Kwidzulitsa 8 - KITABU KITAKATIFU

Kivala kilahi chukuvugula

¹ “Muhuliri amalago goosi aga mali kuhaana ku munyi kalunu, kunangwa muduuki komenya, nokomedeka kuva vanyingi, kandi muvuguli kivala cha Yahova yasuuviriza avaguuga vinyu.

² Mwizurizi kuli Yahova Nyasaye winyu yamwimilira kologendo lutambi kuvitira mu changalangwe ku mihiga arubaini jimali kuvita, namuleetera uvudinyu vwosi no kumugeriza, kunangwa aduuki kumanya agaveeye mu mioyo jinyu, kandi niiva mulahulira malago geege.

³ Yamukola muve ninzara, ma kandi naamuliihiza imaana, chukulia cha munyi anoho avaguuga vinyu, vavura kulia ku maziambiri. Yakola yaga kumwigiza ndi mundu sianyala kuva mwoyo kigira chukulia chieng'ine mba, navuzwa ku likuva lilala litulaa ku Yahova.

⁴ Zinguvu zienyu siziakunguha kandi virenge vienyu siviaviimba ku ing'inga yi mihiga arubaini yiji mba.

⁵ Mwizurizi ndi Yahova Nyasaye winyu alungikizaa kandi ahaanaa mageri ku munyi kuli ahaanaa ku avana veve mageri.

⁶ Kunangwa, mulindi malago ga Yahova Nyasaye winyu, kandi mumenye kolondekana na malago geege.

⁷ Yahova Nyasaye winyu amuhilaa mu kivala kenoru kandi kigunamu kivala chi migera kandi visinukiru via mazi, nividaho, visinukaa mu mavoona kandi mu vigulu,

⁸ kivala chamaa ingano ni shairi, mazabibu, makuyu, maguta ga mizeituni kandi uvwuki.

⁹ Mu kivala yicho, simulava ninzara anoho lienya kindu choosi mba. Amagina gacho gaveeye mu nikivia, kandi kutura mu vigulu viacho, vatuliza mu mugasa.

¹⁰ Mulava ni viukulia viosi via mwenya kulia kandi mulahaana lisandiza ku Yahova Nyasaye kigira kivala kenoru kandi kigunamu cha amali kumuha.

Amiganihizu ku liivilira Yahova

¹¹ “Muhenze vulahi kase mulivilira Yahova Nyasaye winyu; mutivilira kuhulira malago geege, agamuheezaa kalunu mba.

¹² Lwa muva nimuveeye niviukulia viosi viamwenyaa kulia, kandi nimumali kwumbaka zinyumba zindahi mumenye mu,

¹³ kandi lwi iviayo vie zing'ombe na magondi, ifeza ni zahabu yinyu, kandi miandu jinyu ni jimali komeedeka,

¹⁴ maku mulole ndi muvuli kwigingira, ma mwiviliri Yahova Nyasaye winyu uwamuleta kutura Egebeti uwamwaali avatugwa.

¹⁵ Yamwimilira kuvitira muchangalangwe kenene kandi chukutiihiza, mwizinzoka ni izing'e ziuvusungu vululu ziali. Mu kivala chumu gada, kandi ikitaveeye mu na mazi, yalomba amazi nigidoloka kutura mu lwanda ludinyu kigira munyi.

¹⁶ Muchangalangwe, yauha imaana mulie, ichukulia cha avaguuga vinyu vavura kulia ku kali hakuzu. Yaleeta uvudinyu ku munyi aduuki kumukola mwegehizi kandi kumugeriza, kunangwa mu limalirika aduuki kumugaasiza nivindu vilahi.

¹⁷ Kunangwa mutiiganagana ndi mumali kwekola avatugi munyi aveene kuzinguru nuvunyari vwa makono ginyu mba.

¹⁸ Mwizurizi ndi Yahova Nyasaye winyu niyie umuhezaa zinguru ziukuva avatugi. Akolaa ndio kigira akikiri vuzwa musuuvirifu kalunu ku lilagana lia yalomba na avaguuga vinyu.

¹⁹ Mutivilira Yahova Nyasaye winyu, anoho kugirung'ana nokuzia ku avanyasaye vandi, kuvasigamira kandi kuvatumikira mba. Niiva mulakola ndio, mwiganihizaa kalunu ndi ligali muladivizwa.

²⁰ Niiva simulahulira Yahova Nyasaye winyu, muladivizwa kuli zihiiri zia Yahova Nyasaye azizaa kudiviza lwa muva nimuzizagilira kuvaguuta.