Kwidzulitsa 4 - KITABU KITAKATIFU

Musa Yadinyiriza avandu va Isiraeli

¹ Maku Musa yavolera avandu, “Muhuliri amalago goosi ga mwigizaa; na mulamenya kandi mwidikiri mu kivala cha Yahova, Nyasaye wa avaguuga vinyu amuhezaa.

² Mutameeda kindu choosi ku makuva ga inzi mulagaa kandi mutatulizi ku kindu choosi mba. Mugumiri malago ga Yahova Nyasaye winyu, aga inzi mali kumuha.

³ Munyi aveene mwalora aga Yahova yakola ha kiguru cha Peori. Yahova Nyasaye winyu yadiviza avandu vosi avasigamiraa Baali Peori.

⁴ Navuzwa munyi, avamwali avasuuvirifu ku Yahova Nyasaye winyu mukikiri mwoyo kuduuka lero.

⁵ “Henza, inzi mali kumwigiza amalago goosi kuli Yahova Nyasaye wange yandaga ngole. Mugalonde mu kivala cha muveeye ahimbi kwingira nokukivugula.

⁶ Mugalonde nokugakola nu vusuuvirifu kigira yaga galamanyia avandu vizihiiri zindi kuli muveeye avageri kandi avilimanya. Lwa vahulira malago yaga goosi, valavoora, ‘Ligali ihiiri enene yiyi veveeye no vogeri kandi ni limanya!’

⁷ “Sihaveeye ho nihiiri yindi, kali neveeye enene, eveeye na nyasaye oveeye ahimbi ligali kuvo lwa vamwenyaa kuli Yahova Nyasaye wiitu aveeye ku kunyi mba. Akutivulira lwa kumwaniraa.

⁸ Sihaveeye ho ni hiiri yindi, kali neveeye enene ndi, eveeye na malago ni likalaga agaveeye amalungi kuli yaga aga mali kumwigiza kalunu.

⁹ Mwilindi ligali munyi aveene, muvuli kwivilira ing'inga yoosi ya muveeye mwoyo viamumali kolola. Muvoolere avana vinyu kandi aviisukulu vinyu

¹⁰ kigira lidiku lia mwasingira imbiri wa Yahova Nyasaye winyu ku kiguru cha Sinai, lwa Yahova yambolera, ‘Vuganyia avandu. Nyenya vahuliri makuva ga nyenya mbore, kunangwa vaduuki kwiga kumbulira madiku goosi aga vaveeye mwoyo kandi kunangwa navo valiegizi avana vaavo kokora malala meere.’

¹¹ “Muvoolere avana vinyu kuli mwazia nimusingila hi kiguru kitangiraa nikifumiywi na malesi malitu gu mwoki mumwamu kandi muliru gwakaa lomemo kuduuka mwigulu.

¹² Muvavolere kuli Yahova yamoloma ku munyi nu mwoyo munene kutura hagati hu muliru, kuli mwahulira namolomaa, navuzwa simwamulola kuli afaanaa mba.

¹³ Yamuvolera icha muduukana mukore kulinda lilagana lia yalomba ni munyi, kuduuka mulonde malago likomi, aga yang'oda ku vibaho viviri via magina.

¹⁴ Yahova yandaga mwigizi amalago goosi agadukanaa muhuliri mu kivala cha muveeye ahimbi kwingira mucho nukwidikilamu.

Lieganihiza ku Lisigamira Vifananyi

¹⁵ “Lwa Yahova yamoloma ku munyi kutura mu muliru ku kiguru cha Sinai, simwalola lifaana liosi mba. Ku vulahi vwinyu, mulole ndi

¹⁶ muvuli kokora uvwoni ku lielombera aveene kifananyi ku lifaana liosi mba, nikiva kisaza anaho kikali,

¹⁷ Chi inyama anoho linyonyi liburukaa muvwerefu,

¹⁸ lifaana lie kindu choosi kemolaa kumalova anaho ku lifaana lie izuzi.

¹⁹ Mutagelizwa kusigamira kandi kutumikira via muloraa muvwerefu kuli liuva, mweli, kandi zing'ereng'ani mba. Yahova Nyasaye winyu yamala kuhaana yivi ku avandu vandi vosi vavisigamiri.

²⁰ Navuzwa munyi muveeye avandu va Yahova yahonyia kutura Egebeti, kutura mu lomemo lwu muliru. Yamutuliza yo amukole avandu veve mwene kuli muveeye kalunu.

²¹ Kigira munyi, Yahova Nyasaye winyu yaali nu vutima ninzi kandi yanzisuhira kovora ndi, inzi sindaambuka mugera gwa Jorodani nukwingira mukivala kenoru yicho icha aheezaa munyi mba.

²² Inzi ndakuzira mu kivala yiki kandi sindambuka kali hakuzu mugera gwa Jorodani mba, navuzwa munyi muveeye ahimbi kwambuka nukuvugula kivala kilahi yicho.

²³ Mwilindi munyi aveene, kandi mutivilira lilagana lia Yahova Nyasaye winyu yalomba ni munyi mba. Muhuliri lilaga lilie kandi mutelombera kifananyi ku choosi chavazwa cha Yahova Nyasaye winyu yagaya mba;

²⁴ kigira Yahova Nyasaye winyu aveeye kuli muliru gusambaa. Aveeye Nyasaye we likendeka.

²⁵ “Kali lwa muliiva nimwakamenya mukivala zana ku ing'inga indambi, nokwivula avana na aviisukulu, mutakola uvwoni ku lielombera munyi aveene kifananyi chavazwa mu lifaana lie kindu choosi mba. Yaga gaveeye madamanu imbiri wa Yahova Nyasaye winyu kandi galamuvihiliriza.

²⁶ Nangaa ligulu ni lirova kuli valolekizi ku munyi kalunu ndi, niiva simulahulira inzi mulatulaho vwangu kutura mu kivala yicho. Simulamenya ku ing'inga indambi mu kivala keveeye engeleka wa Jorodani ichamuveeye ahimbi kuvugura mba. Muladivizwa ligali.

²⁷ Yahova alamusalanyia hagati hi zihiiri zindi, uwa avakeekeke vuzwa ku munyi valatigala mwoyo.

²⁸ Uwene yeyo mulasigamira avanyasaye valombwa na makono ga vandu, avanyasaye vavaazwa kutura ku misaala na magina, avanyasaye vatanyala kolola anoho kuhulira, kulia anaho kufunyiriza.

²⁹ Uwene yeyo mulenyeleriza Yahova Nyasaye winyu, kandi niiva mulamwenyeleriza nu mwoyo gwinyu gwosi na roho gwinyu gwosi, mulamunyoola.

³⁰ Lwa muveeye mu kivi ni vindu yivi viosi viekoleke ku munyi, ahene yaho mulimalirika mulagirung'ana nokwirana ku Yahova Nyasaye winyu nukumuhulira.

³¹ Aveeye Nyasaye wiliverererwa. Sialamuleka anoho kumudiviza, kandi sia alivilira lilagana lia oyo umwene yalomba na avaguuga vinyu ku liesuuha mba.

³² “Mwenyelerizi amakuva ga madiku gaavita kale, ing'inga ya mwali nimukikiri kwivulwa, kutura ing'inga ya Nyasaye yalomba mundu ku lirova. Yenyelerizi ku lirova liosi. Inguuva enene kuli yiyi yayekoleka ku maziambiri? Mundu woosi, yahulira ku inguuva yu lugano yilu?

³³ Haveeye ku ho na avandu avaahulira mwoyo gwu munyasaye nigomolomaa kuvo kutura hagati ho muliru, kuli munyi muhuliyi, ma nivava mwoyo?

³⁴ Aveeye ho na nyasaye woosi uwaluvilira kuzia kwivugulira avandu kutura mu ihiiri yindi nu kuvakola vave aveeve mwene, kuli Yahova Nyasaye winyu yamukolera mu Egebeti. Imbiri winyu aveene, yatumikira zinguru zizie zinene, kandi uvunyali vwivwe. Yaleeta maduywa kandi uvulwani yakola vilolekizu kandi viokogenyia, kandi yalomba vindu viukutihiza viekoleke.

³⁵ Yahova umali kololekiza vindu yivi ku munyi kumumanyia ndi oyo yeng'ine aveeye Nyasaye kandi sihaveeye no wundi nataveeye oyo yeng'ine mba.

³⁶ Yamukola muhuliri mwoyo gwigwe kutura mwigulu kunangwa aduuki ku mwigizaa; kandi hano ku lirova, yakola munyi mulole muliru gwigwe mutakatifu kandi namoloma ku munyi kutura hagati homuliru.

³⁷ Kigira yayanza avaguuga vinyu, yatovola munyi, visukululwi viavo, kandi kuzinguru zizie zinene yamutuliza mu kivala cha Egebeti.

³⁸ Lwa mwisuunda imbiri, yakunga zihiiri zinene kandi zie zinguru ligali kuvita munyi kunangwa aduuki kumwingiriza nukumuha kivala chavo, miandu jinyu, kivala ikeveeye chienyu kuduuka kalunu.

³⁹ Kunangwa wizulizi kalunu kandi utivilira mba: Yahova aveeye Nyasaye mwigulu kandi ku lirova, Sihaveeye ho nyasaye wundi mba.

⁴⁰ Muhuliri ligali malago geege goosi gamali kuhaana ku munyi kalunu, kandi goosi galava malahi ku munyi harara ni visukululwi vienyu. Mulazizagilira komenya mu kivala icha Yahova Nyasaye winyu amuhezaa kuva miandu jinyu mihiga ni mihiga.”

Amadara gukwirukila mu

⁴¹ Maku Musa yatovola madaala gavaga Ivugwi wu mugera gwa Jorodani

⁴² gu mundu anyala kwirukira mu ma ave mu mirembe niiva yaali kwita mundu utaveeye musigu weve ku matava. Yaali anyala kwirukira mu lilala ku madaala yago na avuli kwitwa.

⁴³ Lidaala lia Bezeri, iliveeye mu kereremo chi changalangwe, liahaanwa ihiiri ya Rubeni; lidaala lia Ramozi, iliveeye mu kivala cha Gileadi, liahaanwa ku ihiiri ya Gadi, kandi lidaala lia Golani, iliveeye mu kivala cha Bashani liahaanwa ku ihiiri ya Manase.

Litangilira lia Malago ga Nyasaye

⁴⁴ Musa yahaana malago ga Nyasaye ku avandu va Isiraeli.

⁴⁵ Yili nilio lilolekiza lieligali, malago kandi likalaga lia Musa yavolera avandu va Isiraeli, lwa vaatura mu kivala cha Egebeti,

⁴⁶ kandi nivaveeye mu livona ahimbi ni lidaala lia Bezi-peoru, ivugwi wu mugera gwa Jorodani, mu kivala cha Sihoni, Mwami wa vandu va Amori, uwamihaa kutura mu lidaala lia Heshiboni.

⁴⁷ Vavugura kivala chiche nikiva miandu jaavo, kandi kivala chu mwami Ogu wa Bashani. Avami va vandu va Amori vaviri yavo uwamenyaa kolovega lwi ivugwi wu mugera gwa Jorodani.

⁴⁸ Lwako lwi kivala yiki lwali kutura ku lidaala lia Aroeri, liveeye mu livona liu mugera gwa Arinoni kuduuka ivaale ku kiguru cha Sironi, ekeveeye kiguru cha Herimoni.

⁴⁹ Lwako yilu lwavugula harara ni kivala choosi ekeveeye ivugwi wumugera gwa Jorodani, kuduuka kulovega lwi Isavaalu ku Inyanza yi ijumbi kandi kolovega lwi ivugwi hi wi kiguru cha Pisiga kitangiraa.