Kyavalevi 6 - KITABU KITAKATIFU

Musaalisi ni Vihaanwa

¹ Yahova yahaana malago yaga ku Musa:

² Niiva mundu woosi alakola uvwoni kandi avuli kuva musuuvirifu ku Yahova, mu ligaada mutende weve, kigira kindu cha yahevwa kulinda, anoho chaalekwa mu vulindi vulahi, anoho ku limwivila, anoho kudambiza mutende weve.

³ Anoho namali konyoora chagota kandi agaade ndi siyakenyooye mba.

⁴ Lwu mundu akolaa vwoni kandi ava muhioli, kuduuka yiranyie cha mali kwiva, anoho kuvugura kuzinguru, anoho cha yahevwa kulinda vulahi, anoho vindu viagota ma nanyoora,

⁵ anoho kindu choosi cha yisuha nuvugaadi. Kuduuka yiranyie choosi na ameede ku kedieli kilala ku vitano chu vuguli kandi akihaane ku mwene cho ku lidiku lia ahaanaa kihanwa chiche chu uvwoni.

⁶ Alaleeta ku Yahova kihanwa chiche kuvitira ku musaalisi keve kuli mitungu ku Yahova keveeye ligondi limigu, vuguli vwalio kolondekana nu vuguli vwavugilirwa na vasaalisi anoho imburi ekekore vugira imbara.

⁷ Musaalisi alahaana ku Yahova kisiuviriru zana kigira uvwoni vwu mundu oyo kandi alasaamifwa.

Visiuviliru Viukusambwa

⁸ Nyasaye yalaga Musa

⁹ ahaane ku Haruni harara na vayaayi veve malago yaga kigira vihaanwa viu kusambwa. Kihanwa chukusambwa kuduuka kelekwe ku uvwali vudiku vwosi vugira kusiminya muliru.

¹⁰ Ahene yaho Musaalisi aliviika iganza yeeye yikatani kandi suruhali yeeye yikatani. Alavugula ligoke lizugani zitinya, litigalaa ku uvwali na alaliviika halovega lwu uvwali.

¹¹ Ahene yaho alatuliza zinguvu zizie nukwivika zinguvu zindi, kandi alagiinga ligoke nukulihila ichova wa hokososa havundu haveeye halahi kolondekana nu muruka gwi idini.

¹² Muliru goveeye ku uvwali kuduukanaa guzizagiliri kwaduka vugira kusima. Musaalisi alameda zingu ku uvwali vuli mugambazuri, Alalohiza ku kihanwa chukusambwa vulahi na alasambira ku zitinya zie kihanwa chi mirembe.

¹³ Kuduuka muliru yigwo guzizagiliri kwaduka ku uvwali kazozo vugira kusima.

Vihaanwa viu vuswage

¹⁴ Yaga nigo malago gukuhaana vihaanwa viu vuswage: Musaalisi kutura munyumba ya Haruni alahaana kihanwa chu vuswage ku Yahova imbiri wu uvwali.

¹⁵ Musaalisi alavugula luhi lulala lwu vusie vunyuki vwi kihaana, na maguta, kandi kimuli choosi keveeye ku kihanwa chuvuswage, alakisambira ku vwali kuli kidieli chukwizuliza ndi choosi kihaaniywi ku Yahova. Lifunya lie kihanwa yiki lilayaanziza Yahova.

¹⁶ Haruni harara na vana veve valalia vutigaye, navuzwa vulaliilwa havundu hatakatifu vugira kuzuganyia mu mamera hamugizi hi Lihema.

¹⁷ Sivalalombela mu mamera mba. Mali kuvaha keve kuli kidieli chavo chi kihanwa chu kusambwa. Keveeye kitakatifu ligali kuli kihanwa chu uvwoni kandi kuli kihanwa chilihiolo.

¹⁸ Avasaza vosi, ku kisukururwi cha Haruni, vanyara kulia kuvuswage vusambiywi ku muliru yigu kigira Yahova kuli gaalagwa kumakula goosi mihiga ni mihiga. Mundu wundi woosi udiira ku kihanwa chi chukulia yiki, alasalirizwa.

¹⁹ Yahova yaaha Musa malago yaga

²⁰ kolondekana nu uvasaalisi vinyumba ya Haruni. Ku lidiku liu musaalisi aviikilwa ku makono, alahaana kihanwa ku Yahova kilo ndala yu vusie vunyuki eveeye kegero kilala chere ku kihanwa chu vuswage cha vuli lidiku, inusu yavwo ihaanwa ha mugamba na inusu yindi hamugorova.

²¹ Vulazuganywa namaguta nokodekera ku kifuria; kandi vulameganywa nokukihaana kuva kihanwa chukufunyira Yahova mwayu gwu kumuyanziza.

²² Mundu woosi, waviikwa ku makono kuli Musaalisi Munene mu vogono vwa Haruni, alahaana kihanwa yiki ku Yahova mihiga ni mihiga. Vulasambwa kuli visiuviliru ku Yahova.

²³ Vihaanwa viosi viuvuswage viumusaalisi ahaanaa vilasambwa viosi. Sivilaliivwa mba.

Vihaanwa viu vwoni

²⁴ Yahova yalaga Musa navoora,

²⁵ volera Haruni harara na vayaayi veve ndi, yaga nigo malago ku vihaanwa viu vwoni: Inyama yi kihanwa chu uvwoni isinzirwi ivaale hi vihaanwa viukusambwa visinzirwaa. Yiki ni kihanwa kitakatifu ligali.

²⁶ Musaalisi uhaanaa kisiuviriru yiki kigira uvwoni, alakilira havundu hatakatifu hu mugizi gwi Lihema liu kwaganira mu na Yahova.

²⁷ Mundu woosi anoho kindu choosi kidiira ku nyama yumutugu yiyi kilakolwa kitakatifu. Niiva masahi gayo guuhika kunguvu, kuduuka inguvu yeyo ifuyirwi havundu hatakatifu.

²⁸ Inyingu yi vodohi yinyama zana edekerwa mu, kuduuka yaatanywe. Niiva edekerwa mu Inyingu yumugasa, gaduukaana ikulwi kandi yogizwi na mazi.

²⁹ Avasaza vosi vinyumba ya vusaalisi vanyara kulia inyama yeyo. Eveeye intakatifu ligali.

³⁰ Navuzwa, niiva malala ku masahi gi kihanwa chu vwoni galeetwa mu Lihema ma gatumikirwi kolomba chukwogiza uvwoni, inyama yeyo italiivwa mba. Ilasambwa ku muliru.