Likunula 17 - KITABU KITAKATIFU

¹ Mulala ku zingelosi saba avaari ni zibakuli saba yaza, ku inzi navoora, “Hamba yinu, ngumanyie likalagirwa liu mukali wa malaya munene, lidaala iliumbakwa ahimbi ni imigera minyingi.

² Avami vi lirova liosi vaakora ovoheyi naye, kandi avandu vamenya mu lirova avahambiki kutura ku linwa iwaini yo ovoheyi vwivwe.”

³ Kunangwa ndizulwa na Roho kandi engelosi yang'inga niyambira mu changalangwi. Ndaalora mukali niyikaye ku king'ang'a ichakanyu. King'ang'a yicho chaali chizuuyi amita go konyega Nyasaye, agang'odwa ku muviri gwacho gwosi. Iking'ang'a zana chaali ni mitwi saba kandi ni zinziga likomi.

⁴ Umukali oyo yaali niyiviiki inguvu yi ligondo liu muzambarao kandi inzakanyu. Yaali niyiisiahi ni zahabu, kandi amagina amalahi guvuguli. Yaali ne kekombe chi zahabu mu mukono gwigwe ni chizuuyi vuvihilirizi kandi ovoheyi vwivwe.

⁵ Mu uvweni vwivwe: yaali ni lieta ling'odeywi lie kivuni chalio chaviswa, “Babiloni enene mama Munene wa malaya goosi kandi mama wu vuvihilirizi vwi lirova.”

⁶ Ndaalora kandi umukali zana nahambiki amasahi ga vandu va Nyasaye, kandi gayavo viitwa kigira vaali vasuuvirifu ku Yeso. Lwa ndaamulola, ndaali niligenya linene ligali.

⁷ Navuzwa engelosi yandeva, “Kigira ki ogenyaa? Inzi ndaamutivulira kivuni cha gimbisu yu mukali uyu kandi agi king'ang'a kimugingi yiki keveeye ni mitwi saba, kandi zinziga likomi.

⁸ Iking'ang'a cha walola kila chaali mwoyo maziambiri, navuzwa sikeveeye mwoyo kalunu mba. Kandi keveeye ahimbi kutura mu gehena, navuzwa kiladuuka mu lidivizwa. Avandu vamenya ku lirova, ava amita gaavo gatang'odwa mu kitabu chi livamwoyo, lirova nilikikiri kolombwa, valagenya muno ulwa valora king'ang'a yicho chaali mwoyo lulala ulwimbiri na kalunu sikeveeye mwoyo mba. Navuzwa kilaloleka kandi.

⁹ “Yaga geenya vogeri kandi limanya lidukiru. Imitwi saba jiveeye vigulu saba viu mukali yikalaa ku. Vaveeye kandi avami saba.

¹⁰ Vatano kuvo vamali kudiva, na mulala aveeye ho achamiiha, kandi wundi akikiri kuduuka. Navuzwa lwa aliduuka, gamudukira yamihi ku ing'inga engekeeke vuzwa.

¹¹ Kandi king'ang'a chaali mwoyo ulwimbiri, na sikeveeye mwoyo kalunu mba, nicho ekeveeye umwami wa munane oveeye mwoyo mulala ku yava saba, na azizaa kudivizwa.

¹² “Zinziga likomi zia walola ziveeye avami likomi, avakikiri konyoora zinguru ziu kutanga iliamiiha, navuzwa avaazaa vahevwe uvunyali kwamiiha kuli avami, ku ing'inga yi isa ndala harara ni king'ang'a.

¹³ Likomi yavo vaveeye nu mwoyo mulala kandi valahaana ku king'ang'a uvunyali vwavo ni zinguru ziavo ziosi.

¹⁴ Avami likomi zana harara ni king'ang'a valalwaana Mwana wi Ligondi, navuzwa Mwana wi Ligondi, harara na valondi veve, avayalanga, avayatovola kandi avasuuvirifu; alavaguuta kigira aveeye Mwami wa avamihi.”

¹⁵ Engelosi yambolera, “Amazi ga walola, gu umukali liraya yikaye ku, gaveeye vivala, avandu, zihiiri kandi zinimi.

¹⁶ Izinziga likomi zia walola, kandi iking'ang'a valadunyira umukali liraya. Valavugula kindu choosi cha aveeye nacho nu kumuleka chahonyo. Valalia inyama yu muviri gwigwe kandi valamusaamba nu kumudiviza ligali nu muliru.

¹⁷ Nyasaye umali kugaviika mu mioyo jaavo ilienya kokora uvulariri vwivwe nu kuhulirizana aveene ku vene, nu kuha king'ang'a yiki uvunyali vwavo kwamiiha kuduuka lwi likuva lia Nyasaye lilitwekizwa.

¹⁸ “Umukali wa walola aveeye lidaala linene zana, iliamiiha avami vi lirova.”