Kwidzulitsa 5 - KITABU KITAKATIFU

Malago likomi

¹ Musa yalanga harara avandu vosi va Isiraeli navavoolera, “Avandu va Isiraeli, muhuliri amalago goosi aga muheezaa kalunu. Mugiingi kandi mulole ndi mugalondi.

² Ha kiguru cha Sinai, Yahova Nyasaye wiitu yalomba lilagana ni kunyi,

³ sigali ga vababa viitu vuzwa, navuzwa gaali ku kunyi kwosi avakoveeye mwoyo hano kalunu.

⁴ Uwene yeyo, ku kiguru, Yahova yamoloma nimunyi moni na moni, kutura hagati hu muliru.

⁵ Inzi ndaasingira hagati ha Yahova ni munyi ku ing'inga yeyo kumuvolera aga Yahova yaali navooye kigira mwatia muliru na si mwali munyala kwanigira ku kiguru mba. “Yahova yavoola,

⁶ ‘Inzi mbeeye Yahova Nyasaye woovo wa muletaa kutura mu kivala cha Egebeti, wa mwaali vatugwa.

⁷ “Mutasigamiri avanyasaye vandi, navuzwa inzi nzieng'ine.

⁸ “ Mutelomberi vifananyi viavazwa vie lifaana lie vindu viosi mu ligulu anoho ku lirova, anoho mazi anoho musi mu lirova.

⁹ Mutinamiri vifananyi ku viosi anoho mukisigamiri mba, kigira Inzi mbeeye Yahova Nyasaye winyu, mbeeye Nyasaye wilikendeka uhaanaa mageri ku vana kigira vwoni vwa vababa vaavo. Mbana amageri ku yavo avandunyira kandi ku ivisukulurwi viavo kuduuka ku likula lia kavaga kandi lia kane.

¹⁰ Navuzwa manyia vuyanzi vwange vuduukiru ku zielefu zia makura ga yavo avanyanzaa kandi avalondaa malago gange.

¹¹ “Mutatala vuzwa lieta liange inzi Yahova Nyasaye winyu mba kigira inzi, Yahova Nyasaye winyu ndahaana amageri ku yavo avatala lieta liange vugira kivuni.

¹² “Mulindi lidiku lie Lisabato no kulikola live litakatifu. Kuli Inzi Yahova Nyasaye winyu mali kumulaga.

¹³ Oveeye namadiku sita aga okolera mu miyinzi jijo josi.

¹⁴ Navuzwa lidiku lia saba liveeye lidiku lie lisosa, iliaviikwa ku halovega kigira Inzi Yahova Nyasaye winyu. Ku lidiku yilio, mutakoli muyinzi kali mulala mba; munyi vene, anoho vana vinyu vayaayi anoho vakana, avatugwa vinyu, zinyama zienyu zia mwatuga, anoho avageni vamenya mu kivala chiinyu. Avatugwa vinyu kuduuka navo vave nilisoosa kuli munyi.

¹⁵ Mwizurizi ndi mwaali vatugwa mu Egebeti, ma kandi, Inzi, Yahova Nyasaye winyu, ndaamuhonyia kutura yo ni zinguru ziange zinene. Yiki nicho kigira nimugulaga mulindi lidiku lie Lisabato.

¹⁶ “Muhaane luyali ku vababa vinyu na vamama vinyu kuli Inzi Yahova Nyasaye winyu ndamulaga kunangwa viosi viduuki kuva vulahi ku munyi kandi kunangwa muduuki komenya ing'inga indambi mu kivala cha Inzi Yahova Nyasaye winyu muheezaa.

¹⁷ “Mutiita mba.

¹⁸ “Mutaheya mba.

¹⁹ “Mutiiva mba.

²⁰ “Mutagina vache wovo mba.

²¹ “Utakayirwa mukali wu musaza wundi mba; kandi utakayirwa inyumba yeeye, mulimi gwigwe, avatugwa veve, zing'ombe zizie, zisukiri zizie, anoho kindu choosi cha aveeye nacho mba.

²² “Yaga nigo malago ga Yahova yahaana ku munyi mwosi lwa mwavunga harara ha kiguru. Lwa yamoloma nu mwoyo munene kutura hagati hu muliru, kandi kutura mu malesi mamwamu namalitu, nikisundi kenene, yahaana malago yaga na siyameeda ku mba. Maku yagang'oda ku vibaho viviri via magina, ma niyamba.

Uvuti vwa avandu

²³ “Lwi kiguru choosi chaadukaa muliru kandi nimuhulira mwoyo nigutura mu kisundi, ahene yaho kandi aviimiliri vi zihiiri zienyu vaza ku inzi,

²⁴ nivavoora, ‘Yahova Nyasaye wiitu yakumanyia ovonene vwivwe novukumi vwivwe, lwa kwamuhulira namolomaa kutura hagati humuliru! Kalunu kumali kulola ndi mundu anyala kuzizagilira komenya, kali niiva Nyasaye umali komoloma naye.

²⁵ Navuzwa kigira ki kwiviiki mu vuhimwa vwi likuza kandi? Muliru gwukutihiza ligali yigu gulakudiviza. Koveeye nagiligali ndi kulakuza nikuva nikuhulira mwoyo gwa Yahova Nyasaye wiitu namolomaa kandi.

²⁶ Ni mundu ki uwamanya alava mwoyo niyakamara kuhulira Nyasaye oveeye mwoyo namolomaa kutura hagati hu muliru, kuli kunyi?

²⁷ Musa, yirana uzie yo kandi uhuliri goosi ga Yahova Nyasaye wiitu avoora. Maku wirane yinu okovolere goosi aga Yahova Nyasaye wiitu akovoleraa. Kulahulira nukugalinda.’

²⁸ “Lwa Yahova yahulira yaga, yambolera, ‘Mali kuhulira makuva ga avandu yava vakovoleye kandi gaveeye giligali.

²⁹ Oh, vwakaveeye vulahi niiva vakaveeye nu mwoyo kuli yigu kazozo gwu kutia Inzi. Vwakaveeye vulahi niiva vakahaani ku Inzi luyali nokuhulira malago gange goosi kazozo, kunangwa vindu viosi viakaveeye vilahi kuvo kandi ku visukululwi viavo mihiga ni mihiga.

³⁰ Zia, uvavoolere viirane mu mahema gaavo.

³¹ Navuzwa ivi, Musa, utigale hano harara ninzi, na Inzi ndakuha malago gange goosi, namalagano. Wigizi avandu malago yaga kunangwa vaduuki kugalonda mu kivala cha mbahezaa.’

³² “Avandu va Isiraeli, mugelihi mulindi mukore goosi aga Yahova Nyasaye winyu amali kumulaga. Mutavula kuhulira lilago liosi ku malago geege mba.

³³ Mugalonde goosi kunangwa vindu viosi viduuki kuva vulahi ku munyi kandi kunangwa muzizagiliri komenya madiku manyingi mu kivala cha muzizaa kuvugura.