Kyavalevi 14 - KITABU KITAKATIFU

Litakaswa Inyima wu Kulwaala Vulwaye vwo Vogere

¹ Yahova yahaana ku Musa,

² malago yaga kigira litakaswa liu mundu oveeye novogere ku lidiku lia aleetwa ku musaalisi aduuki kutakaswa.

³ Musaalisi alamutuliza ichova wa hokososa nukumuhenzeliza. Niiva vulwaye zana vumali kohona,

⁴ Musaalisi alamulaga aleete manyonyi gaviri agaveeye malahi kolondekana nidini, harara nu lubaho lwumusaala gwu mudaragwa, luvusi lwakanyu nu luvinu, viletwe kuye kigira oyo wenyaa kutakaswa.

⁵ Maku musaalisi alalaga lilala ku manyonyi yago gasinzilwi ku luju lwi lidohi niloveeye ku na mazi kutura mu kidaho.

⁶ Alavugula linyonyi litigaye mwoyo, nukuliina, harara nulubaho lwu mudaragwa, nuluvusi lwakanyu, nuluvinu, mu masahi gi linyonyi lisinziywi.

⁷ Aluuha masahi zana haali saba ku mundu wenyaa kutakaswa kutura ku vulwaye vwo vogere, ma ku alamulandiza, mundu oyo kuva mulahi. Alalakuula linyonyi liveeye mwoyo libuluki kuzia muvulimu.

⁸ Oyo wenyaa kutakaswa kutura ku vulwaye alafuuya zinguvu zizie, avege liisu lilie liosi, kandi yisingi na mazi. Alava mulahi kolondekana ni miima. Inyima wa yaga, anyala kwingira mu hokososa, navuzwa alamenya ichova wi lihema ku madiku saba.

⁹ Ku lidiku lia saba, alavega liisu ku mutwi gwigwe gwosi, zinderu zizie, vigohe vivie, kandi liisu liu kumuviri gwigwe liosi. Kuduuka afuuye zinguvu zizie ziosi, ma yisingi na alava mulahi.

¹⁰ Ku lidiku lia munane, kuduuka aleete vimeme via magondi mamigu viviri vugira imbara ne kememe kisuveni chu muhiga mulala vugira imbara, zikilo zivaga ziuvusie vuzuganyiywi mu maguta ga muzeituni, kandi kedonye kilala ku vivaga chi liita ndala ya maguta ga muzeituni.

¹¹ Musaalisi zana alaleeta mundu oyo harara ni vindu yivio imbiri wa Yahova, ha vwingiliru vwi Lihema liu kuvuganira mu na Yahova.

¹² Maku musaalisi alavugula kilala ku vimeme vimigu harara nekedonye kilala ku vivaga chi liita ya maguta, nokuvihaana kuli kihanwa chu kutuliza uvwoni; alakihaana kuli kihanwa chagimwa imbiri wa Yahova kigira musaalisi.

¹³ Gamudukira asinziri kememe chi ligondi zana havundu hatakatifu hi vihaanwa viu uvwoni ni vihaanwa viukusambwa visinzirwaa. Gamuduukira akole ndio kigira kihanwa kuli kihanwa chu uvwoni, keveeye chu musaalisi, keveeye kitakatifu ligali.

¹⁴ Musaalisi alavugula ku masahi ge kememe chi ligondi ekeveeye kihanwa chu uvwoni nu kugavaka ku gutu gwu mukono mulungi, nokokedete kenene chu mukono mulungi, nokokeno kenene chekerenge kilungi cha mundu wenya kulandizwa kuva mutakase.

¹⁵ Musaalisi alavugula ku maguta ga muzeituni nokugitulaa ku kigalo chiche mwene chu mukono mumosi.

¹⁶ Aliina kedete chu mukono mulungi mu maguta zana, na aluuha malala ku maguta zana nekedete haali saba imbiri wa Yahova.

¹⁷ Alavugula malala ku maguta gaveeye ku kigalo chu mukono gwigwe kandi malala ku masahi ge kememe nu kugavaka ku gutu gwu mukono mulungi, ku kedete kenene chu mukono mulungi, kandi ko keno kenene che kelenge kilungi chu mundu uyu wenyekaa alandizwi kuva mutakase.

¹⁸ Alaviika maguta gatigaye ku kigalo chiche ku mutwi gwa oyo utakaswa. Munzira yiyi musaalisi alalombera mundu oyo muruka gu kusamiiha uvwoni imbiri wa Yahova.

¹⁹ Maku, musaalisi alahaana kihanwa chu uvwoni nokolombera mundu oyo muruka gwu kusamiha uvwoni. Inyima wa yago, alasinza kihanwa chukusambwa

²⁰ kandi alikihaana harara ni kihanwa chu vuswage ku uvwali. Munzira yiyi musaalisi alamukolera muruka gwu kutakaswa na mundu oyo alava mulahi kolondekana ni miima.

²¹ Niiva mundu oyo aveeye mudaka na sianyala konyoora ivindu vienyeka, alaleeta kememe kimigu kilala kuva kuli kihanwa chiche chu uvwoni, kihanwa kidukiru ku Yahova, kigira musaalisi. Alaleeta kilo ndala yu vusie vuzuganyiywi mu maguta ga mizeituni kuva kihanwa chu vuswage kandi kedonye kilala ku vivaga chi lita ya maguta ga muzeituni.

²² Alaleeta kandi makuulu gaviri gu muvulimu, anoho makuulu gaviri matugi, lilala kigira kihanwa chu uvwoni ni lindi kigira kihanwa chu kusambwa.

²³ Ku lidiku lia munane lie litakaswa lilie, alageleeta ku musaalisi ha vwingiliru vwi Lihema liukuvaganira mu na Yahova.

²⁴ Musaalisi alavugula kememe na maguta ga muzeituni nukuvihaana kuli vihaanwa viagimwa ku Yahova kigira Musaalisi.

²⁵ Musaalisi alasinza kememe na vuguli malala ku masahi zana agavake ku gutu gwu mukono mulungi gwu mundu oyo, nokukedete kenene chu mukono gwigwe mulungi nokokeno kenene chekerenge kilungi.

²⁶ Musaalisi alitulaa malala ku maguta zana mu kigalo chu mukono mumosi gwigwe.

²⁷ Musaalisi aluuha ne kedete chiche kilungi malala ku masahi gaveeye ku kigalo chiche kemosi haali saba imbiri wa Yahova.

²⁸ Alaviika malala ku maguta gaveeye ku kigalo chu mukono mumosi ku gutu gwu mukono mulungi havundu harara here kuli aviiki masahi ku gutu gwu mukono mulungi, ku kedete kenene chu mukono mulungi, kandi ku keno kenene chekerenge kilungi.

²⁹ Maguta gatigaye goosi ku kigalo, alagavaka ku mutwi gwu mundu utakaswa kumulombera muruka gu kusamiha uvwoni vwivwe imbiri wa Yahova.

³⁰ Maku alahaana lilala ku makuulu matugi anoho gumuvulimu

³¹ lilala kuli kihanwa chu uvwoni ni lindi kuli kihanwa chukusambwa harara nikihaanwa chu vuswage. Munzira yiyi, musaalisi alalomba muruka gwu kutakasa.

³² Yili nilio lilago ku mundu oveeye nuvulwaye vwukutihiza vwo ovogere, navuzwa utanyaliza konyoora vihaanwa via kazozo vienyeka ku litakaswa lilie.

Uvuguku mu Zinyumba

³³ Yahova yavolera Musa na Haruni,

³⁴ Lwa muduuka mu kivala cha Kanaani, chamuhezaa kuva mwandu gwinyu, ma mbiki mu vulwaye vulandaa kuli vuguku muinyumba, mukivala yicho,

³⁵ mwene inyumba yeyo kuduuka azie kovoolera musaalisi, mali kolola vulwaye kuli vuguku muinyumba yange.

³⁶ Musaalisi alavolera avandu vatulizi ivindu viosi viveeye muinyumba yeyo vivuli kulandizwa kuva vidamanu;

³⁷ Musaalisi alahenzeliza vuguku zana. Niiva vuguku vulava kuli vulimu anoho vwakanyu, vuyavugululaa nu kwingira kuduuka musi mwi lidigi,

³⁸ Musaalisi alatula ichova nukuhaana inyumba zana yeyo ku madiku saba.

³⁹ Ku lidiku lia saba, Musaalisi alilana kohenzeriza inyumba yeyo kandi. Niiva vuguku vumali kulanda ku madigi,

⁴⁰ gamuduukira avolere avandu vatulizi magina gaveeyeku nu vuguku ma gasiuvwi havundu ahadamanu ichova wi lidaala.

⁴¹ Inyima wa yago, kuduuka avolere avandu vahalagate amadigi gumuusi goosi zimbega ziombi. Amakindi gahalagatiywi galasundulwa havundu hadamanu ichova wi lidaala.

⁴² Maku magina gandi galaletwa nokugavika mu vogono vwa yago gatuliziywi. Valaleta vodohi vundi vuhia vahome kukunika lidigi.

⁴³ Niiva vuguku vuliranira kandi muinyumba inyima wa magina gamali kutulizwa na madigi kuhalagatwa nokohomwa vuhia kandi,

⁴⁴ Musaalisi alazia kogehenza. Niiva vuguku vumali kulaanda muinyumba yeyo inyumba eveeye indamanu.

⁴⁵ Kuduuka inyumba yeyo isambulwi yoosi, na magina gayo, misaala jayo, vodohi vwayo vwosi kuduuka vigingwi kutura mu lidaala kusiuvwa havundu hadamanu.

⁴⁶ Mundu woosi wingira muinyumba zana yeyo niihaniywi, alava mudamanu kuduuka hamugorova.

⁴⁷ Mundu woosi ogonaa muinyumba yeyo, anoho aliili mu chukulia kuduuka afuuyi zinguvu zizie.

⁴⁸ Niiva musaalisi yingira nokohenzeriza inyumba yeyo ma anyoore vuguku sivwayilanira kololeka inyima wi lihomwa lie inyumba yeyo vuhia, alalandiza inyumba yeyo kuva indahi kigira vuguku vumali kutulizwa ligali.

⁴⁹ Kutakasa inyumba zana yeye musaalisi alavugula manyonyi gaviri, misaala ji midaragwa, musibi mwakanyu, nu luvinu.

⁵⁰ Alasinzira linyonyi lilala ku luju lwi lidohi, niloveeye ku na mazi kutura mu kidaho.

⁵¹ Maku alavugula misaala jie midaragwa, luvinu, musibi mwakanyu, nilinyonyi liveeye mwoyo, kandi alariina mu masahi gi linyonyi lisinziywi kandi kuliina mumazi gaturaa mu kidaho. Kandi alaguuha haali saba kuinyumba.

⁵² Munzira yiyi, alatakasa inyumba namasahi gilinyonyi, na mazi gaturaa mu kidaho, linyonyi liveeye mwoyo, misaala jie midaragwa, luvinu kandi musibi mwakanyu.

⁵³ Maku alalakuula linyonyi liveeye mwoyo libuluki kutura ichova wi lidaala kuzia muvulimu; kunangwa alatakasa inyumba na ilava indahi.

⁵⁴ Yaga nigo malago kolondekana nu vulwaye vwo vogere,

⁵⁵ vwu vuguku, vwu muzinguvu, anoho muinyumba

⁵⁶ kandi kigira livimba anoho kusiruka anoho livondo;

⁵⁷ kumanyiriza lwi kindu keveeye kilahi anoho kidamanu. Yaga nigo malago gu vulwaye vwu kuhambizana anoho vuguku.