Kyavalevi 15 - KITABU KITAKATIFU

Amahila Kutura mu Muviri

¹ Yahova yahaana ku Musa na Haruni Malago yaga.

² Ku avandu vosi Isiraeli na vavoolere ndi, lwu mundu woosi atulaa mahira mu muviri gwigwe, litula lia mahira yilio liveeye lidamanu,

³ kali niiva galazizagilira kutura, anoho galekele, galamukola mudamanu.

⁴ Kidali choosi chayikala ku anoho cha agona ku, keveeye kidamanu.

⁵ Mundu, woosi udiira kukidali chiche kuduuka afuuyi zinguvu zizie kandi yisingi namazi, na alava mudamanu kuduuka hamugorova.

⁶ Mundu woosi wikala ku kindu choosi chu mundu oyo yikala ku, alafuuya zinguvu zizie nukwisinga mazi na lava mudamanu kuduuka hamugorova.

⁷ Mundu woosi udiira ku mundu oveeye nikisununu kuduuka afuuyi zinguvu zizie nokwisinga mu mazi, na alava mudamanu kuduuka hamugorova.

⁸ Niiva mundu wikisununu natuuza mate ku oyo oveeye mulahi, mundu oyo kuduuka afuuyi zinguvu zizie ma yisingi namazi, na alava mudamanu kuduuka hamugorova.

⁹ Kesero anoho endeve yu mundu wi kisununu yikala ku eveeye indamanu.

¹⁰ Mundu woosi udiira ku kindu choosi cha oyo wikisununu yikala ku, alava mudamanu kuduuka hamugorova. Mundu woosi ugingaa kindu choosi chu mundu wikisununu yikala ku, kuduuka afuuyi zinguvu zizie kandi yisingi mu mazi, na alava mudamanu kuduuka hamugorova.

¹¹ Niiva mundu oveeye nikisununu adiira mundu nakikiri kwisaava makono geege kutanga, mundu oyo afuuyi zinguvu zizie nokwisinga, kandi alava mudamanu kuduuka hamugorova.

¹² Zinyingu ziosi zia oyo oveeye nikisununu adiira ku, kuduuka ziatanywe kandi uluju lwavazwa kumusaala lwosi lwa adiira ku kuduuka lwogizwi namazi.

¹³ Mundu oyo namali kohona kisununu chiche, kuduuka alindi madiku saba maku afuuyi zinguvu ziezie nokwisinga mumazi malahi kutura mu kidaho, naye alava mulahi.

¹⁴ Ku lidiku lia munane alavugula makuulu gaviri gu muvulimu anoho makuulu gaviri matugi na alazia nago ha vwingiliru vwi Lihema liu kuvuganira, imbiri wa Yahova, nokugahaana ku Musaalisi.

¹⁵ Musaalisi alahaana lilala kugo kuli kihanwa chu uvwoni ni lindi kuli kihanwa chukusambwa. Munzira yiyi musaalisi alamulombera muruka gwukwogiza uvwoni vwivwe.

¹⁶ Lwu mundu musaza alootaa ndi aveeye nu mukali ma yeyonogonyie muviri gwigwe gwosi, alava mudamanu kuduuka hamugorova.

¹⁷ Kindu choosi, cha lombwa kutura kunguvu anoho kesero chu vusaza vwivwe vuziaku, kilava kidamanu kuduuka hamugorova.

¹⁸ Inyima wumusaza kuva harara numukali, kuduuka vombi visingi na mazi, na valava vadamanu kuduuka hamugorova.

¹⁹ Lwu mukali ava naveeye mu ing'inga yeeye yu mweli, alava mudamanu ku madiku saba. Mundu woosi udiira mukali oyo alava mudamanu kuduuka hamugorova.

²⁰ Kindu choosi cha yikala ku anoho chagona ku mu ing'inga yeeye yu mweli kilava kidamanu.

²¹ Mundu woosi udiira ku kidali chiche alafuuya zinguvu zizie kandi alava mudamanu kuduuka hamugorova.

²² Mundu woosi udiira kindu choosi chu mukali oyo yikala ku alafuuya zinguvu zizie kandi yisingi na alava mudamanu kuduuka hamugorova.

²³ Niiva nikukidali anoho choosi cha yaali niyikayange ku, mundu woosi udiira ku, alava mudamanu kuduuka hamugorova.

²⁴ Niiva musaza ava naagona harara numukali oyo mu ing'inga yeeye yu mweli, alava mudamanu ku madiku saba; na kidali choosi chagona ku kilava kidamanu.

²⁵ Niiva mukali aveeye nilitaaza masahi ku madiku manyingi kuvita madiku geege gu mweli, anoho litaaza masahi lilie lizizagilira kuvita ing'inga yeeye ya kazozo, alava mudamanu ku lohono lwa zizagilira kutaza kuli aveeza vuzwa ing'inga yeeye yu mweli.

²⁶ Kidali choosi cha ava naagona ku na kandi choosi cha yikala ku mu ing'inga yiyi keveeye kidamanu.

²⁷ Mundu woosi udiira ku vindu yivi kuduuka afuuyi zinguvu zizie kandi yisingi. Alava mudamanu kuduuka hamugorova.

²⁸ Inyima wi litaaza lilie lilekela, kuduuka alindi madiku saba; ma ku alava mutakase.

²⁹ Ku lidiku lia munane alavugula makuulu gaviri gumuvulimu anoho makuulu gaviri matuge na agahili ku musaalisi ha vwingiliru vwi Lihema liu kuvuganiramu na Yahova.

³⁰ Musaalisi alahaana lilala kuli kihanwa chu uvwoni na lindi kuli kihanwa chukusambwa. Munzira yiyi alamulombera muruka gwu kutakaswa.

³¹ Yahova yavolera Musa yiganihizi avana va Isiraeli ku vudamanu vwavo; kunangwa vavuli kwonogonyia Lihema lilie liukuvuganira mu, liali hagati haavo. Nivakakoli ndio vaali valitwa.

³² Yaga na malago ku musaza uva natura mahira muvusaza vwivwe kigira kisununu anoho uva nalotaa ndi aveeye harara nu mundu mukali,

³³ mukali oveeye mu ing'inga yeeye yu mweli, anoho musaza uva naagona nu mukali oveeye mudamanu kolondekana numwima.