Kwidzulitsa 9 - KITABU KITAKATIFU

Livula kuhulira lia vandu va Isiraeli

¹ “Muhuliri, O, munyi avandu va Isiraeli! Kalunu muveeye ahimbi kwambuka Mugera gwa Jorodani, kwingira no kuvugura kivala keveeye chi zihiiri zinene kandi zie zinguru kuvita munyi. Madaala gaavo gaveeye manene kandi agumbakilwa lugaga lwa madigi matambi kuduuka mwigulu.

² Avandu vene vaveeye avataambi kandi avizingulu. Vaveeye avanene ligali, avana va Anakimu, avamwamanya, kandi avamwahulira nivatalwa ndi, ‘Nivwaha unyala kusingira imbiri wa avana va Anaki?’

³ Na vuzwa kalunu mulelorera aveene ndi Yahova Nyasaye winyu alimiira imbiri winyu kuli muliru gusambaa. Alavadiviza nokuvagehiza imbiri winyu lwa muvatulira. Kunangwa, mulavakunga nokuvadiviza vwangu kuli Yahova yamusuuviriza.

⁴ “Inyima wa Yahova Nyasaye winyu amala kumukungira avandu yavo, mutavooli mu mioyo jinyu ndi ‘Gaveeye kigira uvulungi vwitu mba, Yahova yakoleta kuvuguli kivala yiki.’ Awa, Yahova azizaa kukunga avandu vizihiiri yizi vatuli imbiri winyu kigira uvudamanu vwavo.

⁵ Sigaveeye kigira muveeye avalahi kandi mukoraa agaveeye amalungi mba, nandio Yahova amuleeka mwidikiri mu kivala chavo mba. Navuzwa gaveeye kigira vaveeye avadamanu kandi kigira Yahova Nyasaye winyu yenya aduukizi lisuuvirizwa lia yisuhira avaguuga vinyu, Aburahamu, Isaka na Yakobo.

⁶ Kunangwa muve nagiligali kumanya ndi Yahova Nyasaye winyu siyamuha kivala chuvutugi na kenoru yiki kuva miandu jinyu kigira uvutakatifu vwinyu mba. Awa muveeye avandu vi kirage.

⁷ “Mwizurizi yaga kandi mutivilira kuli mwavihiliriza Yahova Nyasaye winyu muchangalangwe mba. Kutura ku lidiku liamwatula mu kivala cha Egebeti kuduuka lidiku lia mwaduuki hano, mwayibaala ku Yahova ligali.

⁸ Kali ha kiguru cha Sinai, mwavihiliriza Yahova, kandi Yahova yavihiliriza munyi ligali kali niyenya avadivize.

⁹ Inzi ndaazia mu kiguru kohevwa vibaho via magina iviang'odwa ku Lilagana lia Yahova yaali naalombi ni munyi. Ndamenya mu kiguru ku madiku arubaini, mbasu nuvudiku kandi sindaalia viukulia anoho kunwa amazi mba.

¹⁰ Maku Yahova yamba vibaho via magina gaviri ukwa yaali nang'odi nu mukono gwigwe mwene amakuva ga yamuvolera kutura hagati hu muliru ku lidiku lia mwavunga ha kiguru.

¹¹ Yee, inyima wa madiku arubaini yago, mbasu nuvudiku, Yahova yamba vibaho via magina via yaali nang'odi ku Lilagana.

¹² “Kunangwa Yahova yambolera, ‘Singira wiki hasi hi kiguru vwangu, kigira avandu vovo va wimiliraa Egebeti veyonogonyi kandi vakoli uvudamanu. Vagirung'ani koleka gandavalaga kandi velombeeye aveene kifananyi.’

¹³ “Yahova yambolera kandi, ‘Inzi manya kuli avandu yava vaveeye vi kirage.

¹⁴ Utageriza kuuzingalira mba. Ng'anagana kuvadiviza kunangwa avuli kuva ho nu mundu unyala kuvizuriza kali hakuzu. Maku ndakokola ivi ove baba wihiiri enene kandi yizingulu ligali hakuzu. Maku ndakokola ove baba wihiiri enene kandi yizingulu ligali kuvavita.’

¹⁵ “Kunangwa ndaagirung'ana kutura nisulunguta kutura ku kiguru ning'ingi vibaho viviri via magina yivio kwu Lilagana liang'odwa. Zimemo ziu muliru ziaka kutura ku kiguru.

¹⁶ Lwa ndahenza, ndaalora ndi mwali nimumali kwona ku Yahova Nyasaye winyu ku lielombera aveene kifananyi chalongwa ku kivia mulifaana lie kemoli. Mumali kugirung'ana nonoho kutura kunzira ya Yahova yamulaga.

¹⁷ Kunangwa ndavugura vibaho viviri viamagina zana nimbilasa hasi kutura mu makono gange nimbiatanya mu vidonye.

¹⁸ Maku ndaagwa hasi kandi mamumama imbiri wa Yahova kuli maziambiri ku madiku arubaini na sindaalia anoho kunwa kindu kali hakuzu mba. Ndaakola ndio kigira mwaali nimwoni ku Yahova kandi nimumuvihilirizi.

¹⁹ Ndaatia livihirirwa novutima vululu vwa Yahova, kigira yaali ahimbi kudiviza munyi. Navuzwa Yahova yambuliriza ing'inga zana yeyo kandi.

²⁰ Yahova yavihilirwa na Haruni ligali kali niyenya amwiti, kunangwa ndasaalira Haruni ing'inga zana yeyo.

²¹ Ndaavugura kindu chu vwoni chienyu yicho, kemoli kigiriki chizahabu cha mwaali nimulombi ningisigisa mu muliru. Maku ndakedonyanyia mu vidonye nokukisia nikigwa luguki kandi nisiuva luguki zana mu mugera gwaturaa mu kiguru.

²² “Munyi kandi mwavihiliriza Yahova Nyasaye winyu lwa mwaali ha Tabera kandi ha Maasa kandi ha Kibirozi Hatava.

²³ Lwa Yahova yamutuma kutura Kadeshi Barinea na malago muzie kuvugura kivala cha yaali namuheza, mwibaara kuye. Simwamusuuvira kandi simwamuhulira mba.

²⁴ Kutura nimumanya, mwayibaala ku Yahova.

²⁵ “Kunangwa ndaagwa mamumama imbiri wa Yahova amadiku arubaini mbasu nu vudiku kigira ndamanya ndi Yahova yaali nasaaviyi ligali kumudiviza.

²⁶ Kandi ndasaara ku Yahova, ‘O, Yahova Nyasaye Wuvunyali, utadiviza avandu voovo mba, avandu vawahonyia kandi nuvaleeta kutura Egebeti ku vonene vuvwo kandi ku zinguru zizio zinene.

²⁷ Wizulizi avatumikiri vovo, Aburahamu, Isaka na Yakobo. Utahenza uvuchamu vwa avandu yava anoho uvudamanu vwavo, anoho uvwoni vwavo mba.

²⁸ Gase, vandu va Egebeti valavoora ndi watamwa kuhila avandu vovo vaduuki mu kivala cha waali ni wavasuuviriza. Valavoora ndi wahila avandu vovo muchangalangwe kuvitira mu, kigira wavadunyira.

²⁹ Kali ndio yava vaveeye avandu vovo, va ivi watovola vave avoovo kandi avawatuliza Egebeti kuzinguru zizio zinene kandi ku vunyali vuvwo.’