Kyavalevi 25 - KITABU KITAKATIFU

Muhiga Gwa Saba

¹ Yahova yavolera Musa ku Kiguru cha Sinai:

² avolere avandu va Isiraeli ndi. Lwa mwingira mu kivala change chamuhezaa, kivala kilalinda Lisabato liange.

³ Mulataga milimi jenyu, muhalulira mizabibu nokuvungiza viamugesa ku mihiga sita.

⁴ Navuzwa muhiga gwa saba gulava muhiga gwi lisosa liekivala, muhiga gwaviikwa ku makono kigira Lisabato liange. Mutataaga milimi jinyu kandi mutahalulira mizabibu jinyu mba.

⁵ Kali mutagesi vuswage vomera vwene nivutatagiywi mba, kandi mutagesi makuyu gi mizabibu jinyu ja mutahaluriyi mba. Goveeye muhiga gwi Lisosa ligali. Kivala kuduuka keve nu muhiga gwi lisosa.

⁶ Kali niiva milimi si jalimwa ing'inga yu muhiga yigwo, jilaamuha viukulia, avasaza na vakali vatugwa vinyu, avageni vamenya harara nimunyi

⁷ mitugu jinyu, zinyama ziumbulimu iziveeye mumilimi jinyu. Ivindu viosi vituraa mumilimi jinyu vilaliivwa.

Muhiga gwi Lisaangala

⁸ Mulavaliza mihiga ja masabato saba haali saba, josi jilava arubaini na tisa.

⁹ Maku, ku lidiku lielikomi liu mweli gwa saba, Lidiku liu kusamiiha uvwoni, mutumi umundu akubi kisiriva mu kivala chienyu choosi.

¹⁰ Munzira yiyi mulatakasa muhiga gwa amusini na mulandizi vovoholore ku avandu vosi vamenya mu kivala yicho. Mu muhiga yigu, ivindu viagulizwa viosi, vililanyirwa avaari vene vio militanga anoho visukululwi viavo, kandi umundu vosi uwaali naaguliziywi kuli mutugwa, alirana ku avandu vinyumba yeeye. Goveeye muhiga gwi lizuliza mihiga amusini.

¹¹ Umuhiga gwa amusini goveeye gwi lisangala lienyu. Mutataaga milimi mba kandi mutagesa vuswage vwamera vwene anoho kwagula makuyu gi mizabibu javula kosembelwa nokuhalulirwa mba.

¹² Muhiga gwosi gulava umutakatifu ku munyi. Mulalia vuzwa chukulia chi milimi jihana jiene.

¹³ Mu muhiga yigu ivindu viosi viagulizwa kuduuka vilanyirwi umundu uwaali mwene vio mulitanga.

¹⁴ Kunangwa, lwa mugulizira Muisiraeli wache milimi, anoho muguli milimi kutura kuvo, mutadambizani mba.

¹⁵ Uvuguli volombwe kolondekana ku livaliza lie mihiga ju mulimi gunyala kwama viukulia inyima wu muhiga gwi lisosa.

¹⁶ Niiva jiveeye mihiga minyingi uvuguli vulava igulu, navuzwa niiva jiveeye vuzwa mikekeeke, uvuguli vulava hasi ligali kigira kigulizwa keveeye viamo viu mulimi yigwo gunyala kwama.

¹⁷ Mutagaada Avisiraeli vache mba; navuzwa mutie Inzi Yahova Nyasaye winyu.

Uvudinyu vwu muhiga gwa Saba

¹⁸ Kunangwa mulalonda malago gange na miigizu geege goosi nukugakola na mulamenya nimirembe mukivala.

¹⁹ Kivala zana kilaama makuyu na munyi mulava navio viosi viamwenyaa mulie kandi mulamenya mu mirembe.

²⁰ Navuzwa wundi alateeva chamulilia ing'inga yu muhiga gwa saba lwi milimi jitatagwa kandi makuyu gatageswa mba.

²¹ Inzi ndagasiza kivala mu muhiga gwa sita kunangwa kiduuki kwama viukulia vitumika ku mihiga giviri.

²² Lwa mutaaga milimi jinyu mu muhiga gwa munane, mulava nimukilia via mwagesa ing'inga yumuhiga gwa sita, kandi mulava ni viukulia vimuduuka, mulie kuduuka vitagwa via mutaaga muhiga yigwo vigeswa.

Liranyia Miandu

²³ Milimi jinyu jitagulizwa ku ligulizwa liemihiga ni mihiga mba; kigira kivala sikeveeye chiinyu mba; nichange, na munyi muveeye kuli avageni vuzwa avavugililangwa kukitumikira.

²⁴ Lwu mulimi gugulizwa, umundu uwaali ukutanga kugugula kuduuka gamanyikane.

²⁵ Niiva umundu wa Isiraeli alava mudaka, ma gamunigi kuguliza mulimi gwigwe, mwiko weve wa himbi ligali ave niye ugugula.

²⁶ Umundu utaveeye nu mwiko wahimbi unyala kugura agwilanyie, na lwinyima anyoore imiandu, anyala kugugula kandi.

²⁷ Mu makuva yaga, kuduuka atuungi ku umundu uwaali niyagugula mabese goosi ganyala kuduuka mitungu ji mihiga jitigala kuduuka muhiga gwi liranyirwa imiandu, lwanyala kwilanyia mulimi gwigwe muliiva liosi.

²⁸ Navuzwa nataveeye namabese gaduukaa kwirana kugura mulimi yigwo, gulatigala mu makono gu umundu wagugula kuduuka muhiga golonda ku gwi liranyirwa. Mu muhiga yigwo, gulilanywa ku umundu uwaali mwene gwo mulitanga.

²⁹ Niiva umundu alaguliza inyumba eveeye mu lidaala linene liavodong'anywa ku lidigi, avugilirwa kwirana kugugula mu ing'inga yu muhiga gwukutanga kutura lidiku lia yagulizwa.

³⁰ Navuzwa niiva sialirana kugigula mu muhiga yigwo, alagotiza vunyali vwu kwirana kugugula, na inyumba yiyi ilava umwandu gwi mihiga ni mihiga ju muguli uyu harara ni visukululwi vivie. Siliranywa mu muhiga gwi Liranyia mba.

³¹ Navuzwa zinyumba mu madaala gatalombelwa ku lidigi zilava kuli milimi. Uwaali mwene gwo uwokutanga aveeye nuvunyari kwirana kuzigula, na ziduukanaa zilanywe mumuhiga gwiliranywa.

³² Kali ndio ihiiri ya Levi eveeye nuvunyari kwirana kugura miandu jaavo jiveeye mu madaala manene gavaahevwa.

³³ Niiva inyumba mu lilala ku madaala yaga igulizwa nu umundu wi ihiiri ya Levi na siyirana kugulwa mba, kuduuka yiranyirwi mwene yo mu Muhiga gwu kwilanyia, kigira zinyumba zia avandu vi ihiiri ya Levi vaveeye nazio mu madaala manene gaavo ziveeye imiandu jaavo mihiga ni mihiga hagati ha avandu va Isiraeli.

³⁴ Navuzwa mulimi gwu kwayiza mu ugwavodong'ana madaala manene ga avandu vi ihiiri ya Levi sigulagulizwa kali hakuzu mba. Jiveeye imiandu jaavo mihiga ni mihiga.

Kwegobiza vadaka

³⁵ Niiva umundu wa Isiraeli wache omenyi himbi nivi naagwa mudaka, kandi avuli kwinyaliza mwene, kuduuka mumukonye; kuli munyala kokonya mugeni anoho mumenya, aduuki komenya nimunyi.

³⁶ Mutavugula madanyi anoho viambeti viulugano lwosi mba; navuzwa mutie Inzi Nyasaye na muleke umundu wa Isiraeli wache amenye nimunyi.

³⁷ Mutamwegobiza mabese munyolere ku viambeti mba na mutamugulizira chukulia munyolere ku vukara mba.

³⁸ Inzi mbeeye Mwami Nyasaye winyu wamutuliza mu kivala cha Egebeti, kunangwa nduuki kumuha kivala cha Kanaani kandi mbe Nyasaye winyu.

Livoholorwa lia Avatugwa

³⁹ Niiva umundu wa Isiraeli wache omenya himbi nimunyi alagwa mudaka ligali kali kuduuka yigulizi mwene ku munyi kuli mutugwa, mutaleka akole miyinzi jumutugwa mba.

⁴⁰ Alamenya nimunyi kuli mutumikiri wukutungwa kandi kuli mumenya, akutumikiri kuduuka muhiga golonda ku gwi liranywa.

⁴¹ Hene yaho oyo harara na avana veve valatura ku munyi ma viirane ku avandu vinyumba yeeye kandi ave amwandu gwa vaguuga veve.

⁴² Avandu va Isiraeli vaveeye vatugwa vange, kandi ndavatuliza mukivala cha Egebeti. Vatagulizwa mu vutugwa mba.

⁴³ Mutavamiiha nu vululu mba, navuzwa mutie Inzi Nyasaye winyu.

⁴⁴ Niiva mwenya vatugwa, kuduuka muvaguli kutura mu zihiiri ziveeye himbi ni munyi.

⁴⁵ Munyala kandi kugura avana va vageni vamenya hagati hinyu. Avana kuli yava aviivulirwa mu kivala chiinyu vanyara kuva imiandu jinyu;

⁴⁶ kandi munyala kuvaleka vave kuli imiandu ja avayaayi vinyu. Navuzwa mutamiihi nizinguru ku avandu va Isiraeli vache vinyu mba.

⁴⁷ Nigakava umugeni omenya harara nimunyi alagwa mutugi, lwu umundu wa Isiraeli wacho agwa mudaka ligali, ma yigulizi mwene ku mugeni oyo anoho ku avandu vinyumba yu mugeni oyo,

⁴⁸ Inyima wu kwiguliza, akikiri nuvunyari kwirana kugulwa yilanywe. Mulala ku avamwavo veve,

⁴⁹ anoho koza weve anoho musiala weve, anoho wundi ku avandu vinyumba yeeye wa ahimbi unyala kwirana kumugula, anoho mwene naava nanyoora mitungu jiduukanaa, anyala kwirana kwigura mwene.

⁵⁰ Kuduuka avalizi mihiga kutura ing'inga ya yiguliza mwene kuduuka ku muhiga golonda ku gwi lisangala, kandi alombe vuguli vwi livoholorwa kolondekana ni mitungu jihanwa ku mutumikiri wukutungwa.

⁵¹ Niiva jikikiri mihiga minyingi, kuduuka yiranyie vulala ku vuguli vwa yagulwa kolondekana ni mihiga jayagulwa.

⁵² Niiva jikikiri mihiga mikekeeke kuduuka ku muhiga gwi lisaangala, kuduuka avalizi aduuki kwitungira ligulwa lilie.

⁵³ Kuli mutumikiri utungangwa ku vuli muhiga, mwami weve sialamwamiiha kuzinguru mba.

⁵⁴ Niiva sialavohololwa mu indala kuzinzira yizi mba, oyo harara na avana veve valavohololwa mumuhiga golonda ku gwi liranywa.

⁵⁵ Umundu wa Isiraeli sianyala kuva mutugwa mihiga ni mihiga mba kigira avandu va Isiraeli vaveeye avatugwa vange. Ndaavatuliza mukivala cha Egebeti, Inzi mbeeye Yahova Nyasaye winyu.