Kyavalevi 16 - KITABU KITAKATIFU

Lidiku liu vusamiihi

¹ Yahova yamolova na Musa inyima wi likuza lia vayaayi vaviri va Haruni, aviitwa lwahaana muliru gutaali mutakatifu ku Yahova.

² Yahova yavolera Musa, “Volera amwavo woovo Haruni ndi ni ku ing'inga idukanaa iyanyala kwingira inyima wi isuuka ikingaa havundu hatakatifu ligali, kigira niho ha inzi ndolekaa mu malesi igulu wi kikuniku keveeye ku Lisandugu lia malago; niiva sialahulira mba, aliitwa.

³ Anyala kwingira havundu hatakatifu ligali, lwa ava niyakamara koleta kemoli kigiriki kuva kihanwa chu uvwoni ni lig'ondi limigu kuli kihanwa chukusambwa.”

⁴ Haruni nakikiri kwingira havundu hatakatifu ligali, kuduuka yisingi muviri gwosi kandi yiviiki zinguvu ziuvusalisi yizi: Iganza ni suruhali yi katani, musibi gwi katani ne kelemba chi katani. Yizi nizinguvu zindakatifu.

⁵ Avandu va Isiraeli navo valaha Haruni zimburi zikore ziviri kuva kihanwa chu uvwoni na ligondi likore kuva kihanwa chukusambwa.

⁶ Haruni alahaana igiriki kuli kihanwa chukwogiza uvwoni vwivwe mwene nu uvwoni vwa avandu vie inyumba yeeye.

⁷ Maku alavugula zimburi ziviri zana nukuzihira ha vwungiliru vwi Lihema Liu kuvuganira mu na Yahova.

⁸ Kunangwa alakuba ikura ku zikore ziviri zana natumikira magina gaviri; lilala liang'odwaku, “Ku Yahova” ni lindi, “Ku Azazeli.”

⁹ Haruni alasinza imburi etovoleywe ni kura kuva “Ya Yahova” na alagihaana kuli kihanwa chu uvwoni.

¹⁰ Imburi etovoleywe kuva “Ya Azazeli” ilahaanwa neveeye mwoyo ku Yahova na ilalakulwa izie muchangalangwe ku Azazeli kunangwa ituliziho uvwoni vwa vandu.

¹¹ Lwa Haruni ava nasinzaa igiriki kuli kihanwa chu uvwoni vwivwe nuvwinyumba yeeye,

¹² alavugula kiju chi izahabu nikizuyi amanda gu muliru kutura ku uvwali na makono gaviri nigiizuyi kimuli kilahi ligali nukuvileta havundu hatakatifu ligali.

¹³ Kuduuka aviiki kimuli ku muliru imbiri wa Yahova nu mwoki gwi kimuli gulavisa kikuniku chi Lisandugu lia malago kunangwa avuli kukelora nukukuza.

¹⁴ Alavugula malala ku masahi gi giriki nukuguuha imbiri wi kikuniku, nekedete chiche kandi aluuha malala kugo imbiri wi Lisandugu lia malago haali saba.

¹⁵ Niyakamara kokora ndio, alasinzira avandu imburi ekole yikihaanwa chu uvwoni kandi alaleeta masahi gayo havundu hatakatifu ligali nukuguuha ku kikuniku kandi imbiri wi Lisandugu lia malago kuli yakola na masahi gi giriki.

¹⁶ Munzira yiyi alakola muruka gwu kutakasa havundu hatakatifu ligali kutura ku vudamanu vwa vandu va Isiraeli kandi kutura muvwoni vwavo vwosi. Kuduuka akole ndio kandi ku Lihema liukuvuganira mu kigira liveeye hagati haavo na vaveeye vadamanu kolondekana nu muruka.

¹⁷ Kutura ing'inga ya Haruni yingira havundu Hatakatifu ligali, kokora muruka gwukutakasa kuduuka lwa atulaa ichova, mundu atingira ku mu Lihema mba. Lwa mala kokora muruka yigwo kigira oyo mwene, avandu vinyumba yeeye, kandi Livugana liosi,

¹⁸ Kuduuka azie ku uvwali, kuhaana kihanwa chu kusambwa nu kuvutakasa. Gamudukira avuguli malala ku masahi gi giriki na gi mburi, nukugavaka ku zinziga ziu uvwali.

¹⁹ Aluuha malala ku masahi zana ku uvwali ne kedete chiche haali saba. Munzira yiyi alavutakasa kutura ku uvwoni vwa avandu va Isiraeli nokovokola vutakatifu

Inzira yu Kwikinga

²⁰ Lwa Haruni ava niyakamara kokora muruka gu kutakasa havundu hatakatifu ligali, Lihema liosi, kandi uvwali, hene yaho alahaana ku Yahova imburi eveeye mwoyo etovoleywe kigira Azazeli.

²¹ Alaviika makono geege gombi ku mutwi gwi imburi eveeye mwoyo nokwiyamira kuyo vwoni vwosi, kandi uvwibaali vwosi vwa avandu va Isiraeli, na alavuvika ku mutwi gwi imburi yeyo. Maku imburi zana ilakungwa izie mwigendanyama nu mundu uva natovoleywe kokora muyinzi yigwo.

²² Imburi zana ilaginga vudamanu vwavo vwosi nokuvuhila mukivala kitaveeye mu navandu. Mundu zana alalakuula imburi zana mwigendanyama.

²³ Kunangwa Haruni alingira mu Lihema Liukuvaniramu, na alatuliza zinguvu zizie ziuvusalisi, zia yiviika nakikiri kwingira havundu Hatakatifu ligali, na alazileka hazana.

²⁴ Kuduuka yisingiri havundu hatakatifu, ma yiviiki zinguvu zizie mwene. Inyima wa yaga, alatula kuzia ichova kuhaana kihanwa chukusambwa kutulizaho uvwoni vwivwe kandi uvwoni vwa avandu.

²⁵ Alasamba itinya yi kihanwa chu vwoni ku uvwali.

²⁶ Mundu wahila imburi mwigendanyama ku Azazeli, kuduuka afuuyi zinguvu zizie kandi yisingi nakikiri kwingira hokososa.

²⁷ Igiriki ni imburi, viatumikirwa kigira kihanwa chu uvwoni, via masahi gavio galeetwa havundu Hatakatifu ligali kutuliza ho uvwoni, vilahirwa chova wa hokososa nu kusambwa. Kesero, inyama na mala vilasambwa.

²⁸ Oyo uvisamba kuduuka afuuyi zinguvu zizie kandi yisingi nakiri kwirana hokososa.

Lidiku lie Lisamiifa Uvwoni

²⁹ Yili lilava lilago lie mihiga ni mihiga ku munyi. Ku lidiku lie likomi liu mweli gwa Saba, avandu va Isiraeli vosi navageni vosi avamenyaa hagati haavo, kuduuka vahonge lilia kandi vatakola miyinzi josi mba.

³⁰ Ku lidiku yilio muruka gulakolwa gwukuvatakasa kutura muvwoni vwavo kunangwa vaduuki kuva valahi imbiri wa Yahova.

³¹ Lidiku yilio lilava lidiku litakatifu ligali, lilara lisabato, liokohonga lilia kandi lia mutakola miyinzi josi mba. Malago yaga galalondwa kazozo.

³² Musaalisi Munene, uwaviikwa ku makono nukuvakwa maguta kuva musaalisi muvogono vwa baba weve, alakola muruka gwilitakasa. Aliviika zinguvu ziu vusaalisi

³³ kandi akole muruka gwukutakasa havundu Hatakatifu ligali, Lihema liosi Liukuvuganira mu na Yahova, uvwali, avasaalisi, kandi avandu vosi.

³⁴ Malago yaga galakolwa lulala vuli muhiga kutakasa avandu va Isiraeli kutura muvwoni vwavo vwosi. Kunangwa, Musa yakola kuli Yahova yamulaga.