Likunula 12 - KITABU KITAKATIFU

¹ Kelolekizu kenene chokogenyia chaloreka mwigulu. Yaali ho numukali wi inguvu yeeye yaloleka kuli liuva, numweli gwaali isi wi virenge vivie. Kandi yavikwa itaji yi zing'ereng'ani likomi na ziviri kumutwi gwigwe.

² Yaali ninda niyenya kwivura; uvuzunu nu uvusaliri vwi lilumwa vwa mulomba nalira ligali.

³ Kelolekizu kindi chokogenyia chaloreka mwigulu. Henza, gwaali ho ogoyoka gonene gwakanyu, ni mitwi saba kandi ni zinziga likomi; ku mitwi jagwo gwaali ni zitaji kandi zisuywa saba.

⁴ Mukira gwagwo gwakulula ku lirova kidieli kilala ku vivaga vie zing'ereng'ani ziu mwigulu. Ogoyoka zana gwa singira imbiri wu mukali uyu uwaali ahimbi kwivura, ku guduuki kumira mwana ing'inga yiivulwa.

⁵ Maku mukali yivula mwana muyaayi, uliva nu uvunyali kwamiiha zihiiri ziosi zie lirova ni mbimbu yi kivia. Navuzwa mwana oyo yavugurwa vwangu nukuhirwa ku Nyasaye uwikala kondeve yeeye yu uvwami, ogoyoka nigukiri kumumira.

⁶ Umukali oyo yirukira mwigendanyama, havundu ha Nyasaye yaali namulombeeye alindirwi ho ku ing'inga ya madiku 1,260.

⁷ Ahene yaho uvulwani vwatulira mwigulu. Mikaeli, harara ni zingelosi veve, valwaana nogoyoka zana, nagwo harara ni zingelosi ziagwo gwavalwaana.

⁸ Navuzwa ogoyoka yigwo gwa guutwa harara ni zingelosi vagwo sivanyoola ovogono vwavo mwigulu mba.

⁹ Ogoyoka gonene yigwo gwagululwa hasi ku lirova harara ni zingelosi vagwo kutura mwigulu. Nagwo gulaangwa enzoka ya kale; kandi gulaangwa Ibilisi kandi Setani; uyu ugadaa vandu avu mu lirova vosi.

¹⁰ Ndaahulira kandi mwoyo munene mwigulu nigovoora, “Kalunu ovohonyi vwa Nyasaye wiitu vumali kuduuka! Kalunu Nyasaye umali kumanyia zinguru zizie kuli Mwami Munene! Kalunu Mesia weve umali kumanyia uvunyali vwivwe ku lirova liosi! Kigira Setani sialasingira imbiri wa Nyasaye wiitu nu kuyaala avaamitu mbasu nu vuduku mba! Setani umali kukungwa kutura mwigulu nu kwagulukizwa hasi!

¹¹ Avaamitu vamali kuguuta Setani kuvitira mu amasahi gu Mwana wi Ligondi, kandi ni likuva lie ligali lie Ivangeri yaavalandiza, kandi vavugilira kuhaana livamwoyo liavo kukuza kigira lisuuvira liavo mu Yeso Kristo.

¹² Kunangwa musangare, munyi vilombe viosi vimenya mwigulu. O, vayaye, ikivi nu uvusaliri viveeye ku lirova nu kunyanza! Kigira, lidemoni umali kuuza ku munyi; aveeye nu uvutima vonene kigira umanyi aveeye ni ing'inga engekeeke vuzwa.”

¹³ Lwo ogoyoka zana gwalola ndi gwaguluywi ku lirova, gwatanga kolondelera nu kuhigira mukali uwaali niyiivuuyi umwana muyaayi.

¹⁴ Mukali yahevwa izimbaha ziviri zie indizu enene, aduuki kuburukira nu kwirukira mwigendanyama havundu halindirwi ku mihiga 3.5 kutura kogoyoka gonene ugwaakanyu.

¹⁵ Ogoyoka gonene zana yigwo gwaaluka amazi kutura mu munwa gwagwo kuli umugera kolondelera mukali uyu kunangwa aduuki kuhilwa na amazi manene yago.

¹⁶ Navuzwa lirova liakonya mukali. Kandi liakunula munwa gwalio ni limira mugera gwa amazi go ogoyoka gwatuza kutura mu umunwa gwagwo.

¹⁷ Ogoyoka gonene yigwo gwavihilirwa mukali uyu ligali niguzia kulwaana ni ivisukulurwi viu mukali viatigala, yavo avagumira amalago ga Nyasaye, kandi vaveeye avasuuvirifu ku lilolekiza lia agiligali agavuulwa na Yeso. Ogoyoka yigwo gwasingira ku lujinga lwi inyanza.