Kyavalevi 8 - KITABU KITAKATIFU

Livakwa Maguta lia Haruni na Vayaayi veve

¹ Yahova yavolera Musa,

² “Hila Haruni harara na vayaayi veve ha vwingiliru vwi Lihema liu kuvuganira mu na Yahova, na uvaleetaneri zinguvu ziavo ziu vusaalisi, amaguta gu kwivaka, kemoli kigiriki chi kihanwa chu uvwoni, magondi mamigu gaviri, ni kihinda chuvuchima vutaveeye mu namamera.

³ Maku ulange avandu vosi vavungi harara.”

⁴ Musa yakola kuli Yahova yamulaga. Lwa avandu vosi vaali nivavungi harara ha vwingiliru vwi lihema liu kuvuganira mu,

⁵ Musa yavavolera, “Yili ni likuva lia Yahova alagi likolwe.”

⁶ Musa yaleeta Haruni harara na vayaayi veve imbiri wi livugana liosi navasinga na mazi matakatifu.

⁷ Yavugula iganza ni kisibaho naviika Haruni, naamuvoha musibi mu kekenge chiche, namuviika inguvu yu vusaalisi, naagevoha nu musibi.

⁸ Kandi yamuvika isalamba yu mukiritu, kandi naviiki Urimu na Zumimu mu Isalamba yu mukiritu zana.

⁹ Yamuvika kelemba ku mutwi gwigwe, kandi imbiri wacho yavika ku mangirinya gi izahabu, eve kelolero kimanyia ligasizwa litakatifu; kuli Yahova yalaga Musa.

¹⁰ Kunangwa Musa yavugula maguta gukwivaka, naviika ku Lihema liu kuvuganilamu na Yahova ni vindu viosi viali mu, yavigasiza nukuvitakasa vive via Yahova.

¹¹ Yavugula ku maguta zana niyuha haali saba ku viju viosi viu kuvwaali, kandi ku zibenzeni kandi ku lwaalo lwayo, kuvigasiza nukuvitakasa vive via Yahova.

¹² Yavaka Haruni amaguta ku mutwi gwigwe malala ku maguta gu kuvaka, namugasiza kandi namutakasa kigira miyinzi ja Yahova.

¹³ Musa yaleeta vayaayi va Haruni na vaviika masadi, naavavoha misibi mu vikenge viavio, kandi navavika zikofia ku mitwi jaavo kuli Yahova yalaga Musa.

¹⁴ Maku Musa yaleeta kemoli kigiriki kuva kihanwa chu uvwoni; Haruni harara na vayaayi veve vaviika makono gaavo ku mutwi gwi kihanwa chu uvwoni.

¹⁵ Musa yaasinza igiriki zana, ma navugura malala ku masahi gayo, nekedete chiche nagavaka ku zinziga zie zimbega ziosi ziu uvwali kuvutakasa. Yamanya naasundula masahi gatigala ha lwaalo lwu uvwali. Munzira yiyi yavutakasa kigira vutumiki vwa Yahova.

¹⁶ Musa yavugula kandi itinya yoosi ku vindu viu munda viosi, ingudumani, zimbigu ziombi harara nitinya yazio, naavisambira ku uvwali.

¹⁷ Yavugula igiriki yaatigara yoosi, harara ne kesero, inyama yayo, nivindu viumunda komeeda ku mala naavisambira ichova wa hokososa kuli Yahova yaali nalagi.

¹⁸ Musa yaleeta ligondi limigu kuva kihanwa chukusambwa. Haruni harara na vayaayi veve vaviika makono gaavo ku mutwi gwalio.

¹⁹ Musa yita ligondi yilio, niyuha masahi ku zimbega ziosi zine ziu uvwali.

²⁰ Yakalanyia ligondi yilio mu vidonye kandi nasamba mutwi, vidonye nitinya yalio.

²¹ Vindu viumunda, nivirenge ni yogiza namazi. Yasamba ligondi yilio liosi ku uvwali kuli Yahova yaali nalagi. Kihanwa chukusambwa yiki chaali chi chukulia kandi lifunya mwayu gwacho gwayaanzizaa Yahova.

²² Maku, Musa yaleeta ligondi limigu liakaviri liukutakasa avasaalisi. Haruni harara na vayaayi veve vaviika makono gaavo ku mutwi gwalio.

²³ Musa yita ligondi zana, navugura malala ku masahi galio, nagaviika ku gutu gwu mukono mulungi gwa Haruni; nukukedete chiche kenene chu mukono mulungi kandi kokeno chiche kilungi.

²⁴ Maku Musa yaleeta vayaayi va Haruni imbiri kandi yavika masahi ku matu gaavo gu mukono mulungi, nokuvidete viavo vinene vie mikono milungi kandi ku vino vinene vie virenge viavo vilungi. Na Musa yuuha masahi gatigala ku zimbega ziosi zine ziu uvwali.

²⁵ Kunangwa, Musa yavugula itinya yoosi, nu musembe gwa maguta, nitinya yoosi eveeye ku vindu viu munda, ni ingudumani, nizimbigu ziombi harara ni itinya yazio, ni kinama chu mukono mulungi.

²⁶ Maku yavugula mugadi gutaveeye namamera, ugwali niguhaaniywi ku Yahova, ni imango yindi yalombwa na maguta, ni chabati kilala, naviviika ku zitinya ni kinama chu mukono mulungi.

²⁷ Yavika viukulia yivi viosi mu makono ga Haruni harara na vayaayi veve, vavihaane ku uvwali vwivwe kuli vihaanwa viagimwa ku Yahova.

²⁸ Maku Musa yavivugula kutura mu makono gaavo, naavisamba ku uvwali kwigulu kwi kihanwa chukusambwa kuli kihanwa chukutakasa. Yiki nikihaanwa chichukulia kihaanwaa ku Yahova, kiduuki kumufunyira mwayu gwukumuyaanziza.

²⁹ Musa yavugula inyama yi indasi nagihaana kuva kihanwa kidukiru ku Yahova: yiki chaali kedonye chi ligondi ichatakaswa, ichaduukana kuva cha Musa. Musa yakola vuli kindu kuli Yahova yaali naamulagi.

³⁰ Musa yavugula malala ku maguta gukutakasa kandi ku masahi kutura ku uvwali naaguha ku Haruni nokuzinguvu zizie kandi ku vayaayi veve nokuzinguvu ziavo. Munzira yiyi, yatakasa Haruni harara na vayaayi veve kandi ni zinguvu ziavo.

³¹ Kunangwa, Musa yavolera Haruni, harara na vayaayi veve, “Vuguli inyama yiyi mugedeke na mazi ha vwingiliru vwi Lihema liukuvuganira mu na Yahova, na mugiliiri ho nu mugadi goveeye mu kihinda chi vihaanwa viu kutakasa kuli Yahova yalaga navoora,

³² maku musaambe nu muliru inyama itigaaye nuvuchima vutigaye.

³³ Simulatula mu vwingiliru vwi Lihema liukuvuganira mu na Yahova ku madiku saba mba, kuduuka lwa madiku gi muruka gwi litakasa lienyu gaava nigagafwa.

³⁴ Yahova yakulaga kokole ga kumali kolola kalunu, kunangwa kuduuki kutulizaho uvwoni vwinyu.

³⁵ Kuduuka mumenye ha vwingiliru vwi Lihema liukuvuganira mu na Yahova mbasu nu vudiku ku madiku saba, na mukore ga Yahova amali kulaga. Ni mutakola ndio, mulakuza. Yaga nigo ga Yahova amali kundaga.”

³⁶ Kunangwa Haruni harara na vayaayi veve vaakora vuli kindu choosi cha Yahova yalaga kuvitira mu Musa.