Likunula 19 - KITABU KITAKATIFU

¹ Inyima wa yaga, ndaahulira umufumu gwu mwoyo munene gwi kiduma kenene cha avandu mwigulu, nivavoora, “Haleluya ovohonyi, nu vukumi, ni zinguru viveeye via Nyasaye wiitu!

² Likalaga lilie liveeye lie ligali kandi lirungi! Ukalagiyi umukali liraya munene, uwaali naagotiza lirova no voheyi vwivwe; Nyasaye umali kumuha amageri kigira yita avatumikiri veve.”

³ Kandi vaahanzuka haali kaviri nivavoora, “Haleluya! Umwoki gwu muliru gusaambanga lidaala linene lia Babiloni, gulavuuya mihiga ni mihiga. Amini.”

⁴ Avakulundu sirini na ine, ni vilombe viveeye mwoyo vine, vaagwa hasi mamumama, nu kusigamira Nyasaye, uwikaye kondeve yu vwami, nivavoora, “Nyasaye yizominywi! Amini!”

Lisavo lie keserero chu Mwana wi Ligondi

⁵ Maku umwoyo gwatura mundeve yu vwami, nigovoora, “Mwizominye Nyasaye wiitu, munyi avatumikiri veve vosi, kandi munyi avandu vamutiizaa, mwombi avakeekeke na vanene.”

⁶ Ndaahulira kandi umwoyo gwi kiduma kenene, kandi kuli gwa amazi manene gafuumaa, kuli lihirigana linene lie inguba. Ndaahulira mioyo yijo nijivolaa, “Nyasaye yizominywe! Nyasaye wiitu Wuvunyali aveeye mwami.

⁷ Gendi ku sangale kandi kuyaanze; gendi kumwizominyi kandi kumuhe uvukumi vwivwe! Kigira keserero chu Mwana wi Ligondi kiduuki, kandi umwiha weve wetegeki.

⁸ Aheveywi zinguvu zindavu kwivika ziveeye vikolwa vilungi via vandu va Nyasaye.”

⁹ Engelosi yambolera kandi, “Ong'ode amakuva yaga: Vaveeye nuvugasu yavo avalangiywi vazie mu lilia lie keserero chu Mwana wi Ligondi.” Yambolera kandi, “Yaga gaveeye amakuva giligali ga Nyasaye.”

¹⁰ Ndaagwa hasi mamumama havirenge vivie, kumusigamira. Navuzwa, yambolera, “Utakola ndio mba! Inzi mbeeye vuzwa mutumikiri wacho, kandi uwavamwavo vovo, yavo vosi avagumira agiligali ga Yeso yalolekiza. Usigamiri Nyasaye!” Kigira agiligali ga Yeso yaavuula, nigo agadinyirizaa avaporofeti.

Umundu uwikala ku Ibarasi indavu

¹¹ Maku ndaalora ligulu ni liigulikaa; kandi ndaalora, ibarasi indavu. Muhiri wayo alangangwa Umusuuvirifu nu wi Ligali. Akalagaa kandi muvulungi kandi alwaana iliihi lilie.

¹² Izimoni zizie ziveeye kuli olomemo lwu muliru. Yiviika izitaji zinyingi ku umutwi gwigwe. Yaali ni lieta ling'odeywe, kuye, kandi sihaveeye ho nu mundu umanyi cha livoora nataveeye oyo umwene.

¹³ Yaali ni yiviiki inguvu iyaali ni yiniywi mu masahi, ni ilieta lilie liveeye “Likuva lia Nyasaye.”

¹⁴ Avasikari va amahi gu mwigulu vaamulonda, ni vanini ku zibarasi zindavu. Vaali ni viviiki zinguvu zindahi, zindavu.

¹⁵ Kivavi ichuugi chatula mu munwa mwimwe, cha liguutira zihiiri. Alavamiha ni imbimbu yi kivia. Aladuvaga kandi iwaini mu kiminilu chi iwaini yu uvululu vwu uvutima vwa Nyasaye Wuvunyali.

¹⁶ Ku iganza yeeye nu ku litango lilie, kwaali nikong'odeywe ilieta “Mwamihi wa avamihi, kandi mwami wa avami.”

¹⁷ Ndaalora engelosi indala nisingiyi ku liuva. Yahanzuka nu mwoyo munene nevolera amanyonyi goosi agabulukaa mu uvwerefu, “Hambi muvugane harara ku lilia linene lia Nyasaye!

¹⁸ Hambi mulie zinyama zie miviri ja avami, ni zia avanene va avasikari, zinyama zia avandu vizingulu, zie zibarasi, zia yavo aviikalaa kuzio, zia avandu vosi, avatugwa na vavoholore, kandi avakeekeke na vanene.”

¹⁹ Maku ndaalora kandi iking'ang'a, avami vi lirova na amahi gaavo, ni vavugani harara kulwaana iliihi na uyu uwikaye ku ibarasi, kandi ku amahi geege.

²⁰ Iking'ang'a zana chagumirwa harara nu umuporofeti wo vovehi waali naakori ivilolekizu imbiri weve. Yatumikira ivilolekizu yivio ukugaada avandu vaali nu muhuri gwi king'ang'a, na yavo avasigamira kifananyi chacho. Iking'ang'a nu umuporofeti wo vovehi vasuvwa munyanza yu muliru iyakaa nu kuvasaamba ni kibiriti nivaveeye mwoyo.

²¹ Amahi gaavo giitwa ni kivavi ikituraa mu munwa gwa uyu wahila barasi. Amanyonyi goosi gaalia zinyama zie miviri jaavo.