Kwidzulitsa 33 - KITABU KITAKATIFU

Musa Yagasiza zihiiri zia avandu va Isiraeli

¹ Yivu nivwo uvugasu vwa Musa, mundu wa Nyasaye, yagaasizira avandu va Isiraeli nakikiri kukuza.

² Yavoola: “Yahova yaza kutura mu kiguru cha Sinai; yatonga kuli liuva kutura Edomu, kandi yang'ereng'ana ku avandu veve kutura ku kiguru cha Parani. Zingelosi zielefu kumi ziali harara naye, na umuliru gwaadukaa gwaali ha mukono gwigwe mulungi.

³ Yahova ayaanza avandu veve kandi akingaa yavo avaveeye aveeve. Kunangwa kusigama ha virenge vivie, nukuhulira malago geege.

⁴ “Kunyi kolondaa Lilaga lia Musa yakuha. Liveeye mwandu gwu vuguli vonene ku ihiiri yitu.

⁵ Yahova yagwa Mwami munene wa avandu veve Isiraeli lwi zihiiri ziavo na aviimiliri vaavo vavuganywa harara.”

⁶ Yahova, leka Rubeni ahindiri kandi umulindi kutura ku Likuza kali vandu veve avaveeye vakekeeke.

⁷ Yavoola ku ihiiri ya Yuda: “Yahova huliriza lianira liavo kigira vokonyi; uvahambanyie harara ku avandu vi zihiiri zindi Uvalwaanire O, Yahova, Kandi uvakonye ku avasigu vaavo.”

⁸ Yavoola ku ihiiri ya Levi: “Ivi, O, Yahova, vuula uvulariri vuvwo mu litumikira Urimu na Zumimu yooyo. Kuvitira mu vatumikiri vovo vasuuvirifu, Avalavi. Wavageriza ha Maasa kandi wavalolekiza wavanyoola kuva aviligali ha mazi ga Meriba.

⁹ Vamanyia uvusuuvirifu vonene ku ivi kuvita ku aviivuli vaavo, avamwavo, anaho avana vaavo vahulira malago googo Kandi vaali avasuuvirifu ku Lilagana liilio.

¹⁰ “Valigiza avandu vovo kuhulira Lilaga liilio; valahaana visiuviliru ku vwali vuvwo.

¹¹ Yahova, konya ihiiri yaavo vave avizingulu; uyaanzizwi ni cha vakora. Duvulanyia avasigu vaavo vosi; leka vavuli kusingira kandi mba.”

¹² Musa yavoola ku ihiiri ya Benjamini; “Yiyi ni ihiiri ya Yahova ayaanza kandi akingaa; Avalindaa mbasu gwosi, Kandi amenyaa hagati haavo.”

¹³ Yavoola ku ihiiri ya Josefu: “Yahova agaasizi kivala chavo niimbura Kandi na mazi gaturaa isi wi lirova.

¹⁴ Kivala chavo kigaasizwi na makuyu, makuyu malahi ligali zing'inga ziosi.

¹⁵ Vigulu viavo via kale vizuri amakuyu malahi gatovoleywe.

¹⁶ Kivala chavo chizuli vindu viosi viveeye vilahi. Ikigaasiziywi nu vugasu vulahi vwa Yahova Nyasaye uwamoloma kutura mu kisaka chaadukaa muliru. Uvugasu yivu vuduuki ku ihiiri ya Josefu. Kigira yaali mwimiliri hagati ha avamwavo veve.

¹⁷ Josefu aveeye nizinguru kuli zie igiriki. Zinziga zie igiriki yumuvulimu. Zinziga zizie ziveeye zielefu zia Manase, kandi zielefu likomi va Efuraimu. Alatandula zihiiri nazio. Kandi avalumbaa kuduuka ku keheri chi lirova.”

¹⁸ Ku zihiiri zia Zabuloni Isakari yavoola: “Leka Zabuloni ave ni limeedeka mu ikiranyia viavo kunyanza, kandi vutugi vwa Isakari vomeedeke hango hinyu.

¹⁹ Valagenihiza avageni ku kiguru chavo kandi valahaana vihaanwa vilungi ukwene yikwo. Vanyola vutugi vwavo kutura kunyanza kandi kutura ku muyeke goveeye ku lujinga lwinyanza.”

²⁰ Yavoola ku ihiiri ya Gadi: “Nyasaye yizominywi, wakola kivala chavo kuva kenene. Gadi agonekaa kuli isimba kutandura mukono anoho lwote.

²¹ Vivugulira aveene mu kivala kilahi ligali kuvita.”

²² Yavoola ku ihiiri ya Dani: “Dani aveeye mwana wi simba; atuumaa ichova kutura Bashani.”

²³ Yavoola ku ihiiri ya Nafutali: “Nafutali agaasiziywi nu vutugi ni liyaanzilira lilahi lia Yahova; kivala chavo kiduukaa isavaalu kutura kunyanza ya Galilaya.”

²⁴ Yavoola ku ihiiri ya Asheri, “Asheri agaasiziywi kuvita zihiiri zindi. Leka ayanzwi na avamwavo veve, kandi kivala chiche keve kitugi ni misaala ja mizeituni.

²⁵ Amadara geege gakingwi ni virivwa vie kivia ni migasa kandi aduuki komenya mu mirembe.”

²⁶ Avandu va Isiraeli, sihaveeye ho na nyasaye kuli Nyasaye winyu mba, uhiraa barasi mu malesi kuuza ku likonya lienyu.

²⁷ Nyasaye aveeza likingwa lienyu kazozo. Amakono geege gimihiga ni mihiga gaveeye vokonyi vwenyu. Yakunga avasigu vinyu lwa mwavingilira, kandi namuvolera muvadivizi vosi.

²⁸ Kunangwa visukululwi via Yakobo viamenya mu mirembe vilava nu vweremerizi mu kivala ichizula uvuswage ni iwaini, lime kutura muvwerefu liletaa amazi ku lirova!

²⁹ Ugasiziywi, O, ivi Isiraeli! Siaveeye ho numulala oveeye kuli ivi, ihiiri yahonywa na Yahova? Yahova aveeye kivavi chienyu kandi inguva yinyu alamukinga kandi alamuha liguuta. avasigu vinyu valaza kumuteeva zimbavasi.