Kyavalevi 12 - KITABU KITAKATIFU

Litakaswa lia Avakali Nivaakivula

¹ Yahova yahaana ku Musa malago yaga,

² avolere vandu va Isiraeli ndi. Mukali naavereka, ma yiivuli mwana muyaayi, alava mudamanu ku madiku saba; kuli vuzwa aveeza mudamanu naveeye mu mweli.

³ Ku lidiku lia munane, mwana zana alakevwa.

⁴ Kunangwa mukali oyo alava mu liliinda ku madiku gandi salasini na tatu ku atakaswe kutura mu litaza masahi lilie. Atadiira ku kindu kitakatifu kandi sialingira mu Lihema litakatifu amadiku gilitakaswa lilie nigagikiri kuduuka mba.

⁵ Niiva aliivula mwana mukaana, mukali oyo alava mudamanu ku madiku likomi na gane, kuli aveeza mu madiku geege gumweli. Ing'inga yi litakaswa kutura mu masahi geege ilava madiku gandi 66.

⁶ Lwi ing'inga yi litakaswa lilie iva niyakafa, naave mwana muyaayi anoho mwana mukaana alaleeta kememe chi ligondi chu muhiga mulala ku musaalisi ha vwingiliru vwi Lihema liukuvuganira mu na Yahova, kuva kihanwa chu kusambwa. Alaleeta kandi, likuulu lilala litugi anoho liumbulimu kuva kihanwa chu vwoni.

⁷ Musaalisi zana alavihaana imbiri wa Yahova, nokolombera mukali oyo chukutulizaho uvwoni vwivwe, naye alatakaswa kutura ku litaaza masahi lilie. Yili ni lilaga ku oyo wivuuyi mwana muyaayi anoho mwana mukaana.

⁸ Niiva mukali oyo sianyala konyoora kememe chi ligondi chumuhiga mulala, alaleeta makuulu matugi gaviri anoho makuulu gu muvulimu gaviri; lilala kuva kihanwa chiche chukusambwa, na lindi kuva kihanwa chiche chuvwoni. Na musaalisi alamulombera chukutulizaho uvwoni vwivwe, naye alatakaswa.