Kwidzulitsa 7 - KITABU KITAKATIFU

Avandu va Yahova

¹ “Yahova, Nyasaye winyu alamuleta mu kivala cha muzizaa kuvugura, kandi alakunga zihiiri zinyingi kutura mucho. Alakunga ligali zihiiri saba vatuli mukivala yicho, iziveeye zinene ligali kandi zie zinguru ligali kuvita munyi, nazio ni yizi; avandu vi zihiiri zia Hiti, Girigashi, Amori, Kanaani, Perizi, na Jebusi.

² Lwa yahova Nyasaye winyu aguutaa zihiiri yizi, kuduuka mu viiti vosi ligali. Mutahambani navo anoho kuvaveera zimbavasi mba.

³ Mutaleetani navo kali hakuzu mba,

⁴ kigira valagirung'anyia avana vinyu valeke Yahova nukusigamira avanyasaye vandi. Niiva agene yaga galekoleka, Yahova alava nu vutima vonene ni munyi, na alamudiviza nonoho.

⁵ Kunangwa, saambuli uvwali vwavo, muvunanyie muvidonye minaara mitakatifu jaavo ja magina, mutemere hasi vifananyi viu munyasaye wavo wikikali ulangwa Ashera kandi musaambe misambwa jaavo.

⁶ Mukore ndio kigira muveeye vandu va Yahova Nyasaye winyu. Kutura mu vandu vosi vilirova, Yahova Nyasaye winyu yamutovola muve avandu veve avadukiru kuvita avandu vandi.

⁷ “Yahova siyayaanza munyi kandi siyatovola munyi kigira mwavita avandu vi zihiiri zindi novunyingi mba. Nitali mwaali ihiiri engekeeke ligali ku lirova.

⁸ Navuzwa gaali kigira Yahova yamuyanza kandi yenya kutwekiza lilagana lia yasuuviriza avaguuga vinyu na yiki nicho chagira namuhonyia nu mukono gwigwe gwi zinguru kandi namuvoholora kutura mu kivala chu vutugwa, kutura mu zinguru ziu mwami wa Egebeti.

⁹ Kunangwa mwizurizi ndi Yahova Nyasaye winyu aveeye Nyasaye; Nyasaye oveeye, musuuvirifu; udukiza lilagana lilie nukuhaana zimbavasi zitaveeye nekeheri ku vandu vamuyanzaa kandi avahulira. Amakuva geege gakuduukaa ku makura zielefu.

¹⁰ Navuzwa sialilindagira kuhaana amageri maduukiru ku vandu avamudunyira mba.

¹¹ Kunangwa kalunu muhuliri malago goosi aga mwigizwa. Muhuliri malago goosi aga inzi mali kumuha kalunu, nukugakola.

Uvugasu vwu kuva muhuliri

¹² “Nimuhuliriza malago yaga goosi nukugalonda nu vusuuvirifu, kandi kugakola, ahene yaho Yahova Nyasaye winyu aladuukiza lilagana lilie nimunyi kandi alamanyia vuyanzi vwivwe vutaveeye nekeheri kuli yasuuviriza avaguuga vinyu.

¹³ Alamuyaanza kandi alamugasiza, kunangwa mu meedeke mu vunyingi vwi livaliza lienyu kandi mulivula avana avanyingi. Alagasiza milimi jinyu, kandi mulagesa vuswage, iwaini na maguta ga muzeituni. Alamugasiza ni limeedeka kulimuha zing'ombe zinyingi na magondi Alamuha vugasu yivu vwosi mu kivala cha yasuuviriza avaguuga vinyu ndi alamuha.

¹⁴ Mulagasizwa mu vutugi kuvita avandu vandi vosi. Sihalava ho numundu anoho mitugu jivula kwivura kali hakuzu mba.

¹⁵ Yahova alamukinga kutura ku vulwaye vwosi, kandi sialamuleetera zinguzu ziu kutihiza zia mwalora mu Egebeti mba, navuzwa alaziviika ku vasigu vinyu vosi.

¹⁶ Mudivize vuli ihiiri ya Yahova Nyasaye winyu amuguutira kandi mutava nizimbavasi kuvo mba; kandi mutasigamiri avanyasaye vaavo mba; kigira yigwo gulava mutego gwu vuhimwa kumunyi.

¹⁷ “Muteevolera aveene ndi, Avandu vi zihiiri yizi vaveeye avanyingi kuvita kunyi. Kunyala ndi kuvakunga vatuli mu kivala chavo?

¹⁸ Mutavatia mba; mwizurizi aga Yahova Nyasaye winyu yakola ku Mwami wa Egebeti kandi ku avandu veve vosi.

¹⁹ Mwizurizi amaduywa manene gukutihiza ga mwalora nizimoni zienyu aveene, vilolekizu, ni viokogenyia, kandi zinguru zinene nu uvunyali vwa Yahova Nyasaye winyu yamukola avavoholore. Munzira ndala nzere ya Yahova Nyasaye winyu yadivizira mu avandu va Egebeti, aladiviza zihiiri yizio ziosi zi mutiizaa kalunu.

²⁰ Kali ndio, Yahova Nyasaye winyu alatuma amahalamba hagati haavo kuduuka kali yavo aviirukira mu lievisa kutura ku munyi kuduuka vosi vadivizwi.

²¹ Kunangwa mutatia avandu yava mba. Yahova Nyasaye winyu aveeye harara ni munyi; aveeye Nyasaye munene kandi mulala wukutivwa.

²² Yahova Nyasaye winyu alakunga zihiiri yizio imbiri winyu kuduuka lwa muvingilira. Si munyala kuvadiza vosi ku ing'inga ndala mba, gase livaliza liezinyama ziu mbulimu limeedeka kuva linyingi ma geve vuhimwa vwu kutihiza ku munyi.

²³ Yahova alaguuta vasigu vinyu kandi alavakola vadegere kuduuka vadivizwi vosi.

²⁴ Alaguuta avami vaavo. Mulaviita kandi valivilirwa. Sialava ho nu mugaya mba. Muladiviza vosi sa mulala.

²⁵ Musaambe vifananyi viavazwa viosi. Mutakayirwa ifeza anoho izahabu eveeye kuvio mba, anoho kuvivugula vive vienyu mba, Yahova Nyasaye winyu avihilirwa vifananyi.

²⁶ Mutaleeta vifananyi yivi viosi mu zinyumba zienyu mba, gase kilaamo kilala chere ekeveeye kuvio kilava ku munyi. Kuduuka uvihilirwi no kuchaaya ligali vifananyi yivi kigira viveeye hasi hi kilaamo cha Yahova.