Kyavalevi 2 - KITABU KITAKATIFU

Vihaanwa viu Vuswage

¹ Lwu mundu woosi aleetaa ku Yahova kihanwa chu vuswage, kuduuka kutanga asie vusie vunyuki ligali. Alaviika ku maguta ga muzeituni ni kimuli

² ma ahiliri avayaayi va Haruni avasaalisi. Musaalisi uva natumikaa lwene yilwo, alavugula uluhi lulala lwu vusie namaguta harara ni kimuli choosi. Musaalisi alavisaamba ku uvwali kuli kihanwa chu kwizuliza ndi choosi kimali kuhaanwa ku Yahova, ligunya mwayu gwi kihanwa chi chukulia yiki liveeye liukuyanziza ku Yahova.

³ Uvusie vutigaye vwosi vulava vwa avasaalisi; keveeye kitakatifu ligali kigira kituli ku chukulia kihaaniywi ku Yahova, chukusambwa nu muliru.

⁴ Niiva kihanwa zana keveeye mugadi gwuminyirwa mu lijiiko, kuduuka gove vugira mamera. Kuduuka gove mugadi mulitu gwu vusie vwazuganywa mu na maguta ga muzeituni anoho ivisikuti viavakwa maguta ga muzeituni.

⁵ Niiva kihanwa keveeye mugadi gwadekerwa kutura ku vusie vunyuki, uvwazuganywa mu na maguta ga muzeituni, navuzwa vugira amamera.

⁶ Ulagodonyanyia kandi usunduli ku amaguta lwa uhaana kuli kihanwa.

⁷ Niiva kihanwa zana keveeye mugadi gwadekerwa mu kifuria, kuduuka gulombwe ku vusie vunyuki ligali kandi na maguta ga muzeituni.

⁸ Gaduukanaa agoleete kuli kihanwa ku Yahova, ma akihaane ku musaalisi umanya akihili ku uvwali.

⁹ Musaalisi alavugula kedonye chagwo kuli chukwizulizira ku kumanyia ndi choosi kimali kuhaanwa ku Yahova, kandi alakisambira ku uvwali. Lifunya mwayu lie kihanwa chi chukulia yiki liveeye liu kuyaanziza ku Yahova.

¹⁰ Kihanwa chu vusie kitigaaye choosi kilava cha avasaalisi. Keveeye kitakatifu ligali, kigira kituli ku chukulia kihaaniywi ku Yahova.

¹¹ Vuli kihanwa chu vuswage kihanwa ku Yahova, gaduukanaa kelombwe vugira mamera anaho vwuki.

¹² Kihanwa chukutanga chi ligesa kilaleetwa ku Yahova vuli muhiga, navuzwa kitasaambwa ku uvwali mba.

¹³ Ulavika ijumbi ku vuli kihanwa chu vuswage. Kigira ijumbi eveeye mu vogono vwi lilagana hagati hoho na Nyasaye woovo. Kuduuka uviiki ijumbi ku vihaanwa vivio viosi.

¹⁴ Lwa uleeta ku Yahova kihanwa chu vuswage vwi ligesa liukutanga, haana vuswage vukalangiywi anoho vusie vusieyeywi.

¹⁵ Ulameeda ku maguta ga muzeituni kandi kimuli.

¹⁶ Musaalisi alasamba kedonye chu kwizuliza chu vuswage chasievwa, na maguta ga muzeituni kandi harara ni kimuli choosi, keveeye kihanwa chu kusambwa ku Yahova.