Kyavalevi 13 - KITABU KITAKATIFU

Amalago Kolondekanaa Nuvulwaye vwu Kuligodo

¹ Yahova yahaana ku Musa na Haruni malago yaga:

² Mundu woosi naava naveeye ni livimba ku ligodo liumuviri gwigwe, anoho livondo, anoho ingwagu vunyala kuva vulwaye vudamanu vwo vogere ku muviri gwigwe, hene yaho, alaletwa ku Haruni musaalisi, anoho ku mulala ku avayaayi veve oveeye musaalisi.

³ Musaalisi alahenzeliza vulwaye vwi ligodo lilie, niiva maswa gagirung'ana kuva malavu, na liloleka lie ingwagu liveeye musi kuvita ligodo liu muviri gwigwe likumbiriizi hazana liveeye lilwaala liovogere. Musaalisi alamulandiza kuva mudamanu.

⁴ Niiva livondo liveeye lilavu, navuzwa sililolekaa kuva musi mwi ligodo, na maswa gaveeye ku sigaveeye malavu, musaalisi alaviika mundu oveeye nuvulwaye oyo halovega ku madiku saba.

⁵ Musaalisi alamuhenzeliza ku lidiku lia saba niiva mu lilola lilie lilwaala lilie lilolekaa kuva lilala liere, na sililandi mba, alamuviika halovega yenyine ku madiku gandi saba.

⁶ Musaalisi alamuhenzeliza kandi ku lidiku lia saba, niiva livondo limali kuniara, kandi sililandi mba, musaalisi alamulandiza kuva mulahi kolondekana ni miima. Mundu oyo alafuuya zinguvu zizie na ave mulahi kolondekana ni miima jidiini.

⁷ Navuzwa niiva vulwaye yivwo vulalaanda inyima wu musaalisi amali kumuhenzeliza nukumulandiza kuva mulahi, kuduuka yirani kwimanyia imbiri wu musaalisi kandi.

⁸ Musaalisi alamuhenzeliza kandi. Niiva vumali kulanda alamulandiza kuva mudamanu; voveeye vulwaye vwu kutihiza vwo vogere.

⁹ Niiva mundu woosi aveeye nu vulwaye vwukutihiza vwo vogere, kuduuka aleetwe ku musaalisi,

¹⁰ umanya amuhenzelizi. Niiva haveeye ni livondo lilavu ku ligodo lilie ligirung'anyia maswa kuva malavu, kandi niliizuyi mahira,

¹¹ vulwaye yivwo voveeye ovogere vwa madiku manyingi. Musaalisi alamulandiza kuva mudamanu. Sialamuviika halovega kutura ku vandi mba, kigira aveeye mudamanu.

¹² Niiva vulwaye vwo ovogere vulalaanda kandi vumale muviri gwosi kutura ku mutwi kuduuka ku virenge,

¹³ musaalisi alamuhenzeliza kandi. Niiva anyoora ndi muviri gwosi gumali kukuvuka, kuduuka alandizi mundu oyo kuva mulahi kolondekana ni miruka jiidini. Niiva ligodo liu muviri gwigwe liosi limali kugirung'ana, aveeye mulahi kolondekana ni miima.

¹⁴ Navuzwa kutura ing'inga yi ingwagu elolekaa, mundu oyo alava mudamanu.

¹⁵ Musaalisi alamuhenzeliza kandi, niiva alolaa ingwagu kuye, musaalisi, alamulandiza kuva mudamanu. Ingwagu imanyia ndi aveeye nuvulwaye vudamanu vwovogere, mundu oyo aveeye mudamanu.

¹⁶ Navuzwa lwi ingwagu ehonaa, mundu zana alazia ku musaalisi,

¹⁷ umanya amuhenzelizi kandi. Niiva havundu halwayange zana hahoni, aveeye mulahi kolondekana ni miima jiidini; na musaalisi alamulandiza kuva mulahi.

¹⁸ Niiva mundu woosi aveeye ni livimba limali kohona,

¹⁹ kandi niiva lwinyima livimba lilavu anoho livondo liveeye mu nuvulavu nuvwakanyu liloleka hi livimba liali, kuduuka azie ku musaalisi.

²⁰ Musaalisi alamuhenzeliza, kandi niiva havundu zana yaho halolekaa kuyavuguka kuvita ligodo lihakumbirizi, kandi amaswa gaveeye mu gaagirung'ani kuva malavu, alamulandiza kuva mudamanu. Voveeye vulwaye vwo vogere vutangi mu livondo zana.

²¹ Navuzwa niiva musaalisi alalihenzeliza ligali ma anyoore ndi maswa gaveeye mu sigagilung'ani kuva malavu mba, kandi sihayavuguka kuvita ligodo lihakumbirizi, navuzwa haveeye nigwagu mu ligodo, musaalisi alambiika halovega ku madiku saba.

²² Niiva halalanda mu ligodo, hene yaho musaalisi alalandiza mundu oyo kuva mudamanu; aveeye nuvulwaye.

²³ Navuzwa nihavula kugirung'ana kandi havuli kulaandaa, haveeye vuzwa imbara yaatigara; musaalisi alamulandiza kuva mulahi kolondekana ni miruka jiidini.

²⁴ Niiva mundu amali kusambika ligodo, ma inyama imbisi hazana igwi indavu anoho yu vwakanyu,

²⁵ musaalisi alamuhenzeliza. Niiva maswa gaveeye havundu yaho gamali kugirung'ana kandi galoleka kuyavuguka kuvita ligodo lihakumbirizi, yivwo voveeyevulwaye vwo vogere, uvumali kutangira havundu hasambiki yaho, musaalisi alamulandiza kuva mudamanu.

²⁶ Navuzwa niiva maswa gaveeye mu sigagilung'ani kandi sihayavuguki kuvita ligodo lihakumbirizi, navuzwa liveeye ningwagu, musaalisi alamuviika halovega kulwamadiku saba.

²⁷ Musaalisi alamuhenzeliza kandi ku lidiku lia saba, kandi niiva halalanda, vulwaye yivwo voveeye vogere; musaalisi alamulandiza kuva mudamanu.

²⁸ Navuzwa niiva havundu yaho halavula kugirung'ana, kandi sihalaandaa mba, kandi haniaye, yivwo sivoveeye vulwaye vwo vogere mba. Musaalisi alamulandiza kuva mulahi kolondekana ni miima; kigira haveeye vuzwa imbara kutura kulisambika.

²⁹ Lwu musaza anoho mukali aveeye niliguli ku mutwi anoho ku kinaanwa chiche,

³⁰ musaalisi alamuhenzeliza.

³¹ Niiva musaalisi amuhenzaa, havundu halwaala yaho ma alole nihayavuguki kuvita ligodo lihakumbirizi, kandi maswa galoleke kuli vuduugi, kandi mangelere, musaalisi alamulandiza kuva mudamanu, kigira keveeye chiyago chu mutwi anoho kukinanwa.

³² Musaalisi alahenzeliza havundu halwaala zana ku lidiku lia saba, niiva sililandi mba, kandi amaswa gi ligondo liu vuduugi sigaveeye ho kandi sihayavuguki kuvita ligodo lihakumbirizi mba,

³³ mundu oyo alavega mutwi gwigwe navuzwa aleke havundu haveeye ningwagu. Ahene yaho musaalisi alamuviika halovega ku madiku gandi saba.

³⁴ Ku lidiku lia saba, musaalisi alamuhenzeliza kandi, na niiva halwaala zana sihalaandi kandi sihayavuguki kuvita ligodo lihakumbirizi, alamulandiza kuva mulahi. Mundu oyo alafuuya zinguvu zizie kandi naye alava mulahi.

³⁵ Navuzwa niiva livondo lilalaanda inyima wukulandizwa ndi aveeye mulahi,

³⁶ musaalisi alamuhenzeliza kandi. Niiva havundu halwaaye yaho hamali kulaanda, sigamuduukira kwenyeleriza maswa ni gaveeye ga mayayi mba; mundu oyo siaveeye mulahi mba.

³⁷ Navuzwa niiva mu lilola liu musaalisi livondo sililandi mba kandi maswa guvulavu gavilukaa hazana, livondo yilio limali kohona, kandi musaalisi alamulandiza kuva mulahi kolondekana ni miima.

³⁸ Lwu musaza anoho mukali aveeye namavoondo malavu ku ligodo lilie,

³⁹ musaalisi alamuhenzeliza. Niiva mavondo gaveeye malavu hake vuzwa, yilwo loveeye lwiyage vuzwa ulutangi ku ligodo lilie; mundu oyo aveeye mulahi kolondekana ni miima.

⁴⁰ Niiva liisu liu mundu nilitura imbiri anoho inyima wu mutwi gwigwe, yaga siganyala kumukola kuva mudamanu mba.

⁴¹ Niiva liisu liu musaza litula ku mutwi gwigwe mu vweni, aveeye vuzwa nekemeeni. Aveeye mulahi kolondekana ni miima.

⁴² Navuzwa niiva ingwagu yu vulavu nu vwakanyu elolekaa ku kemeeni, yivuo voveeye vulwaye vwo vogere.

⁴³ Musaalisi alamuhenzeliza, na niiva ingwagu yu vwakanyu nuvulavu eveeye ho,

⁴⁴ musaalisi alamulandiza kuva mudamanu kigira aveeye nu vulwaye vwo vogere ku mutwi gwigwe.

⁴⁵ Mundu oveeye novogere kuduuka yiviiki zinguvu zia madali, atasanula liisu lilie mba, afuumi mumoni mwimwe, ma alangilizi, “Mudamanu! Mudamanu!”

⁴⁶ Alava mudamanu kolohoono lwaveeye nuvulwaye yivwo, kandi kuduuka amenye ichiova wa ahokososa, ihale kutura ku vandi.

Amalago Kolondekana nu vuguku

⁴⁷ Lwu vuguku vuva nivoveeye kunguvu, kali yu vwoya vwa magondi anoho yi katani,

⁴⁸ anoho ku kedonye choosi chinguvu yu vwoya anoho yikatani anoho ku kesero anoho ku kindu choosi chalombwa ku kesero,

⁴⁹ niiva vwakava nivoveeye vwu vulimu anoho vwakanyiliru, voveeye vuguku vulandaa; kuduuka musaalisi amanywe.

⁵⁰ Musaalisi alavohenzeliza kandi aviiki kindu cha voveeye ku ihale ku madiku saba.

⁵¹ Alavohenzeliza kandi ku lidiku lia saba, niiva vuguku yivu vulaandi, kindu cha voveeye ku yicho keveeye kidamanu.

⁵² Musaalisi alakisaamba, kigira voveeye vuguku vulandaa vuduukana vudivizwi nu muliru.

⁵³ Navuzwa niiva lwa avohenzeliza, ma anyoore ndi vuguku zana sivulaandi mba,

⁵⁴ alaga ndi vwogizwi kandi kindu chogiziywi yicho kuduuka kiviikwi ihale ku madiku gandi saba.

⁵⁵ Maku alavohenzeliza, niiva vuguku zana sivugilung'ani mba, kali niiva sivulaandi, kindu yicho kikikiri vuzwa kidamanu, kuduuka ukisaambe; kali niiva ligunda liveeye imbiri anaho inyima wacho.

⁵⁶ Navuzwa niiva musaalisi avohenzeliza kandi, ma alole vuguku vumali kubuhira alavutandula vutuli kunguvu anoho ku kesero.

⁵⁷ Maku niiva vuguku vololekaa kandi, kandi vulandaa, mwene inguvu yeyo anoho kesero yicho kuduuka asambe kindu cha voveeye ku.

⁵⁸ Niiva alafuuya kindu cha voveeye ku ma ikiba zana kegote, alakifuuya kandi na kilava kilahi kolondekana ni miima.

⁵⁹ Yili liveeye lilaga kigira vuguku ku zingu vu ziuvwoya anoho katani, anoho kitambaya chu vwoya anoho ku kindu choosi chalombwa ku kesero. Nindio gamanyikanaa niiva keveeye kilahi anoho kidamanu kolondekana ni miima.