Kyavalevi 3 - KITABU KITAKATIFU

Kihanwa chu vuhambani

¹ Lwu mundu woosi ahaanaa ku Yahova ndala ku zing'ombe zizie kuli kihanwa chi mirembe, gaduukanaa eve igiriki anoho erori itali nimbara.

² Mundu zana alaviika mukono gwigwe mulungi ku mutwi gwi kihanwa chiche na alagisinzira ha vwingiliru vwi Lihema liu kuvuganira mu na Yahova. Kunangwa, avasaalisi, avayaayi va Haruni valuuha masahi gayo mu zimbega ziosi zine ziu uvwali.

³ Kutura ku kihanwa chi mirembe zana, alahaana vidonye vie kisiuviriru yivi ku Yahova: itinya yoosi eveeye ku vindu viumunda viosi,

⁴ Zimbigu ziombi nitinya eveeye kuzio himbi kandi kedonye kilahi ligali chi ingudumani yatulizwa harara ni zimbigu.

⁵ Avasaalisi valasaamba yivi viosi ku uvwali harara ni Vihaanwa viu kusambwa. Lifunya mwayu gwi kihanwa chi chukulia yiki liveeye liu kuyanziza ku Yahova.

⁶ Niiva ligondi anoho imburi itumikiywi kuli kihanwa chi mirembe ku Yahova, kinyala kuva kekole anoho kisuveni, navuzwa kuduuka keve vugira imbara.

⁷ Niiva mundu alahaana kememe chi ligondi ku Yahova kuli kihanwa,

⁸ alaviika mukono gwigwe mulungi ku mutwi gwalio, ma alisinziri havwingiliru vwi Lihema liu kuvuganira mu na Yahova. Avasaalisi valuuha masahi galio kuzimbega zine ziosi ziuvwali

⁹ kandi alahaana viungu vie inyama yivi kuli kihanwa ku Yahova, itinya yacho, itinya yoosi yu musembe nigukaliywi kutura ku kigumba chu mugongo, itinya yoosi ifumaa vindu viu munda viosi,

¹⁰ zimbigu ziombi harara nitinya eveeye kuzio, kandi kedonye kilahi ligali cha ingudumani.

¹¹ Musaalisi uva nakora muyinzi yigu, alavisaamba viosi ku uvwali, kuli kihanwa chi chukulia kihaanwaa chu muliru ku Yahova.

¹² Niiva alahaana imburi, alageleeta imbiri wa Yahova,

¹³ kandi alaviika mukono gwigwe mulungi ku mutwi gwayo ma agisinziri imbiri wi Lihema. Avasaalisi valuuha masahi gayo ku zimbega ziosi zine ziu uvwali.

¹⁴ Alahaana vidonye vie kisiuviriru yivi kuli kihanwa chi chukulia ku Yahova. Itinya yoosi eveeye ku vindu viu munda;

¹⁵ zimbigu ziombi, kandi itinya eveeye kuzio, kandi kedonye kilahi chi ingudumani.

¹⁶ Musaalisi alavisaamba viosi ku uvwali kuli kihanwa chi chukulia, chu kuyanziza Yahova. Itinya yoosi eveeye ya Yahova.

¹⁷ Mundu wa Isiraeli woosi atalia ku itinya anoho masahi mba. Yili ni Lilago lia vandu va Isiraeli vosi vaduukana valindi madiku goosi havundu hoosi ha vava nivamenyi.