Kyavalevi 21 - KITABU KITAKATIFU

Uvutakatifu vwa Avasaalisi

¹ Yahova yavolera Musa avolere avasaalisi, avandu vinyumba ya Haruni ndi: “Umusaalisi woosi ateyonogonyia mwene kigira vakuzu vaveeye hagati ha avandu vaavo mba,

² nataveeye umwiko weve wa himbi, kuli mama weve, baba weve, mwana weve muyaayi anoho mukaana, amwavo weve,

³ anoho mbozo weve ukikiri kuzia ilukali, omenya munyumba yeeye.

⁴ Ateyonogonyia mwene kigira likuza lia yavo avaveeye aviiko veve mu liletana mba.

⁵ “Musaalisi atavega mutwi gwigwe anoho kovega zinderu zizie, anoho kwisalaga kumanyia ndi asiomaa mba.

⁶ Kuduuka ave umutakatifu, kandi siaduukanaa yambiki muzisoni mba kigira ahaanaa vihaanwa vie viukulia ku Inzi Nyasaye wavo kuduuka ave umutakatifu.

⁷ Umusaalisi sialeta mukali muheyi mba, anoho mukali utaveeye mugima anoho wu msaaza yakunga mba; kigira musaalisi oyo aveeye umutakatifu.

⁸ Kuduuka avandu vavuguli musaalisi kuva aveeye umutakatifu, kigira ahaanaa vihaanwa vie viukulia ku Inzi; Inzi Yahova mbeeye mutakatifu kandi ngolaa avandu vange kuva avatakatifu.

⁹ Niiva mukaana wu musaalisi aleyonogonyia ku liiva muheyi aviikababa weve mzisoni, ahaanaa zisoni ku baba weve, alasaambwa nu muliru kuduuka akuzi.

¹⁰ “Musaalisi Munene uva navakiywi amaguta ha vamwavo veve, uwa gukutakasa ku mutwi gwigwe, kandi uwaatakaswa nu kwiviikwa zinguvu ziu vusaalisi, alavula kusanula liisu lilie mba, anoho ataanduli zinguvu zizie kumanyia ndi aveeye mulisioma mba.

¹¹ Sialingira havundu hu muviri mukuzu goveeye mba! Sialekola umudamanu kali niiva ni baba weve anoho mama weve ukuzi mba.

¹² Kandi sialatula ichova wi Lihema litakatifu liange, anoho kwonogonyia ahatakatifu hange mba. Kigira yaavikilwa ku makono kuvaka maguta gange. Inzi mbeeye Yahova.

¹³ “Mukali waleeta kuduuka ave mugima;

¹⁴ Ataleeta mukali mukunzakali, anoho uwakungwa nu musaza anoho muheyi mba. Kuduuka aleete mukaana mugima kutura mu avandu vinyumba yeeye.

¹⁵ Nigataveeye ndio, avana veve vaduukana vave avatakatifu; vatava avadamanu kolondekana ni miima mba. Inzi mbeeye Yahova, wamuvikaa halovega kuli Musaalisi Munene.”

¹⁶ Nyasaye yavolera Musa

¹⁷ avolere Haruni ndi: “Mu makura gaaza, atavaho na mulala ku visukululwi vivie oveeye novolema vwosi ku muviri gwigwe uhaana vihaanwa vie viukulia ku Inzi Nyasaye weve mba.

¹⁸ Umundu woosi oveeye novolema vwosi atiisunda ahimbi kuhaana vihanwa viviukulia mba: umundu woosi oveeye mboku, anoho nulema kerenge, woneka ligondo anoho wakuunya

¹⁹ anoho umundu wavunika kerenge, anoho mukono

²⁰ anoho oveeye nikiguku anoho wakuunya, anoho oveeye nesongo mumoni, anoho wulwiyage anoho kiziri mba.

²¹ Kisukururwi chu Musaalisi Haruni keveeye ku novolema vwosi ku muviri kitahaana ku kihanwa chi viukulia ku Inzi mba,

²² umundu kuli oyo anyala kulia ku viukulia vihaanwa ku Inzi kandi viukulia viveeye vitakatifu ligali.

²³ Navuzwa kigira aveeye novolema ku muviri gwigwe, atiisunda himbi ni suka indakatifu mba kandi atiisunda himbi nuvwaali mba. Atonogonyia ivindu ivitakatifu viange mba; kigira Inzi mbeeye Yahova uvikolaa kuva ivitakatifu.”

²⁴ Kunangwa yaga nigo ga Musa yavolera Haruni, avayaayi va Haruni kandi avandu vosi va Isiraeli.