Kyavalevi 18 - KITABU KITAKATIFU

Ovoheyi nu Vudamanu

¹ Yahova yavolera Musa

² avolere avandu va Isiraeli, “Inzi mbeeye Yahova Nyasaye winyu.

³ Mutalonda likora lia avandu va Egebeti wamwamenyaa mba anoho likora lia avandu vu mukivala cha Kanaani wa inzi muhiraa mba. Mutalonda malago gaavo mba.

⁴ Kuduuka mulonde malago gange kandi mukore ga Inzi mulagaa. Inzi mbeeye Yahova Nyasaye winyu.

⁵ Mulonde likora kandi malago ga Inzi muheezaa. Mulahonyia livamwoyo lienyu mu likora ndio. Inzi mbeeye Yahova.”

⁶ Mundu woosi ataheya nu mwiko weve mba. Inzi mbeeye Yahova.

⁷ Utaha baba woovo zisoni ku ligona harara na mama woovo mba. Aveeye mama woovo utavimbula chahonyo chiche mba.

⁸ Utaha baba woovo zisoni ku liheya na mulala ku vakali veve mba.

⁹ Utaheya na mbozo woovo naveeye mukaana wa baba woovo yivula nu mukali wundi mba, anoho mukaana wa mama woovo, yivula nu musaza wundi mba kali niiva yaavirukira anoho yavula kuvirukira munyumba yinyu.

¹⁰ Utaheya nu mwisukulu woovo mba mukaana wu muyaayi woovo anoho mwisukulu wu mukaana woovo mba. Ulava nuwehezaa zisoni.

¹¹ Utaheya na mbozo woovo wa baba woovo yivula nu mukali wundi mba. Aveeye mbozo woovo.

¹² Utaheya na mbozo wa baba woovo kigira aveeye mwiko wa baba woovo wahimbi.

¹³ Utaheya na amwavo mama woovo mba. Aveeye mwiko wa mama woovo wa himbi.

¹⁴ Utaheya numukali wa amwavo baba woovo mba. Oyo kandi aveeye mama woovo.

¹⁵ Utaheya na navizara woovo mba, aveeye mukali wu muyaayi woovo; utavimbula chahonyo chiche mba.

¹⁶ Utaheya nu mukali wa amwavo woovo mba. Yaga gaveeye zisoni ku amwavo woovo.

¹⁷ Utaheya nu mukaana anoho mwisukulu wu mukali wa iyivi umali koheya naye mba. Yava vaveeye aviiko vovo va himbi. Voheyi kuli yivwo voveeye vudamanu.

¹⁸ Utavugula amwavo mukali woovo, mukali woovo mwene nakikiri mwoyo mba.

¹⁹ Utaheya nu mukali lwa veeye mu ing'inga yeye yu mweli mba kigira aveeye mudamanu.

²⁰ Utaheya nu mukali wu mutende woovo mba yaga garakokola kua mudamanu.

²¹ Utahaana mulala ku avana vovo kuva kisiuviriru ku nyasaye ulangwa Moleki mba, kigira yago galaleta zisoni ku lieta lia Nyasaye.

²² Musaza atagona nu musaza wundi kuli agonaa numukali mba. Liveeye livihiliriza ku Nyasaye.

²³ Musaza anoho mukali woosi atagona nu mutugu gwosi mba. Keveeye kivihiri kenene ligali.

²⁴ Muteyononyia munyi vene mu vikolwa yivio viosi mba kigira nindio avandu vi zihiiri vanzizaa kukunga kutura imbiri winyu veyononya.

²⁵ Vikolwa viavo vialomba kivala kuva kidamanu. Kunangwa Yahova ahaanaa mageri ku kivala nukusuula avandu vamenyi mucho.

²⁶ Navuzwa kuduuka munyi mulonde amalago gange goosi. Munyi mwosi mundu wa Isiraeli, anoho mugeni omenya hagati hinyu atakola ku ivindu viukuvihiliriza yivi kali kilala mba.

²⁷ Kigira ivindu viukuvihiliriza yivi viosi viakolwa na avandu vamenya mu kivala cha muzizaa mu, kivala yicho chamala kwonogonywa.

²⁸ Niiva mulachonogonyia, kilamusuula kuli chasuula zihiiri ziamenya mu imbiri winyu.

²⁹ Munyi mumanyi vulahi ndi, mundu woosi okolaa kilala ku ivindu vidamanu viukuvihiliriza yivi, sialavalizwa kuli mulala ku avandu va Nyasaye mba.

³⁰ Yahova yavoola; “Mulonde malago gamuhezaa na mutalonda vikolwa via avandu avamenyaa mu kivala yicho imbiri winyu mba. Muteyonogonyi munyi vene mu likora kilala ku vindu yivi mba. Inzi mbeeye Yahova, Nyasaye winyu.”