Kyavalevi 9 - KITABU KITAKATIFU

Haruni Ahaanaa Visiuviliru

¹ Ku lidiku lia munane, Musa yalanga Haruni harara na vayaayi veve, na vimiliri va Isiraeli.

² Yavolera Haruni, “Vugula kemoli kigiriki vugira imbara kuva kihanwa chicho chu uvwoni kandi ligondi limigu vugira imbara kuva kihanwa chicho chu kusambwa, ma uvihaane imbiri wa Yahova.

³ Maku ovoolere avandu va Isiraeli, muvuguli imburi ekore kuva kihanwa chu uvwoni, ekemoli chu muhiga mulala ni ligondi liu muhiga mulala vugira imbara, kuva kihanwa chu kusambwa.

⁴ Na ulahaana igiriki ni ligondi limigu kuva kihanwa chi mirembe ku Yahova, harara ni kihanwa chu vuswage ni vuzuganyiywi mu na maguta. Kuduuka vakole ndio kigira Yahova alaloleka ku munyi kalunu.”

⁵ Valeta vindu viosi via Musa yaali nalagi imbiri wi Lihema, avandu vosi visuundi himbi nukusingira Yahova.

⁶ Kunangwa Musa yavoola, “Yiki nicho kindu cha Yahova amulagi mukore, kunangwa vukumi vwa Yahova vuduuki kololeka ku munyi.”

⁷ Maku Musa yavolera Haruni, “Wisundi ku uvwali uhaane kihanwa chicho chu uvwoni, nikihaanwa chicho chu kusambwa kiduuki kutulizaho uvwoni vuvwo kandi uvwoni vwa avandu. Uhaane kihanwa yiki kutulizaho uvwoni vwa avandu, kuli Yahova yalaga.”

⁸ Kunangwa Haruni yazia himbi ku uvwali, niyiita kemoli kigiriki chaali kihanwa chu uvwoni vwivwe mwene.

⁹ Avayaayi veve vamuleetera masahi, naye yiina mu kedete chiche naviika malala ku zinziga ziu uvwali. Yasundula masahi gatigala mu lwaalo lwuvwaali.

¹⁰ Yasambira itinya, zimbigu ningudumani indahi ligali yi kihanwa chu uvwoni ku uvwali, kuli Yahova yalaga Musa.

¹¹ Navuzwa yasambira inyama nekesero ichova wi lidaala.

¹² Maku yasiinza mutugu gwaali gwi kihanwa chu kusambwa. Avayaayi veve vamuletera masahi naye yaguuha ku zimbega ziosi ziu uvwali.

¹³ Navo vamuha vidonye vie kihanwa chukusamba sa kilala, harara numutwi; kandi yavisambira ku uvwali.

¹⁴ Yogiza vindu viu munda nivirenge vie inyima naavisambira ku uvwali kwigulu kwi kihanwa chukusambwa.

¹⁵ Haruni niyakamara, yahaana kihanwa cha avandu. Yavugula imburi yaali kihanwa chu uvwoni vwa avandu, naagisinza, ma nagihaana kigira uvwoni kuli yaali naakori ku kihanwa chiche mwene chu uvwoni.

¹⁶ Yahaana kandi kihanwa chukusambwa yakihaana kolondekana na malago.

¹⁷ Yahaana kandi kihanwa chu vuswage navugura luhi lulala lwu vusie, naavusambira ku uvwali komeeda ku kihanwa chukusambwa cha mugambazuri.

¹⁸ Haruni yasiinza igiriki ni ligondi limigu kuva kihanwa chi mirembe kigira avandu. Avayaayi veve vamuletera masahi, naye yaguuha ku zimbega ziosi ziu uvwali.

¹⁹ Navugura zitinya zie ligondi limigu ziosi, numusembe, nizitinya ziveeye ku vindu viumunda, nizimbigu, ningudumani indahi ligali,

²⁰ naviika ku inyama yi indasi, naavisambira ku uvwali.

²¹ Haruni yaleeta inyama yi indasi nivinama vienyima vio mukono mulungi kuva kihanwa chagimwa chu kuhaana imbiri wa Yahova. Kuli Musa yaali nalagi.

²² Lwa Haruni yaali niyakamara kuhaana vihaanwa viosi, yaginga makono geege igulu nagahenziza lovega lwa avandu vaali, navagasiza, ma niyiika kutura ku uvwali.

²³ Musa na Haruni vingira mu Lihema, na vaatura ichova kandi, nivagasiza avandu. Uvukumi vwa Yahova vwaloleka ku vandu vosi.

²⁴ Nonoho Yahova yatuma muliru kandi gwasamba kihanwa chukusambwa, ni zitinya ziali ku uvwali. Lwa vandu vosi vagolola, vahanzuka lwanga nivagwa hasi mamumama.