Kyavalevi 22 - KITABU KITAKATIFU

Vutakatifu vwi Vihaanwa

¹ Yahova yavolera Musa,

² volera Haruni na avana veve vayaayi, “Muhaane luyali ku vihaanwa ivitakatifu via avandu va Isiraeli vaviika halovega kigira Inzi, kunangwa vavuli kwonogonyia lieta liange litakatifu inzi mbeeye Yahova.

³ Ku makura gaaza, niiva mulala ku visukululwi vienyu viosi vilisunda himbi ku vihaanwa ivitakatifu via avandu va Isiraeli vaviika halovega kigira inzi, naveeye mudamanu kolondekana nu muruka gwi dini, umundu oyo sialatumikaku kandi ku vwali mba. Inzi mbeeye Yahova.

⁴ “Mundu woosi wi kisukururwi cha Haruni oveeye novogere, anoho oveeye ni kisununu, ataliaku vihaanwa vitakatifu mba, kuduuka lwava mulahi. Mundu woosi, musaalisi, oveeye mudamanu aveeye mudamanu niiva adiira kindu choosi kekoleywe kidamanu nu mukuzu anoho nu umundu woosi weloteeye

⁵ anoho niiva adiiyi ku inyama anoho umundu oveeye mudamanu.

⁶ Musaalisi woosi uva naagwiyi mudamanu alava mudamanu kuduuka hamugorova; kandi kali ndio sianyala kulia ku vihaanwa ivitakatifu mba, kuduuka lwava mulahi.

⁷ Lwi liuva liiva niliakayeera, alava mulahi, na alalia ivindu ivitakatifu, iviveeye chukulia chiche.

⁸ Sialalia inyama ikuzi yene anoho yitiywi ninyama yumbulimu mba. Ilamukola mudamanu. Inzi mbeeye Yahova.

⁹ “Avasaalisi vosi valalinda malago goosi ga mali kuhaana. Nigataveeye ndio valagwa avahioli, ma vakuzi kigira vavuli kutia malago matakatifu. Inzi mbeeye Yahova kandi mbakola kuva avatakatifu.

¹⁰ “Avandu vinyumba yu musaalisi venyine nivo vanyara kulia ku vihaanwa vitakatifu. Sihaveeyeho nu umundu woosi unyala kulia kuviukulia yivi kali nava mugeni omenyi numusaalisi anoho mutumikiri weve utungwa mba.

¹¹ Navuzwa mutugwa wu musaalisi yaagula na mabese geege mwene, anoho mutugwa wivulwa munyumba yumusaalisi, uyu alalia ku chukulia chu musaalisi anyoora.

¹² Mukaana wu musaalisi waletwa nu mundu utaveeye musaalisi atalia ku vihaanwa vitakatifu mba.

¹³ Navuzwa mukaana wu musaalisi nakunzakala anoho musaza naava namuleka utaveeye navana ma niyirana komenya munyumba ya baba weve kuli muvwana vwivwe, alalia ku viukulia via baba weve alanyoola kuli musaalisi. Navuzwa vageni vosi vatavilia mba.

¹⁴ “Niiva mundu woosi utaveeye ku vandu vinyumba yuvusaalisi alalia ku vihaanwa vitakatifu na tamanyi, kuduuka atungi musaalisi vuguli vwavio vwosi kandi ameede ku kidieli kilala ku vitano.

¹⁵ Avasaalisi sivalonogonyia vihaanwa vitakatifu via vandu va Isiraeli vahaana ku Inzi Yahova mba,

¹⁶ ku lileka mundu woosi utaavugulirwa alie ku vihaanwa vitakatifu mba. Nigakava ndio, galaleeta lihiola namaduywa ku mundu kuli oyo. Inzi mbeeye Yahova kandi nombaa vihaanwa kuva vitakatifu.”

¹⁷ Yahova yavolera,

¹⁸ Moloma ku Haruni, na avayaayi veve na vandu va Isiraeli uvavoolere ndi: “Niiva mundu wa Isiraeli anoho mugeni umenyi mu Isiraeli aleetaa kihanwa chukusambwa ku Yahova, kuduukiza liesuuha anoho kuli kihanwa chuvwihaani kuduuka mutugu gove vugira imbara.

¹⁹ Nimwenya kuvugilirwa kuduuka muleete kihanwa kisaza kiduukanu, vugira imbara kutura mu zigiriki anoho magondi anoho zimburi.

²⁰ Niiva mulahaana mutugu gwosi ogoveeye nimbala, Yahova sialaguvugilira mba.

²¹ Lwu umundu woosi aleetaa kihanwa chi mirembe ku Yahova mu liduukiza liesuuha anoho kuli kihanwa chuvwihaani, mutugu zana gaduukanaa gove vugira imbara niiva gulavugilirwa.

²² Mutahaana ku Inzi Yahova mutugu gwosi ogoveeye muvoku anoho gwalema, anoho gwavunanywa anoho ogoveeye ningwagu, anoho livimba anoho lwiyage mba. Mutahaana mitugu kuli yigi kuvwaali kuli vihaanwa viu viukulia ku Inzi Yahova mba.

²³ Kuli ikihaanwa chu vwihaani, munyala kuhaana mutugu gwakuunya anoho gwavula kolombwa vulahi ku vivero viumuviri gwacho, navuzwa sigunyala kuvugilirwa mu liduukiza liesuuha mba.

²⁴ Mutahaani ku Inzi Yahova mutugu gwosi gwa ladwaa gagwo mba anoho gaduywa; anoho gakalagwa anoho gasalirizwa anoho gatandulwa mba. Yaga sigavugilirwa mu kivala chienyu mba.

²⁵ “Mutahaana kihanwa chichukulia cha Nyasaye winyu mutugu gwosi kutura ku mugeni mba. Mitugu kuli yiji jivugulwa kuva kuli jiveeye nimbala kulwayago sijinyala kuvugilirwa mba.”

²⁶ Yahova yavolera Musa,

²⁷ “Kemoli anoho kememe chi ligondo, anoho kememe chi imburi, kilava harara ninyia ku madiku saba. Navuzwa lwinyima kinyala kuvugilirwa kuli kihanwa chu kusambwa ku Yahova.

²⁸ Utasiinza eng'ombe harara ne kemoli chayo mba anoho ligondi ne kememe chayio anoho imburi nekememe chayo kulidiku lilala mba.

²⁹ Lwuhaana kihanwa chilisandiza ku Yahova olonde malago kunangwa uvugilirwi.

³⁰ Kilaliivwa ku lidiku zana. Mutaleka kindu kucho kuduuka mugamba golondaku mba. Inzi mbeeye Yahova.”

³¹ Yahova yavoola, “Mugumiri malago gange nokugalonda.

³² Mutaleeta zisoni ku lieta liange litakatifu mba. Avandu vosi va Isiraeli kuduuka vamanye ndi inzi mbeeye Mutakatifu. Inzi mbeeye Yahova umutakasaa.

³³ Inzi ndamutuliza mu kivala cha Egebeti nduuki kuva Nyasaye winyu. Inzi mbeeye Yahova.”