolai.

¹⁶ Kalunu wiganiri kutura mu vwoni vuvwo. Nuuva nutiganira, ndaaza vwangu ku ivi nu kulwaana na avandu yavo ni kivavi kitulaa mu munwa gwange.

¹⁷ “Uyu oveeye nu gutu ahuliri likuva lia Roho avolera amakanisa! “Yavo avaguutaa ndavaha amaana gavisiywi, kandi ndavaha ligina lilavu, ling'odeywi ku lieta lihia, liu umundu, atamanyi nataveeye uyu oheveywi ilieta zana.

Ibarwa ku likanisa liveeye Ziatira

¹⁸ “Ng'odera engelosi wi likanisa liveeye Ziatira: “Yaga nigo amakuva gu Mwana wa Nyasaye, izimoni zizie ziakaa kuli lomemo lwumuliru, kandi wi zinduvatiru zizie zing'ereng'ana kuli mugasa gusiyiywi.

¹⁹ Inzi manyi vikolwa vivio. Manya vuyanzi vuvwo, lisuuvira liilio, kandi uvutumiki nu uvwikuziri vuvwo. Kandi manya vulahi ndi imiyinzi jijo jienyima jiviti jukutanga.

²⁰ “Navuzwa mbeeye ni likuva lidamanu liokovoola ku ivi. Wikuzira ku Jezebeli, uwilangaa umwene mutumwa wa Nyasaye. Mu amigizu geege agotizaa avatumikiri vange kokora ovoheyi, kandi kulia iviukulia vihaaniywi ku vifananyi.

²¹ Mali kumuha vwiyangu aduuki kwiganira ovoheyi vwivwe, naye siyenya kwiganira no koleka ovoheyi mba.

²² Henza, ndamusiuva ku kidali cha valwaye; na yavo vosi avaheyaa naye, ndavakora vasaliri ligali. Ndakora ndio nivatiiganira no koleka vikolwa viavo ividamanu via vakora naye.

²³ Nainzi ndiita valondi veve, kandi amakanisa goosi galamanya ndi ndaamanya zing'anagani zia vuli mundu harara ni lienya lilie. Ndatunga vuli mulala winyu kolondekana ni likora liayaakola.

²⁴ “Kalunu mbolera munyi vosi avatigaye mu Ziatira, kuduuka ku vosi avatalondaa amigizu madamanu yaga, kandi munyi avaavura kwiga ivindu via vandu vandi valanga ivindu ‘Via Setani viu mululiva.’ Inzi muvooleraa ndi, sindaviika vuliduhu vundi ku munyi mba.

²⁵ Navuzwa mugumiri cha muveeye nacho kuduuka lwa ndakaaze.

²⁶ Yava avaguutaa, kandi yava avalindaa nu kugumira imiyinzi jange kuduuka ku keheri, ndavaha uvunyali ku izihiiri ziosi.

²⁷ Naye alavamiha ni imbimbu yi kivia; alavaduvulanyia kuli umulongi yatanyia inyingu iluha igwa ivijonjo kuli inzi ndaavugura zinguru kutura ku Baba wange.

²⁸ Kandi ndio ndamuha eng'ereng'ani ya mugamba.

²⁹ “Uyu oveeye nu gutu, ahuliri aga Roho avooreraa amakanisa!