Likunula 11 - KITABU KITAKATIFU

¹ Kunangwa ndahevwa kidundu chaali kuli imbimbu yo kogera, kandi nimbolerwa, “Singira ubiimi Litembeli lia Nyasaye, nu vwali kandi uvalizi yavo vosi avasigamiraa Nyasaye mulio.

² Navuzwa oleke kubima umugizi gwi Litembeli. Kigira yigu goheveywi avandu vi zihiiri, yava valaduvaga lidaala litakatifu ku lwi mieli arubaini na mbiri.

³ Ndakatumi avalolekizi vange vaviri ni viviiki amagunia navo valilwaaze likuva liu mwami ku amadiku 1,260.”

⁴ Yava vaveeye imisaala giviri ja mizeituni, kandi vinara viviri vie zitaya, visingira imbiri wu Mwami wi lirova.

⁵ Umundu niyenyaa kuvasaliriza, muliru gutulaa mu minwa jaavo nu kudiviza avasigu vaavo kandi, mundu woosi ogeriza kuvasaliriza gamudukira kwitwa munzira yiyi.

⁶ Avandu yava vaveeye ni zinguru ziu kuhana ligulu; kunangwa imbura ivuli kukuba mu madiku go voporofeti vwavo. Vaveeye ni zinguru kandi kugirung'anyia amazi kugwa amasahi, nukudiviza kivala nu vulwaye vudamanu zing'inga ziosi zia vayaanza.

⁷ Lwa vamala lilwaza liavo, king'ang'a kitulaa mugehena kilavalwaana, nu kuvaguuta, kandi kuviita.

⁸ Miviri jaavo jilakalambiri kunzira yi lidaala linene ahu Mwami wavo yavambirwa. Lidaala yili liveeye kifananyi chu mu Roho ku Sodoma anoho Egebeti.

⁹ Ku madiku gavaga ni nusu, avandu kutura mu zihiiri ziosi numu zinimi ziosi, ni zihiiri ziosi, noku avandu vosi valahenza ku miviri jaavo mikuzu kandi sivalivugilira miviri jaavo mikuzu jiyavilwi mu vilindwa mba.

¹⁰ Avandu vamenya mu lirova, valayanzizwa nu kusangara ku likuza liavo kandi valahaanilana vihaanwa kigira avaporofeti vaviri yavo avaleeta uvusaliri ovonene ligali ku avandu vamenya ku lirova.

¹¹ Inyima wa madiku gavaga ni nusu yago, umwika uguhaanaa livamwoyo, ugutulaa ku Nyasaye gwingira muvo. Navo vasingira ku virenge viavo. Uvuti ovonene vwagumira yavo vosi avavalola.

¹² Kunangwa avaporofeti vaviri yavo vahulira mwoyo munene kutura mwigulu nigovavoolera, “Hambi igulu yinu.” Navo vanigira mwigulu mu lilesi, avasigu vaavo nivavalolaa.

¹³ Ku ing'inga yene yeyo, liali ho ni lidegera linene ligali lie lirova. Ikidieli kilala ku likomi chi lidaala chaagwa hasi, kandi avandu 7,000 viitwa ni lidegera lie lirova yilio. Avandu vatigara, vaali nu vuti ovonene ligali; kandi vakuminya Nyasaye wu mwigulu.

¹⁴ Kivi cha kaviri kimali kuvita, navuzwa kivi cha kavaga kiiza vwangu.

Kisiriva cha saba

¹⁵ Kunangwa engelosi wa saba yakuba kisiriva chiche kandi ndaahulira zingelosi nivamoromaa uvudinyu ligali mwigulu nivavoora, “Izingulu ziu kwamiiha ku lirova ziveeye ziu Mwami wiitu Nyasaye, kandi zia Mesia weve; Naye alamiiha imihiga ni mihiga.”

¹⁶ Maku avakulundu sirini na ine, aviikalaa ku izindeve ziu uvwami imbiri wa Nyasaye, vaagwa mamumama nu kusigamira Nyasaye

¹⁷ nivavoora: “Kusandizaa ivi O, Mwami Nyasaye Wuvunyali, oveeye ho na uwaali ho! Kukusandiza kigira uvuguyi izingulu zizio zinene ma wamihi!

¹⁸ Avandu vi zihiiri vaali nu uvutima, kigira ing'inga yu uvutima vuvwo iduuki, ing'inga ya avakuzu vakalagirwa imali kuduuka. Ing'inga iduuki yu kuhaana madanyi ku avatumikiri vovo, avaporofeti, kandi avandu avoovo vosi, yavo vosi avakoheezaa uluyali, avanene na vakekeeke vosi harara. Ing'inga iduuki yu kudiviza yavo avononyia lirova!”

¹⁹ Litembeli lia Nyasaye iliveeye mwigulu ligulwa. Lisandugu Litakatifu lia amalago geege lie lilagana lialoleka. Maku, liali ho nilihemahema lie zimbeni, ni mioyo, ni lihirigana lie zinguba, ni lidegera lie lirova, ni imbura ya magina manene.