Kyavalevi 23 - KITABU KITAKATIFU

Amasavo Gidiini

¹ Yahova yavolera Musa

² avolere aandu va Isiraeli malago yaga kigira masavo gange matovole, agadukanaa alandizi kuli mavugano amatakatifu.

³ Muveeye namadiku sita gamukolera mu miyinzi; navuzwa lidiku lia saba liveeye Lisabato liveeye lidiku liokososa lidiku yili. Mutakoli muyinzi kali mulala mba; navuzwa muvugane harara kusigamira inzi Yahova. Lisabato liveeye lia Yahova hoosi ha muva nimumenyi.

⁴ Landiza masavo yaga ku zing'inga ziatovolwa.

Lisavo lie Lipasaka kandi liu Mugadi Gutaveeye mu na mamera

⁵ Lipasaka liange litangaa hamugorova ku lidiku lie likomi na gane, liu mweli gwu kutanga.

⁶ Ku lidiku lie likomi na gatano liu mweli yigwo, Lisavo liange liu mugadi gutaveeye mu na mamera litangaa. Ku madiku saba kuduuka mulie mugadi gwalombwa vugira mamera.

⁷ Ku lidiku liukutanga muve nilivugana litakatifu kandi mutakola miyinzi ja kase kali mulala mba.

⁸ Muhaane vihaanwa vieviukulia vienyu ku Yahova ku madiku saba. Ku lidiku lia saba, mulavugana kandi Kusigamira inzi Yahova; navuzwa si mulakola kali mulala ku miyinzi jinyu ja vuli lidiku mba.

Ligesa lia Makuyu Gukutanga

⁹ Yahova yavolera Musa,

¹⁰ avooreraa avandu va Isiraeli ndi, “Lwa mwingira mu kivala cha muheezaa muve ni ligesa liacho, muleete ku musaalisi ligesa lia makuyu gukutanga guvuswage vwa ogesaa.

¹¹ Musaalisi alakihaana kuli kihanwa kidukiru ku inzi Yahova, kunangwa muduuki kuvugilirwa. Musaalisi alakihaana lisabato niliakafwa.

¹² Lidiku lia muletaa kihanwa chu vuswage, mulahaana kandi kememe kimigu chi ligondi chu muhiga mulala kitaveeye nimbala kuva kuli kihanwa chukusambwa.

¹³ Harara nacho, mulaleeta zikilo ziviri ziu vusie vuzuganyiywi mu maguta ga muzeituni kuli kihanwa chichukulia kifunyaa mwayu. Mulaleeta kandi harara navwo, iliita indala yi waini.

¹⁴ Mutalia ku vuswage vuhia zana yivwo mba kali nivoveeye uvuvisi anoho uvukalangiywi kuva mugadi, kuduuka lwa mumala koleta kihanwa yiki ku Nyasaye winyu. Lilaga yili lilalondwa ni visukululwi vienyu viosi ku zing'inga ziza ziosi.

Lisavo lie Ligesa

¹⁵ “Valiza masiza saba kutura lidiku lialonda Lisabato lia mwaleeta kinywa chiinyu chuvuswage kuhaana ku Yahova.

¹⁶ Ku lidiku lia amusini, lidiku lilonda ku Lisabato lia saba, mulaleetera Yahova kihanwa kindi kihia chuvuswage.

¹⁷ Vuli inyumba ilaleeta migadi giviri ma vajihaane ku Yahova kuli kihanwa kidukiru. Vuli mugadi gulalombwa ku zikilo ziviri ziuvusie, gwuminyiywi mumamera kandi gulahaanwa ku Yahova kuli kihanwa chukutanga chuvuswage vogeseywe.

¹⁸ Kandi harara numugadi, avilidaala valaleta vimeme saba via magondi viumuhiga mulala, igiriki indala esoleri, na magondi mamigu gaviri gataveeye nimbala. Vilahaanwa kuli vihaanwa viukusambwa ku Yahova, harara nikihaanwa chuvuswage kandi kihanwa chiwaini. Lifunya mwayu gwi vihaanwa yivi viyanziza Yahova.

¹⁹ Kandi mulaleeta imburi ekole kuli kihanwa chu uvwoni, ni vimeme vimigu via magondi viviri viumuhiga mulala kuli vihaanwa vie mirembe.

²⁰ Musaalisi alahaana migadi harara ni vimeme via magondi viviri kuli kihanwa kidukiru ku Yahova kigira avasaalisi. Vihaanwa yivi viveeye vitakatifu.

²¹ Ku lidiku yilio mutakoli miyinzi jinyu ja vuli lidiku kali mulala mba; navuzwa muvugane harara kigira lisigamira Yahova; Visukululwi vienyu vilalonda lilaga yili mihiga ni mihiga hoosi hamuva nivamenyi.

²² “Lwa mugesa milimi jinyu, mutagesa vuswage voveeye ku zinzako zie milimi mba kandi mutilani kogesa vinywa viamavere vitigaye munyima mba. “Mulekere vadaka navageni. Yahova aveeye Nyasaye winyu.”

Lisavo liu muhiga muhia

²³ Yahova yavolera Musa,

²⁴ avolere avandu va Isiraeli ndi: “Ku lidiku liukutanga liu mweli gwa saba mulava ni lidiku liokososa, lie livugana litakatifu, ilizuliza mu likuba ivisiliva.

²⁵ Mutakola muyinzi kali mulala ku miyinzi jenyu ja vuli lidiku mba; navuzwa muleete kihanwa chi viukulia chukusambwa ku Inzi Yahova winyu.”

Lidiku liokusamifa Uvwoni

²⁶ Yahova yavolera Musa,

²⁷ “Lidiku lie likomi lu mweli gwa saba liveeye Lidiku liukusamiiha uvwoni vwa avandu. Mulava ni livugana ilitakatifu muhonge lilia, na muleete ku Yahova kihanwa chukusambwa.

²⁸ Mutakola muyinzi kali mulala ku lidiku yilio mba, kigira liveeye Lidiku liu kusamiifwa uvwoni

²⁹ umundu woosi ulia kindu choosi ku lidiku yilio sialavalizwa kandi kuva mulala ku avandu vange mba.

³⁰ Kandi niiva umundu woosi akolaa muyinzi ku josi ku lidiku yilio, Inzi mwene ndamwita.

³¹ Mutakola muyinzi gwosi mba. Yili liveeye lilaga lie mihiga ni mihiga ku visukululwi vienyu hoosi haviva nivimenyi.

³² Kutura hamugorova gwi lidiku lia tisa kuduuka hamugorova gwi lidiku lielikomi liumweli zana, mulaliinda lidiku yili kuli lidiku lidukiru liokososa. Ing'inga yiyi, umundu atalia ikindu choosi mba.”

Lisavo lia Madiri

³³ Yahova yavolera Musa,

³⁴ avolere avandu va Isiraeli, “Ku liduku lie likomi na gatano liu mweli gwa saba, lisavo liange lia madiri lilatanga ma lizizagiliri ku madiku saba.

³⁵ Lidiku liukutanga lia madiku yaga liveeye lie livugana ilitakatifu. Mutakola miyinzi ja vuli lidiku mba.

³⁶ Vuli lidiku, ku madiku saba mulaleeta kihanwa chukusambwa ku Inzi Yahova. Kulidiku lia munane muve nilivugana ilitakatifu, liveeye lidiku liukusigamira Inzi Yahova kandi simulakola muyinzi gwosi mba.”

³⁷ (Yaga nigo masavo gi diini gamukuminyira Inzi Yahova mu livugana kandi koleta vihaanwa vie viukulia, vihaanwa viukusambwa, vihaanwa viu vuswage ivisiuviliru, kandi vihaanwa vie iwaini kuli genyekaa vuli lidiku.

³⁸ Amasavo yaga gaveeye gokomeeda ku masabato ga kazozo, kandi vihaanwa yivi viveeye viokomedaa ku vihaanwa via kazozo, vihaanwa vienyu viamuleetaa mulitwekiza liesuuha, kandi vihaanwa vienyu via muhaanaa nu mwoyo gwu vuyanzi ku Inzi Yahova.)

³⁹ Lwa muva m'mwakagesa milimi jenyu, mulava ni lisavo liange ku madiku saba, kutangira ku lidiku lie likomi na gatano liu mweli gwa saba. Lidiku liukutanga lilava lidiku ilitakatifu liokososa.

⁴⁰ Ku lidiku liukutanga, mulavugula malala ku makuyu malahi ligali kutura ku misaala jinyu; mulavuguli matu ga makindu, zisia zie misaala ja matu manyingi, ma mutange lisavo lie diini kuhaana luyali ku Inzi Yahova Nyasaye winyu.

⁴¹ Mulava ni lisavo yili ku Inzi Yahova kulwa madiku saba, vuli muhiga. Mulagumira lilaga yili mu zing'inga ziosi ziza ku visukululwi vienyu. Mulava ni lilia yili mu mweli gwa saba.

⁴² Avandu va Isiraeli valamenya mu madiri kulwa madiku saba,

⁴³ kunangwa visukululwi vienyu vaduuki kumanya ndi Inzi Yahova, ndaakola vandu va Isiraeli vamenye mu madiri lwa ndavaleta kutura Egebeti. Inzi mbeeye Yahova Nyasaye winyu.

⁴⁴ Kunangwa munzira yiyi, Musa yahaana ku avandu va Isiraeli malago gu kulinda masavo gidiini kuhaana luyali ku Yahova.