Kwidzulitsa 34 - KITABU KITAKATIFU

Likuza lia Musa

¹ Musa yanigira kutura mu vireremo via Moabu kuzia ku Kiguru cha Nebo, kuduuka kondongozi kwi kiguru cha Pisiga, ivugwi wa Jeriko, nu uwene yeyo, Yahova yamumanyia kivala choosi: kivala cha Gileadi kuduuka Ivugwi wi lidaala lia Dani,

² kivala choosi cha Nafutali; vivala via Efuraimu na Manase; kivala choosi cha Yuda kuduuka imadioli kunyanza ya Meditareniani;

³ kivala keveeye isavaalu wa Yuda; kandi kereremo kitulaa Zoari kuduuka Jeriko, lidaala linene lie misaala ja makindu.

⁴ Maku Yahova yavolera Musa, “Yiki ni kivala cha ndaasuuviriza Aburahamu, Isaka na Yakobo ndi ndahaana ku visukululwi viavo. Umali kokelola, navuzwa sindaleka uzie yo mba.”

⁵ Kunangwa Musa, mutumikiri wa Yahova, yakuzira yo mu kivala cha Moabu, kuli Yahova yaali navooye, galava.

⁶ Yahova yaamuyavira mu livona liu Moabu kolovega lundi lwi lidaala lia Bezi-peoru, navuzwa sihaliho numundu wa umanya kilindwa chiche kali kuduuka kalunu mba.

⁷ Musa yaali mihiga mia moja na sirini lwa yakuza. Yaali mundu wizinguru kandi zimoni zizie Ziali nizikelola vulahi.

⁸ Avandu va Isiraeli vamusiomera ku madiku salasini mu vireremo via Moabu.

⁹ Joshua, muyaayi wa Nuni yaali niyizuuyi ovogeri kigira Musa yaali namutovoye avuguli vogono vwivwe. Avandu va Isiraeli vahulira Joshua kandi nivalinda malago ga Yahova yaali navaheeye kuvitira ku Musa.

¹⁰ Siaveeye ho nu muporofeti wundi mu Isiraeli kuli Musa mba; Yahova yamoloma naye moni namoni.

¹¹ Muporofeti wundi akikiri kokolaku vilolekizu ni viokogenyia kuli yivio via Yahova yatuma Musa akole ku Mwami wa Egebeti mba, vatumikiri veve kandi mu kivala choosi mba.

¹² Muporofeti wundi akikiri kuvakuho wakola vindu vinene ni iviukutihiza kuli via Musa yakola imbiri wa avandu va Isiraeli vosi mba.