Likunula 16 - KITABU KITAKATIFU

¹ Ndaahulira mwoyo munene ni gomolomaa kutura mu Litembeli, ni govoolera zingelosi saba nigovoora, “Tuli muzie kusundura zibakuli saba ziu uvutima vwa Nyasaye ku lirova!”

² Maku Engelosi wukutanga yazia nisundula ichaali mu bakuli yacho ku lirova. Zingwagu zindamanu ligali kandi zinduru zialoleka ku yavo avaari nu muhuri gwi king'ang'a harara na yavo avaari nivasigamiyi ikifananyi chacho.

³ Engelosi ya kaviri yasundula ichaali mu bakuli yacho mu inyanza. Inyanza nayo yaali kuli amasahi kuli agumukuzu, kandi ivindu viosi iviali mwoyo munyanza viakuza.

⁴ Engelosi ya kavaga yasundula ichaali mu bakuli yacho ku migera ni visinukiru via amazi, navio viagwa amasahi.

⁵ Ndaahulira kandi engelosi umulindi wa amazi navoora, “Likalaga lia umali kuhaana liveeye lirungi. Ivi oveeyeho, kandi wa liho, ivi mutakatifu.

⁶ Kigira, vaatahiza amasahi ga avatakatifu vovo na gavaporofeti, na ivi umali kuhaana kuvo amasahi vanwi, nindio vaduukana vakolwe.”

⁷ Ndaahulira kandi umwoyo nigutura mu vwali nigovoora, “Ligali, O, Mwami Nyasaye Wuvunyali, amaduywa ga watuma gaveeye amalungi na giligali.”

⁸ Engelosi wa kane yasundula ichaali mu bakuli yacho ku liuva. Liuva nalio liahevwa zinguru kusaamba avandu nu vuhiu ovonene ligali. Liuva liagwa muliru ligali ni lisaamba avandu nu uvuhiu vwalio.

⁹ Avandu vasaambwa ligali nu kuhaka. Vaanyega lieta lia Nyasaye oveeye ni izingulu ku amaduywa yaga. Navuzwa vasuura kwiganira no koleka vwoni vwavo, nu kuha Nyasaye ilizominywa.

¹⁰ Engelosi ya katano yasundula ichaali ku bakuli yaho kondeve yu uvwami vwi king'ang'a. Kisundi chakunika uvwami vwivwe na avandu viluma zinimi ziavo kigira uvusaliri.

¹¹ Kigira uvusaliri, ni lizuunwa lie zingwagu ziavo, vaanyega Nyasaye wu mwigulu, navuzwa siviganira mba.

¹² Maku engelosi ya sita yasundula ichaali mu bakuli yacho ku umugera munene gulangwa Efurate. Amazi gagwo gaakama, nandio, inzira yeetegekizirwa avami avatulira ivugwi.

¹³ Ndaalora kandi roho jivaga midamanu ijifaanaa amakere nijitula mu munwa mwo ogoyoka, nu mwi king'ang'a kandi mwo umuporofeti wo ovovehi.

¹⁴ Kigira jiveeye roho ja mademoni, ijikolaa vilolekizu. Roho midamanu jivaga yigi jizizaa ku avami vosi vu mu lirova liosi, kuvavuganyia harara kigira uvulwani vwi Lidiku lie Likalaga lia Nyasaye Wuvunyali.

¹⁵ Mwami avoora, “Henza! Nziza kuli umwiivi!” Aveeye nuvugasu umundu ulindilira, nu kwivika zinguvu zizie ku avuli kogendagenda chahonyo, ma alole zisoni imbiri wa avandu.

¹⁶ Kandi imioyo midamanu jaleeta avami vanene harara ahalangwa mu Luheburaina Arimagedoni.

¹⁷ Engelosi ya saba yasundula ichaali mu bakuli yacho ku zimbuza. Mwoyo umunene gwa Nyasaye gwatura mu Litembeli, nigovoora, “Keheri kimali kuduuka!”

¹⁸ Viali ho zimbeni, zinguba ni lidegera lie kivala kandi yili liali lidegera linene lie lirova ilikiri kuva ku ho kutura ing'inga Nyasaye yalomba umundu mu lirova. Yili liali lidegera lie lirova linene ni lidamanu kuvita agandi goosi.

¹⁹ Lidaala linene lia Babiloni liavukanywa mu vidonye vivaga, kandi amadara gi izihiiri gaasambwa. Nyasaye yizuliza lidaala lia Babiloni naaliha kekombe chi iwaini linwi, amageri gu uvutima vwivwe ovonene.

²⁰ Ivisulu ni ivigulu viosi viagota.

²¹ Imbura ya amagina enene yakuba; vuli ligina liali nu uvulitu vwi zikilo 50 gagwira vandu kutura mwigulu, vaanyega Nyasaye, kigira amaduywa gi imbura ya amagina yeyo liduywa lie imbura ya amagina yilio liali lidamanu ni liu kutihiza ligali.