Kwidzulitsa 6 - KITABU KITAKATIFU

Lilago linene

¹ “Yaga nigo malago, ga Yahova Nyasaye winyu yandaga mwigizi. Mugalonde mu kivala cha muveeye ahimbi kwingira mu kandi kukivugula.

² Lwa muva nimukikiri mwoyo, munyi harara ni visukululwi vienyu, kuduuka muhaane luyali ku Yahova Nyasaye winyu kandi mulonde malago geege goosi aga inzi muheezaa, kunangwa muduuki komenya mu kivala kila ku ing'inga indambi.

³ O, munyi avandu va Isiraeli, mugahulirizi kandi mugalonde! Maku vindu viosi vilava vilahi ku munyi, kandi muduuki komeedeka kuva ihiiri enene ligali kandi mumenye mukivala kitugi kandi kenoru yiki kuli Yahova Nyasaye wa avaguuga vinyu amali kumusuuviriza.

⁴ “Muhuliri, O, avandu va Isiraeli; Yahova; Yahova yeng'ine, aveeye Nyasaye wiitu.

⁵ Muyanze Yahova Nyasaye winyu ni mioyo jinyu josi, ni liiva lienyu liosi, ni zinguru zienyu ziosi.

⁶ Mutaleka malago yaga ga mbana ku munyi kalunu mba.

⁷ Mwigizi avana vinyu nuvugulu. Mugatumikiri lwa muveeye mu zinyumba zienyu, lwa mugendaa, na lwa mu sosa kandi lwa mukoraa miyinzi.

⁸ Mulagavoha gave kelolero ku makono ginyu kandi mulagavoha ku mitwi jinyu gave chu kwizulizira ku.

⁹ Mugang'ode ku maliva gi zinyumba zienyu kandi virivwa vienyu.

Lieganihiza ku livula kuhulira

¹⁰ “Kuli Yahova Nyasaye winyu yasuuviriza niliesuuha, ku avaguuga vinyu, Aburahamu, Isaka na Yakobo, alahaana kumunyi kivala keveeye na madaala manene ligali kandi aguvutugi, agamwavula kwumbaka.

¹¹ Zinyumba zana ziliizula vindu vilahi via mwavura kuviika mu, kandi vidaho vilava yo viamwavula kuyava, kandi milimi ji mizabibu na mizeituni ja mwavura kusimika. Lwa Yahova amuleeta mu kivala yiki, mulava nivindu viosi via mwenya mulie.

¹² Mukore ndio kunangwa muvuli kwivilira Yahova uwamuhonyia kutura mu kivala cha Egebeti, wa mwaali avatugwa.

¹³ Muhaane luyali ku Yahova Nyasaye winyu, mumusigamiri oyo yeng'ine vuzwa, kandi mulisuuha ku lieta lilie lieng'ine.

¹⁴ Mutasigamiri avanyasaye vandi, avanyasaye va avandu vamumenyi navo mba.

¹⁵ Nimusigamira avanyasaye vandi, uvutima vwa Yahova vulaaka ku munyi kuli muliru na gulamudiviza ligali, kigira Yahova Nyasaye winyu oveeye hagati hinyu siavugiliraa vandu vahing'ana naye mba.

¹⁶ “Mutagelizi Yahova Nyasaye winyu, kuli mwamugelizira ha Maasa mba.

¹⁷ Mulole ndi mulondi malago goosi ga Yahova Nyasaye winyu amali kumuha.

¹⁸ Mukore aga Yahova avoora gaveeye malungi kandi malahi, na viosi vilava vilahi ku munyi. Mulingira kandi mulavugula kivala kilahi kandi kenoru yicho cha Yahova yasuuviriza avaguuga vinyu;

¹⁹ kandi mulakunga avasigu vinyu vosi kuli Yahova yamusuuviriza.

²⁰ “Mu zing'inga ziza avana vinyu valakamuteeva, ‘Kigira ki Yahova Nyasaye wiitu nakuraga kuhuliri malago yaga goosi?’

²¹ Hene yaho mulavavolera ndi, ‘Kwaali avatugwa vu mwami wa Egebeti na Yahova yakohonyia ni zinguru zizie zinene.

²² Na kwalola Yahova naakora vilolekizu vinyingi kandi vindu vinene viukutihiza ku vandu va Egebeti, ku mwami wa Egebeti kandi ku vatumikiri veve.

²³ Yakovoholora kutura Egebeti kandi nakoleta hano kandi naakuha kivala yiki kuli yasuuviriza avaguuga viitu.

²⁴ Maku Yahova Nyasaye wiitu yakulaga kuhuliri malago yaga goosi kandi kuhaane kuye luyali. Niiva kulakola ndio, alalinda zihiiri zietu kandi alakokola komeedeke mu lizizagilira imbiri vulahi kazozo.

²⁵ Niiva kulahulira nu vusuuvirifu amalago yaga goosi aga Yahova Nyasaye wiitu amali kukulaga, alayanzizwa nikunyi.’