Kyavalevi 27 - KITABU KITAKATIFU

Amalago Kolondekana ni Vihaanwa ku Yahova

¹ Yahova yavolera Musa

² avolere avandu va Isiraeli ndi, lwu umundu alombaa liesuuha lidukiru liu kuhaana ku Yahova kihanwa chu umundu, umundu oyo anyala kulakulwa mu litunga kedonye cha mabese kinyala kuduuka kuli ndi.

³ Kolondekana nu vuguli vwavugilirwa, musaza muhindira, wi mihiga sirini kuduuka sitini; alatungaa vidonye amusini vie ifeza.

⁴ Mukali muhindira alatungaa vidonye salasini viefeza.

⁵ Musoleri muyaayi wimihiga jitano kuduuka sirini alatungaa vidonye sirini viefeza. Niiva nu musoleri mukaana alatungaa vidonye likomi viefeza.

⁶ Naava nu mwana muyaayi oveeye kutura ku mweli mulala kuduuka mihiga jitano alatungaa vidonye vitano vie ifeza, kandi naava numwana muyaayi oveeye kutura ku mweli mulala kuduuka mihiga jitano alatungaa vidonye vitano vie ifeza, kandi naava numwana mukaana, vidonye vivaga viefeza.

⁷ Musaza oveeye igulu wi mihiga sitini, alatungaa vidonye komi na tano vie ifeza.

⁸ Niiva umundu woosi alombaa lilagaa liu kwisuuha na aveeye mudaka ligali utanyala kutunga vuguli vwavugilirwa alaleeta umundu zana ku musaalisi, nu musaalisi alaviika vuguli hasi, kolondekana ni linyaliza liu umundu wisuhaa.

⁹ Niiva liesuuha zana liveeye kigira mutugu guvugilirwa kuhaanwa ku inzi maku vuli kihanwa keleetwa ku inzi keveeye kitakatifu;

¹⁰ kandi umundu woosi wisuhaa ku Inzi sianyala kugirung'anyia mutugu mulahi muvogono vwu mutugu mudamanu mba, anoho mudamanu nu mulahi mba. Niiva akolaa ndio, mitugu jombi jiveeye mitakatifu.

¹¹ Navuzwa niiva liesuuha zana liveeye kigira mutugu gutaveeye mulahi gutavugilirwa kuli kihanwa ku Inzi, umundu oyo alahila mutugu zana ku Musaalisi.

¹² Musaalisi alalomba vuguli vwayo kolondekana ku vulahi anoho vudamanu vwi liiva liagwo, na vuguli zana vulava nivwo.

¹³ Navuzwa niiva umundu oyo aleenya kwirana kugugula, kuduuka atungi vuguli vwagwo kandi ameede ku kedonye cha sirini ku mia viu vuguli zana.

¹⁴ Niiva mulala ahaanaa inyumba yeeye ku Yahova, umusaalisi alaviika ku vuguli kolondekana nu vulahi anoho uvudamanu vwayo, nuvuguli yivwo vulava nivwo.

¹⁵ Niiva oyo uhaana inyumba zana eve indakatifu ku Yahova yenya kwirana kugigula, kuduuka atungi vuguli vwayo, kandi ameede ku kidieli cha sirini ku mia.

¹⁶ Niiva mundu ahaanaa ku Yahova kedonye chu mulimi ogoveeye gwigwe ku linyola mwandu, yaho vuguli vwago vulavikwa ku kolondekana nu vumwu vwa vutumikirwa mu litaga mulimi zana ku vuguli vwi vidonye sirini vie ifeza ku vuli kihinda chi zikilo sirini zie shairi.

¹⁷ Niiva ahaanaa ku Yahova mulimi gwigwe na ahene yaho inyima wu muhiga gwi liranywa, vuguli vuviikwa ku vulava nivwo.

¹⁸ Navuzwa niiva alahaana mulimi gwigwe inyima, umusaalisi alaganaganyia mabese gatungwa kolondekana ni mihiga jitigaye kuduuka ku muhiga golonda ku gwi liranywa; kandi alaviika ku vuguli vwa hasi.

¹⁹ Niiva oyo uhaanaa mulimi zana ku Inzi Yahova yenya kugugula, kuduuka atungi vuguli vwagwo na ameede ku vidieli sirini ku mia viu vuguli yivwo.

²⁰ Niiva alaguliza mulimi ku umundu wundi vugira kutanga kwirana kugugula kutura ku Inzi Yahova ndagotiza vulungi vwu kwirana kugugula.

²¹ Ku muhiga kolonda ku gwu kwiranywa, mulimi zana gulava gwange mihiga ni mihiga. Gulava gwa avasaalisi.

²² Niiva umundu alahaana mulimi gwamali kugura kuva umutakatifu ku Yahova, ugutaveeye kedonye chu mulimi gwi miandu,

²³ umusaalisi alaganagana uvuguli vwagwo kolondekana ni muhiga golonda ku gwu kwiranywa, kandi umundu zana kuduuka atungi uvuguli vwa vuli lidiku. Amabese yago gaveeye Yahova.

²⁴ Ku muhiga gwe lilekelwa mulimi yigwo, gulilanyirwa uwaali mwene gwo mulitanga anoho ku visukululwi vivie.

²⁵ Vuguli vwosi vulalohizwa nukuviikwa ho kolondekana na yivwo vwavugilirwa na avasaalisi.

²⁶ Chukutanga kwivulwa chu mutugu keveeye cha Yahova, kunangwa atava ho nu mulala uviikaa mutugu yigu halovega kuli kihanwa chu uvwihaani mba. Kemoli, kememe chi ligondi anoho kememe chimbuli keveeye cha Yahova,

²⁷ navuzwa chukutanga kwivulwa chinyama itaveeye indahi kinyala kwirana kugulwa ku vuguli vwaviikwa ho nomeeda ku kidieli cha sirini ku mia chu uvuguli yivwo. Niiva sikirana kugulwa, kinyala kugulizwa ku umundu wundi woosi ku uvuguli vwaviikwa ho.

²⁸ Atava ho nu mulala unyala kuguliza anoho wirana kugura chamali kuhaana ku inzi mba, nigakava numundu anoho mutugu anoho mulimi. Keveeye change mihiga ni mihiga.

²⁹ Sihaveeyeho kali umundu wamala kuvikwa halovega kulwu vutumiki vwange mba, unyala kwirana kugulwa; kuduuka yiitwi.

³⁰ Kidieli kilala ku likomi chi viamo viosi viu mulimi, niviva vuswage, anoho makuyu, keveeye Yahova.

³¹ Niiva umundu aleenya kwirana ku gula kilala kucho, kuduuka atuungi uvuguli vwaviikwa ho nokomeda ku kidieli cha sirini ku mia chu uvuguli vwacho.

³² Ndala kutura mu vuli mitugu eveeye Yahova. Lwi mitugu zana jivalizwa, vuli mutugu gwi likomi goveeye gwa Yahova.

³³ Mwene mitugu yijo sianyala kujilohiza munzira yo kolola ndi midamanu jive nijo jitovolwamba; kandi sianyala kujigilung'anyia mba. Niiva alajigilung'anyia mutugu mulala mu vogono vwu gundi, ahene yaho, jombi jilava ja Yahova kandi sijinyala kugulwa kandi mba.

³⁴ Yaga nigo malago ga Yahova yaaha Musa ku kiguru cha Sinai kigira avandu va Isiraeli.