Kyavalevi 1 - KITABU KITAKATIFU

Visiuviliru viu Kusambwa

¹ YAHOVA yalanga Musa kutura mu Lihema liu Kuvuganira mu, namuvolera,

² amolome ku vandu va Isiraeli, avavoolere ndi: Lwu mundu woosi aleetaa kihanwa chiche chu mutugu ku Yahova, alaleeta Kihanwa chiche keveeye kilala ku mitugu, kuli ku zing'ombe zizie anoho ku magondi gege anoho ku zimburi zizie.

³ Niiva ahaanaa ndala ku zing'ombe zizie kuva kuli kihanwa chu kusambwa, kuduuka ahaane igiriki itaveeye nimbara. Alageleeta ha vwingiliru wi Lihema liu kuvuganira mu YAHOVA, kunangwa Yahova aduuki kumuvugilira.

⁴ Mundu uhaanaa kihanwa zana, alaviika mukono gwigwe mulungi ku mutwi gwacho nacho kilavugilirwa kuli kisiuviriru chu kusamiiha vwoni vwivwe.

⁵ Aliitira igiriki zana ahene yaho, na avasaalisi, avayaayi va Haruni, valahaana masahi ku Yahova na valaguuha ku zinduru ziosi zine ziuvwali, ovoveeye ha vwingiliru vwi Lihema.

⁶ Naye alanyeenya kihanwa chu kusambwa yicho nokukikalanyia mu vidonye.

⁷ Avayaayi va Haruni musaalisi valalohiza zingu ku uwaali nukufaana muliru.

⁸ Valaviika vidonye vie igiriki zana, harara numutwi gwayo, kandi itinya yayo ku zingu ziveeye ku muliru gwu uvwali.

⁹ Kuduuka mwene kihanwa chu kusambwa yogize viumunda vyayo ni virenge vie inyima viayo na mazi. Musaalisi uva niyimiliyi muruka yigwo, alasaamba kisiuviriru choosi ku uvwali. Lifunya mwayu gwi kihanwa chu kusambwa choosi, keveeye chu kuyaanziza Yahova.

¹⁰ Niiva mundu zana ahaanaa ligondi lilala ku chayo chiche cha magondi anoho chi zimburi, kuduuka keve kekore kitaveeye nimbala.

¹¹ Alachitira imbiri wa Yahova ko lovega lwa ivaale, wu uvwali. Musaalisi naye aluuha masahi gacho ku zimbega ziosi zine zikumberizaa uvwali.

¹² Naye alakedonyanyia mu vidonye. Musaalisi uva nakora muruka yigwo alavilohiza viosi vulahi ku muliru; harara numutwi gwayo, ni itinya yayo.

¹³ Mwene kihanwa alogiza vindu viu munda viosi ni virenge vie inyima. Musaalisi alavihaana viosi nukuvisamba ku uvwali. Keveeye kihanwa chukusambwa, kihanwa chu muliru, ichukufunyira Yahova mwayu mulahi gwu kuyaanziza.

¹⁴ Niiva mundu alahaana ku Yahova kihanwa chu kusambwa chi linyonyi, kuduuka keve likuulu anoho kidudi.

¹⁵ Musaalisi alalileeta ku uvwali, ma alavotola ligoti lialio, kandi alasaamba mutwi gwalio ku uvwali. Amasahi galio galatahizirwa kundulu kwu uvwali.

¹⁶ Alatuliza livozero harara ni vindu viveeye mu, na alavisiuva ku lovega lwi vugwi lwu uvwali, hi ligoke livikwaa.

¹⁷ Alaliatanyia hagati vugira kwavulanyia zimbaha. Musaalisi alalisambira liosi ku uvwali. Lifunya lie kihanwa chi chukulia yiki liveeye liu kuyaanziza Yahova ligali.